খেলখনৰ শেষ বলটোৰ পাছতে খেলপথাৰত শুই পৰিল ৰোহিত শৰ্মা। হাৰ্দিক পাণ্ডিয়াৰ চকুত চকুপানীৰ ঢল। বাৰ্বাডোছত ষ্টেডিয়ামৰ পৰা মাত্ৰ এটা ধ্বনি ওলাই আহিল, ছক ডে ইণ্ডিয়া। ৰুদ্ধশ্বাস মেচত ভাৰতৰ বিশ্ব জয়। অৱশেষত সেই মুহূৰ্তটো আহিল। ১১ বছৰীয়া অপেক্ষাৰ অন্ত পৰিল। দক্ষিণ আফ্ৰিকাক পৰাস্ত কৰি ভাৰতে টী-২০ বিশ্বকাপ জয় কৰিলে।
শনিবাৰে বাৰ্বাডোছৰ কেনচিংটন অ’ভেলত ৭ ৰানত জয়লাভ কৰে ৰোহিতে। শেষৰ অভাৰত ১৬ ৰানৰ প্ৰয়োজন হৈছিল।হাৰ্দিক পাণ্ডিয়াৰ বলত বাউণ্ডেৰী লাইনত সূৰ্যকুমাৰ যাদৱৰ দুৰ্ধৰ্ষ কেচ। নিঃসন্দেহে বগা বল ক্ৰিকেটৰ অন্যতম শ্ৰেষ্ঠ কেচ। মিছ কৰিলেই ছয়। সকলোকে আচৰিত কৰি তুলি কেচ হাতত বন্দী কৰিলে সূৰ্য্যই। তাতেই পকেটত সোমাল মেচ।
হাৰ্দিক পাণ্ডিয়াই পার্থক্য গঢ়িলে। প্রায় পৰাজয়ৰ মুখৰ পৰা তেওঁ দেশক জয়ী কৰিলে৷ হাইনৰিখ ক্লাচেন আৰু ডেভিদ মিলাৰৰ দুটা গুৰুত্বপূৰ্ণ উইকেট দখল কৰি হাৰ্দিকে ভাৰতৰ বিশ্বকাপ জয় নিশ্চিত কৰে। খেলখনৰ সৰ্বোচ্চ ৰান বিৰাট কোহলিৰ। তেওঁ ৫৯টা বলত ৭৬ ৰান সংগ্ৰহ কৰে। বাৰ্বাডোছত এখন উপভোগ্য ফাইনেল। য’ত ক্ৰিকেটৰ জয় হ’ল।
২০১৩ চনৰ পিছত ভাৰতৰ প্ৰথমটো আইচিচি ট্ৰফী জয়। ২০১১ চনৰ পিছত প্ৰথম বিশ্বকাপ। ধোনিৰ পিছত ৰোহিতৰ নেতৃত্বত বিশ্ব চেম্পিয়নশ্বিপ লাভ কৰিলে। ভাৰতৰ মুঠ চাৰিবাৰ। দুবাৰ এদিনীয়া বিশ্বকাপ, টী-২০ বিশ্বকাপ দুবাৰ। ২০০৭ চনত অনুষ্ঠিত হোৱা উদ্বোধনী টী-২০ বিশ্বকাপৰ পিছত পুনৰ চেম্পিয়ন হৈছে টীম ইণ্ডিয়া।
অপৰাজিত চেম্পিয়ন হিচাপে নতুন অভিলেখ গঢ়িলে ৰোহিত বাহিনীয়ে। ঠিক সাত মাহ দহ দিন পূৰ্বে আহমেদাবাদৰ নৰেন্দ্ৰ মোডী ষ্টেডিয়ামত স্বপ্নভংগৰ নিশাটোৰ যন্ত্ৰণাৰ উপশম ঘটিল ৰোহিত শৰ্মা, বিৰাট কোহলীৰ দলটোৰ। অৱশেষত সুদূৰ কেৰিবিয়ান দ্বীপপুঞ্জত সপোনটো বাস্তৱায়িত হ’ল। যোৱা কেইবছৰমানৰ পৰা ৰোহিতে দলটোক যিদৰে নেতৃত্ব দিছে, আইচিচিৰ ট্ৰফীৰ যোগ্য আছিল। হিটমেন কেৱল অধিনায়কৰ খিতাপতে সীমাবদ্ধ নহয়। তাৰ ওপৰতো তেওঁ এজন যোগ্য ‘নেতা’ হৈ পৰিছে। প্ৰাপ্য স্বীকৃতি লাভ কৰিলে।
অৱশেষত বিদায় বেলাত ৰাহুল দ্ৰাবিড়ে বিশ্বকাপ জয় কৰিলে। ৰোহিত-বিৰাটৰ যুটিৰ বাবে প্ৰথম বিশ্বকাপ। আহমেদাবাদৰ এই আধৰুৱা সপোন বাৰ্বাডোছত বাস্তৱায়িত হ’ল। প্ৰথমে বেটিং কৰি ভাৰতে ৭টা উইকেট হেৰুৱাই ১৭৬ ৰান সংগ্ৰহ কৰে। ইয়াৰ উত্তৰত দক্ষিণ আফ্ৰিকাই ৮টা উইকেট হেৰুৱাই ১৬৯ ৰানতে ৰৈ যায়। মেন অৱ দ্য মেচ বিৰাট কোহলি।
‘ভিনটেজ’ বিৰাট কোহলি ফাইনেল জয়ৰ অন্যতম নেতা। তেওঁ বেটেৰে দুয়োটা দলৰ মাজত পাৰ্থক্য আনিলে। তেওঁ ৫৯টা বলত ৭৬ ৰান সংগ্ৰহ কৰে। ইনিংছত ২টা ছয়, ৬টা চাৰি। গোটেই বিশ্বকাপত তেওঁৰ ৰান নোপোৱা আৰু বেটিং পজিচনক লৈ ব্যাপক চৰ্চা চলিছিল। প্ৰশ্ন উত্থাপন হয় যে তেওঁ অপেন কৰিব লাগে নে নাই। কিন্তু ফাইনেলৰ মঞ্চত বিৰাট প্ৰদৰ্শন দাঙি ধৰিলে কোহলিয়ে। পাৱাৰ প্লে’ত ভাৰতে দ্ৰুতগতিত ৩টা উইকেট হেৰুওৱাৰ পিছত পুৰণি কোহলিক বিচাৰি পালে। সাৱধানে ইনিংছ খেলিলে। কোনো ৰিস্ক লোৱা নাছিল। উইকেটৰ মাজত দৌৰাত গুৰুত্ব দিলে।
কোহলিয়ে অক্ষৰ পেটেলক উইকেটৰ সিটো মূৰত খেলিবলৈ সুয়োগ দিলে। ভাৰতক পুনৰ মেচলৈ অনাৰ বাবে ভাৰতীয় অল ৰাউণ্ডাৰগৰাকী কৃতিত্বৰ যোগ্য। বিৰাটৰ পৰা চাপ তুলি লৈছিল। ছুপাৰষ্টাৰগৰাকীক নিজৰ গতিৰে খেলিবলৈ দিলে। কোহলি-অক্ষৰৰ যুটিয়ে চতুৰ্থ উইকেটত ৭২ ৰান সংযোজন কৰে। অক্ষৰে ৩১টা বলত ৪৭ ৰান সংগ্ৰহ কৰে। ইনিংছত ৪টা ছয়, ১টা চাৰি।
ভাৰতে ৪.৩ অভাৰত ৩৪ ৰানত ৩ উইকেট হেৰুৱায়। ৰোহিতে ৰান নাপালে। মাত্ৰ ৯টা বলত তেওঁ আউট হয়। ঋষভ পন্ত (০) আৰু সূৰ্যকুমাৰ যাদৱে (৩) দায়িত্বহীনতা প্ৰদৰ্শন কৰে। দুয়োজনে বিসৰ্জন দিলে উইকেট। শেষত শিৱম ডুবেই ১৬টা বলত গুৰুত্বপূৰ্ণ ২৭ ৰান সংযোজন কৰে। ভাৰতে ২০ অভাৰত ৭ উইকেটত ১৭৬ ৰান সংগ্ৰহ কৰে।
ইয়াৰ প্ৰত্যুত্তৰত বেটিং আৰম্ভ কৰিয়েই দক্ষিণ আফ্ৰিকাই উজুটি খায়। মাত্ৰ ১২ ৰানত দুটা উইকেট হেৰুৱালে। উভতি যায় ৰেজা হেণ্ড্ৰিক্স (৪), আইডেন মাৰ্ক্ৰাম (৪)। ট্ৰিষ্টান ষ্টাবছৰ সৈতে তৃতীয় উইকেটত কুইণ্টন ডি ককে ৫৮ ৰান সংগ্ৰহ কৰে। ২১টা বলত ৩১ ৰান কৰি আউট হয় ষ্টাবছ। ডি’ককে এটা দিশ ধৰি ৰাখে। উইকেটৰ আনটো মূৰত ৰুদ্ৰমূৰ্তি ধৰিলে হেইনৰিক ক্লাচেনে। ডি কক, ক্লাচেনে বেট কৰাৰ সময়ত ভাৰত বেকফুটত গুচি যায়। এটা সময়ত এনে লাগিছিল যেন মেচখন ভাৰতৰ হাতৰ পৰা ওলাই গ’ল। ক্লাচেনে দুৰ্দান্ত খেলিছিল।
বল আৰু ৰান প্ৰায় সমান সমান আছিল। উইকেটত ক্লাচেন থকালৈকে ভাৱ হৈছিল যে মেচখন ভাৰতৰ হাতৰ পৰা পিছলি গ’ল। কিন্তু ক্লাচেন আউট হোৱাৰ লগে লগে ভাৰত মেচলৈ ঘূৰি আহিল। ৰোহিত বাহিনীক পুনৰ মেচলৈ ঘুৰাই আনে হাৰ্দিকে। ক্লাচেনে ৫টা ছয় আৰু ২টা চাৰিৰ সহায়ত ২৭টা বলত ৫২ ৰান সংগ্ৰহ কৰি আউট হয়। উইকেটৰ পিছফালে হাৰ্দিকৰ বলত কেচ ধৰে পণ্টে।
এয়াই মেচখনৰ টাৰ্নিং পইণ্ট। ডেভিদ মিলাৰে দলটোক বিজয় আনি দিব নোৱাৰিলে। শেষৰ অভাৰত ব্যক্তিগত ২১ ৰান সংগ্ৰহ কৰি ঘূৰি আহিছিল কিলাৰ মিলাৰ। এক অভাৰত অক্ষৰে দিয়া ২৩ ৰানে ভাৰতক বেকফুটলৈ ঠেলি দিছিল। কিন্তু বুমৰাহ, হাৰ্দিক, অৰ্শদীপে দলটোক জয় আনি দিলে।
