আজি (৯ ছেপ্টেম্বৰ মঙলবাৰ) অনুষ্ঠিত হ’ব নতুন উপ-ৰাষ্ট্ৰপতিৰ বাবে নিৰ্বাচন। প্ৰত্যক্ষ প্ৰতিদ্বন্দ্বিতা হ’ব শাসকীয় এন ডি এ মিত্ৰজোঁটৰ প্ৰাৰ্থী চি পি ৰাধাকৃষ্ণন আৰু বিৰোধী ইণ্ডিয়া জোঁটৰ উমৈহতীয়া প্ৰাৰ্থী অৱসৰপ্ৰাপ্ত ন্যায়াধীশ বি সুদৰ্শন ৰেড্ডীৰ মাজত। সংসদৰ দুয়োটা সদনৰ – লোকসভা আৰু ৰাজ্যসভাৰ মুঠ ৭৮১ জন বৰ্তমানৰ সদস্যই এই নিৰ্বাচনত ভোটদানৰ বাবে যোগ্য।
সংখ্যাগৰিষ্ঠতা আৰু ৰাজনৈতিক অংকৰ ফালৰ পৰা এন ডি এৰ প্ৰাৰ্থী চি পি ৰাধাকৃষ্ণনে এই উপ-ৰাষ্ট্ৰপতি নিৰ্বাচনত জয়ী হোৱাটো প্ৰায় নিশ্চিত। নতুন সংসদ ভৱনত পুৱা ১০ বজাৰ পৰা বিয়লি ৫ বজালৈ ভোটগ্ৰহণ অনুষ্ঠিত হ’ব আৰু সন্ধিয়া ৬ বজাৰ পৰা ভোটগণনা কৰা হ’ব। নিশাৰ ভিতৰত ফলাফল ঘোষণা হোৱাৰ সম্ভাৱনা আছে। উপ-ৰাষ্ট্ৰপতি নিৰ্বাচনত ভোটদান কৰিব লোকসভাৰ বৰ্তমানৰ ৫৪২জন সদস্য আৰু ৰাজ্যসভাৰ ২৩৯জন সদস্যই।
ইপিনে, ওড়িশাৰ প্ৰাক্তন মুখ্যমন্ত্ৰী নবীন পাটনায়কৰ দল বিজু জনতা দল (বিজেডি) আৰু তেলেংগানাৰ প্ৰাক্তন মুখ্যমন্ত্ৰী কে চন্দ্ৰশেখৰ ৰাওৰ দল ভাৰত ৰাষ্ট্ৰ সমিতিয়ে উপ-ৰাষ্ট্ৰপতি নিৰ্বাচনৰ পৰা আঁতৰি থকাৰ সিদ্ধান্ত লোৱা বুলি জানিব পৰা গৈছে। তেওঁলোকৰ এই সিদ্ধান্তই ৰাধাকৃষ্ণনৰ জয়ৰ সম্ভাৱনা আৰু অধিক বৃদ্ধি কৰিব পাৰে। বিজেডি আৰু বিআৰএছ কোনো মিত্ৰতা, এনডিএ বা ইণ্ডিয়াৰ অংশ নহয়। সোমবাৰে দুয়োটা দলে ঘোষণা কৰে যে এই হাইপ্ৰফাইল নিৰ্বাচনত তেওঁলোকৰ সাংসদসকলে ভোটদানৰ পৰা বিৰত থাকিব।
আনহাতে, হায়দৰাবাদৰ সাংসদ আছাদুদ্দিন ওৱেইচিয়ে বিৰোধী প্ৰাৰ্থী বি সুদৰ্শন ৰেড্ডীক সমৰ্থন জনোৱাৰ বিপৰীতে অন্ধ্ৰপ্ৰদেশৰ প্ৰাক্তন মুখ্যমন্ত্ৰী জগনমোহন ৰেড্ডীৰ দল ৱাই এছ আৰ চি পিয়ে এন ডি এৰ প্ৰাৰ্থীক সমৰ্থন জনাইছে। পঞ্জাৱৰ শিৰোমণি আকালি দলেও ভোটদানৰ পৰা আঁতৰি থকাৰ সিদ্ধান্ত লৈছে। তেওঁলোকৰ মুঠ তিনিজন সাংসদ আছে।
ৰাজ্যসভাত এতিয়া বিজেডিৰ ৭ জন সদস্য। লোকসভাত তেওঁলোকৰ শূন্য। ইফালে বি আৰ এছৰ ৰাজ্যসভাত মুঠ ৪ জন সদস্য আছে। শিৰোমণি আকালি দলৰ লোকসভাত ১ জন, ৰাজ্যসভাত ২ জন সদস্য আছে। উপ-ৰাষ্ট্ৰপতি নিৰ্বাচনত ভোটদান কৰিব পাৰিব ৭৮১ জন লোকে। কিন্তু যিহেতু এই তিনিটা দলে ভোটদানৰ পৰা বিৰত থকাৰ বাবে মুঠ ভোটাৰৰ সংখ্যা ৭৬৭ হ্ৰাস পাব। ফলত যাদুকৰী সংখ্যা হ’ব ৩৮৪।
ইপিনে, দুয়োটা সদনত এন ডি এৰ সাংসদৰ সংখ্যা ৪২৫ (লোকসভাত বিজেপি নেতৃত্বাধীন এন ডি এৰ পক্ষত ২৯৩ জন সদস্য। আনফালে ১২৯ জন শাসকীয় মিত্ৰজোঁটৰ পক্ষত ৰাজ্যসভাত মনোনীত সদস্যও আছে।) ইয়াৰ উপৰিও ৱাই এছ আৰ কংগ্ৰেছৰ ১১ জন সাংসদে চৰকাৰী প্ৰাৰ্থীগৰাকীক সমৰ্থন জনোৱাৰ কথা ঘোষণা কৰিছে। আনহাতে, বিৰোধী ইণ্ডিয়া ব্লকৰ সাংসদৰ সংখ্যা ৩২৪ জন। এই স্থিতিত এন ডি এৰ প্ৰাৰ্থীৰ বিজয় প্ৰায় নিশ্চিত।
