দুৰ্দান্ত প্ৰদৰ্শনেৰে ভাৰতীয় হকী দলে ২০২৫ চনৰ হকী এছিয়া কাপৰ ফাইনেলত প্ৰৱেশ কৰিছে। ছুপাৰ ফোৰৰ মেচত চীনক ৭-০ গ’লত পৰাস্ত কৰি হৰমনপ্ৰীত আৰু তেওঁৰ দলটোৱে ফাইনেলৰ টিকট নিশ্চিত কৰে।
বিহাৰ স্প’ৰ্টছ ইউনিভাৰ্চিটি হকী ষ্টেডিয়ামত শনিবাৰে অনুষ্ঠিত খেলখনত অভিষেকে দুটা গ’ল দিয়ে। ইয়াৰ উপৰিও শিলানন্দ লাক্ৰা, দিলপ্ৰীত সিং, মনদ্বীপ সিং, ৰাজকুমাৰ পাল আৰু সুখজিৎ সিঙে এটাকৈ গ’ল দিয়ে।
এই জয়ৰ ফলস্বৰূপে ফাইনেলত ভাৰতৰ প্ৰতিদ্বন্দ্বী হ’ব দক্ষিণ কোৰিয়া। সমগ্ৰ দেশে এই বিজয় উদযাপন কৰিছে, ভাৰতীয় হকী দলটোক প্ৰশংসা কৰিছে। এতিয়া এছিয়া কাপৰ খিতাপ জয়ৰ ওপৰত সকলোৰে দৃষ্টি।
খেল আৰম্ভ হোৱাৰ পৰাই ভাৰতৰ আধিপত্য বৰ্তি আছিল। চীনৰ ডিফেন্সৰ ভুলৰ সুযোগ লৈ খেলখনৰ চতুৰ্থ মিনিটত শিলানন্দ লাক্ৰাই প্ৰথমটো গ’ল দিয়ে। তাৰ পাছত মাত্ৰ ৩ মিনিটৰ পাছতেই পেনাল্টি কৰ্ণাৰত দিলপ্ৰীত সিঙে দ্বিতীয়টো গ’ল দিয়ে। বাৰে বাৰে বল ক্লিয়াৰ কৰিব নোৱাৰাৰ মূল্য দিবলগীয়া হৈছিল চীনৰ ডিফেন্সে।
প্ৰথম কোৱাৰ্টাৰত ভাৰতে ২-০ গ’লত অগ্ৰগতি লাভ কৰে। দ্বিতীয় কোৱাৰ্টাৰত অগ্ৰগতি বৃদ্ধি কৰে মনদ্বীপ সিঙে। আন এটা পেনাল্টি কৰ্ণাৰৰ বাবে গ’লৰ সন্মুখত সৃষ্টি হোৱা খেলিমেলিৰ সুযোগ লৈ তেওঁ। বলটো ব্লক কৰা হয় যদিও গ’লৰক্ষকে দখল ল’ব নোৱাৰিলে, আৰু সুযোগৰ সদ্ব্যৱহাৰ কৰে মনদ্বীপে।
তৃতীয় কোৱাৰ্টাৰত ভাৰতে পুনৰ গতি বৃদ্ধি কৰে। ৩৭ মিনিটত বাওঁফালৰ পৰা শিলানন্দৰ ক্ৰছৰ পৰা দিলপ্ৰীতৰ পাছ লাভ কৰা ৰাজকুমাৰ পালে পোষ্টৰ ঠিক সন্মুখত থিয় হৈ সহজ গ’ল দিয়ে। ইয়াৰ দুই মিনিটৰ পাছত সুখজিৎ সিঙৰ গ’লে ভাৰতীয় অনুৰাগীৰ উন্মাদনা বৃদ্ধি কৰে। দিলপ্ৰীতৰ কাটবেকৰ পৰা বলটো লাভ কৰি সুখজিতে লো শ্বটেৰে বলটো নেটত সুমুৱাই দিয়ে।
অৱশ্যে খেলখনৰ চূড়ান্ত চমক দেখুৱালে অভিষেকে। শেষৰ কোৱাৰ্টাৰত দুটা গ’ল দি তেওঁ চীনৰ বিৰুদ্ধে কফিনত চূড়ান্ত গজালটো মাৰিলে। ৪৬ আৰু ৫০ মিনিটত তেওঁৰ দুটা নিখুঁত গ’লে ভাৰতৰ জয় সম্পূর্ণ কৰে৷
এই বিশাল জয়ৰ পাছত সমগ্ৰ দেশতে ভাৰতীয় হকী দলৰ প্ৰশংসাৰ ধুমুহা বৈছে। ক্ৰীড়াপ্ৰেমীসকলে প্ৰশিক্ষক কৰ্মী আৰু খেলুৱৈসকলক অভিনন্দনেৰে উপচাই পেলাইছে।
