ভাৰতীয় হকী দলটোৱে ৰাজগীৰ হকী ষ্টেডিয়ামত ইতিহাসৰ সৃষ্টি কৰিছে। এছিয়া কাপ ২০২৫ৰ ফাইনেলত কোৰিয়াক ৪-১ গ’লত পৰাস্ত কৰি চতুৰ্থবাৰৰ বাবে খিতাপ দখল কৰে ভাৰতে। একে সময়তে ২০২৬ চনৰ এফ আই এইচ হকী বিশ্বকাপত খেলাৰ যোগ্যতা নিশ্চিত কৰে।
ফাইনেলৰ নায়ক দিলপ্ৰীত সিঙে দুটা গ’লেৰে সন্মুখৰ পৰা ভাৰতীয় আক্ৰমণৰ নেতৃত্ব দিয়ে। সুকজিৎ সিং আৰু অমিত ৰোহিদাসেও এটাকৈ গ’ল দিয়ে।
ফাইনেলৰ আৰম্ভণিতে ভাৰতে ধুমুহাৰ সৃষ্টি কৰে। হুইচেল বজাৰ লগে লগে সুকজিতে এটা গ’ল দিয়ে। তাৰ পিছত কোৰিয়াৰ ডিফেন্সৰ ওপৰত ধাৰাবাহিক আক্ৰমণৰ হেঁচা আহি পৰে। অভিষেক মেচত উজ্জ্বল প্ৰদৰ্শনৰ পিছত ফাইনেলতো জিলিকি উঠে দিলপ্ৰীত।
প্ৰশিক্ষক ক্ৰেগ ফুলটনে মেচৰ পূৰ্বে কৈছিল, “একেৰাহে মেচত একে প্ৰদৰ্শন দিয়াটোৱেই আটাইতকৈ কঠিন কাম। কিন্তু ল’ৰাবোৰে ইজনে সিজনৰ হৈ খেলিছে, সেইটোৱেই আটাইতকৈ ডাঙৰ শক্তি।” ফাইনেলত তেওঁৰ কথা প্ৰমাণিত হ’ল।
ইয়াৰ পূৰ্বে ভাৰতে ছেমি ফাইনেলত চীনক ৭-০ গ’লত পৰাস্ত কৰি ফাইনেলত প্ৰৱেশ কৰিছিল। আনহাতে কোৰিয়াই মালয়েছিয়াক পৰাস্ত কৰি খিতাপৰ যুঁজত প্ৰৱেশ কৰে।
কোৰিয়া দ্ৰুত প্ৰত্যাক্ৰমণৰ বাবে পৰিচিত যদিও ৰাজগীৰত অনুষ্ঠিত ফাইনেলত ভাৰতীয় দলৰ গতি আৰু নিখুঁত ফিনিছিঙৰ সন্মুখত তিষ্ঠিব নোৱাৰিলে। ফলত ৪-১ গ’লত জয়লাভ কৰি ভাৰতীয় হকীয়ে পুনৰবাৰ এছিয়ান চেম্পিয়ন হ’ল।
