জুনিয়ৰ এছিয়া কাপ হকীত চেম্পিয়ন ভাৰত; পাকিস্তানক হৰুৱাই অৰ্জন খিতাপ

পাকিস্তানক পৰাস্ত কৰি ভাৰতে জুনিয়ৰ এছিয়া কাপ হকীত চেম্পিয়ন হৈছে। ফাইনেলত ভাৰতৰ ২১ বছৰ অনুৰ্ধৰ জুনিয়ৰ দলটোৱেপাকিস্তানক  ২-১ গ’লত পৰাস্ত কৰে। প্ৰায় সমগ্ৰ খেলখনত ভাৰতীয় দলটোৱে আধিপত্য বিস্তাৰ কৰিছিল।

ভাৰতীয় দলটোৱে আৰম্ভণিৰে পৰাই আক্ৰমণাত্মক ৰূপত আৰম্ভ কৰিছিল। প্ৰথম কোৱাৰ্টাৰত ভাৰতে ১-০ গ’লত অগ্ৰগতি লাভ কৰে। সুনীত লাক্ৰাৰ পৰা ওপৰেৰে নিয়া এটা শ্বট মুকলিকৈ লাভ কৰে আদিত্যই। তেওঁ বলটো ‘ডি’ৰ ভিতৰত থকা ষ্ট্ৰাইকাৰ অৰিজিত সিঙক দিয়ে। শ্বটটো পাক গ’লৰক্ষকে ব্লক কৰিছিল যদিও কোনো লাভ নহ’ল। ৰিটাৰ্ণ বলত দ্ৰুত শ্বটেৰে গ’ল দিয়ে অংগদ বীৰ সিঙে।

লগতে পঢ়ক: প্ৰৱঞ্চনাৰ অভিযোগত গ্ৰেপ্তাৰ আন এগৰাকী অসম বিজেপিৰ নেতা

দ্বিতীয় কোৱাৰ্টাৰত ভাৰতে পুনৰ গ’ল দিয়ে। এইবাৰ অংগদৰ পৰা বলটো পাই অৰিজিতে গ’ল দিয়ে। পাকিস্তানে মূলতঃ প্ৰত্যাক্ৰমণভিত্তিক হকী খেলিছিল। কেইবাটাও পেনাল্টি কৰ্ণাৰ লাভ কৰাৰ পিছতো পাকিস্তানে প্ৰথম দুটা কোৱাৰ্টাৰত গ’ল দিব পৰা নাছিল।

০-২ গ’লত পিছ পৰি থকাৰ পাছত তৃতীয় কোৱাৰ্টাৰত পাকিস্তানে আক্রমণ বৃদ্ধি কৰে৷ এইবাৰ বাছাৰত আলীয়ে পাকিস্তানৰ হৈ ব্যৱধান কমাই দিয়ে। ব্যৱধান কমাই দিয়াৰ পাছত পাকিস্তানে সমতা স্থাপনৰ বাবে আপ্ৰাণ চেষ্টা কৰিছিল। ভাৰতীয় ৰক্ষণৰ ওপৰত চাপ বাঢ়িছিল। ভাৰতীয় দলৰ গ’লৰক্ষক মোহিত এই সময়ত প্ৰায় অভেদ্য হৈ পৰে। তেওঁ কেইবাটাও ভাল ছেভ কৰিছিল। শেষত ভাৰতেও এই ব্যৱধান বৃদ্ধি কৰাৰ সুযোগ পাইছিল যদিও ইয়াক ব্যৱহাৰ কৰিব নোৱাৰিলে।

লগতে পঢ়ক: দশম শ্ৰেণীৰ পাঠ্যপুথিৰ পৰা বাদ পৰিল ‘পিৰিয়ডিক টেবুল’,‘গণতন্ত্ৰৰ অধ্যায়: বিতৰ্কত NCERT

ফাইনেলৰ পূৰ্বে ওমানৰ ছালালাহত অনুষ্ঠিত প্ৰতিযোগিতাখনৰ গ্ৰুপ পৰ্যায়ত ভাৰত-পাকিস্তানৰ মুখামুখি হৈছিল। ২৭ মে’ত ভাৰতে অগ্ৰগতি লাভ কৰিও জয়ী হ’ব পৰা নাছিল। খেলখন ১-১ গ’লত সমাপ্ত হয়। দুয়োখন দেশে গ্ৰুপত এখনো মেচত পৰাস্ত হোৱা নাই। দুয়োখন দেশে ১০ পইণ্টেৰে ছেমি ফাইনেলত প্ৰৱেশ কৰে। গ’লৰ ব্যৱধানত ভাৰতে গ্ৰুপত শীৰ্ষস্থান দখল কৰে।

Congratulations to the Indian Junior Men's Team for clinching Gold and announcing themselves as the Best in Asia in the Men's Junior Asia Cup 2023#HockeyIndia #IndiaKaGame #AsiaCup2023 #GoldToIndianColts#GloryToIndianColts pic.twitter.com/Bk1xNlARht

— Hockey India (@TheHockeyIndia) June 1, 2023

পাকিস্তানৰ খেলখনৰ বাহিৰেও গ্ৰুপৰ বাকী মেচসমূহত ভাৰতে বৃহৎ ব্যৱধানত জয়লাভ কৰে। ভাৰতীয় দলে চীনৰ টাইপেইৰ বিৰুদ্ধে ১৮-০ আৰু জাপানৰ বিৰুদ্ধে ৩-১ গ’লত জয়লাভ কৰে। থাইলেণ্ডক ১৭-০ গ’লত পৰাস্ত কৰে ভাৰতে। পাকিস্তানেও গ্ৰুপ পৰ্যায়ত যথেষ্ট শক্তি দেখুৱাই শেষৰ চাৰিটাত প্ৰৱেশ কৰিবলৈ সক্ষম হয়। চীনৰ টাইপেইক ১৫-১, থাইলেণ্ড ৯-০ আৰু জাপানক ৩-২ গ’লত পৰাস্ত কৰে।

আনকি ছেমি ফাইনেলতো ভাৰত আৰু পাকিস্তানে কঠোৰ যুঁজৰ সন্মুখীন হ’বলগীয়া হোৱা নাছিল। ছেমি ফাইনেলৰ যুঁজত ভাৰতৰ ২১ বছৰ অনুৰ্ধ হকী দলে দক্ষিণ কোৰিয়াক ৯-১ গ’লত পৰাস্ত কৰে। মালয়েছিয়াৰ বিৰুদ্ধে পাকিস্তানে ৬-২ গ’লত জয়লাভ কৰে।

লগতে পঢ়ক: জোনমণি ৰাভাৰ ৰহস্যজনক মৃত্যুৰ ঘটনাই আৰক্ষীৰ অপৰাধীকৰণৰ ছবিখন স্পষ্ট কৰিলে: ডি ৱাই এফ আই

ফাইনেললৈকে ভাৰতে ৫খন খেলত ৪৮টা গ’ল দিয়ে। ভাৰতৰ বিৰুদ্ধে হৈছে ৩টা গ’ল। আনহাতে, পাকিস্তানে একে সংখ্যক খেলত ৩৪টা গ’ল দিয়ে। দলটোৱে ৬টা গ’ল খায়।