১৩ হাজাৰ কোটি টকাৰ ব্যয়! আগন্তুক লোকপিয়লত দেশবাসীয়ে মুখামুখি হ’ব ছটা নতুন প্ৰশ্নৰ

কেন্দ্ৰীয় গৃহ মন্ত্ৰালয়ে সোমবাৰে জাৰি কৰা গেজেট অধিসূচনাৰ জৰিয়তে ঘোষণা কৰিছে যে দেশজুৰি লোকপিয়ল দুটা পৰ্যায়ত অনুষ্ঠিত হ’ব। প্ৰথম পৰ্যায়ৰ কাম ২০২৬ চনৰ ১ অক্টোবৰৰ পৰা আৰম্ভ হ’ব, য’ত হিমাচল প্ৰদেশ, উত্তৰাখণ্ড, জম্মু-কাশ্মীৰ আৰু লাডাখক অন্তর্ভুক্ত কৰা হৈছে। দ্বিতীয় পৰ্যায় ২০২৭ চনৰ ১ মাৰ্চৰ পৰা আৰম্ভ হ’ব, য’ত দেশৰ বাকী সকলো ৰাজ্য লোকপিয়ল প্ৰক্ৰিয়াত অন্তৰ্ভুক্ত হ’ব।

চৰকাৰী সূত্ৰৰ মতে, এইবাৰ লোকপিয়লৰ সম্পূৰ্ণ প্ৰক্ৰিয়াটোৰ খৰচ হ’ব প্ৰায় ১৩ হাজাৰ কোটি টকা। লোকপিয়লৰ বাবে নিযুক্ত কৰা হ’ব প্ৰায় ৩৪ লাখ গণনাকাৰী আৰু তত্বাৱধায়ক, লগতে প্ৰায় ১ লাখ ৩০ হাজাৰ লোকপিয়ল বিষয়া।

এইবাৰৰ লোকপিয়লত ছটা নতুন প্ৰশ্ন সংযোজন কৰা হৈছে, যেনে—

• ঘৰত ইণ্টাৰনেট সংযোগ আছে নে নাই?
• এটা ঘৰত কিমানটা মোবাইল ফোন আছে আৰু মোবাইলৰ মালিক কোন?
• ৰন্ধা-বঢ়াৰ বাবে গেছ সংযোগ আছে নেকি? যদি থাকে, তেন্তে সেইটো কেনেধৰণৰ?
• খোৱাপানীৰ উৎস কি?
• ঘৰত বাহন আছে নেকি? থাকিলে সেইটো কেনেধৰণৰ?
• শস্যৰ ধৰণ কেনে ব্যৱহৃত হয়?

ইয়াৰ উপৰিও, এইবাৰ লোকপিয়লৰ লগত জাতি জনগণনাও অন্তৰ্ভুক্ত কৰা হৈছে। এই বিষয়টোৰ বাবে বিৰোধী দল বিশেষকৈ কংগ্ৰেছে বহুদিন ধৰি দাবী উত্থাপন কৰি আহিছিল। ৰাহুল গান্ধীয়ে বহু সময় ধৰি জাতি লোকপিয়লৰ বাবে দাবী জনাই আহিছে। কেন্দ্ৰই যোৱা মাহত ঘোষিত কৰিছিল যে লোকপিয়লৰ সমান্তৰালকৈ জাতি-সম্প্ৰদায় সম্পৰ্কীয় তথ্যো সংগ্ৰহ কৰা হ’ব।

এইবাৰ লোকপিয়লত তিনিটা মূল দিশত তথ্য সংগ্ৰহ কৰা হ’ব—

• এটা ঘৰত কিমান মানুহ থাকে,
• বাসগৃহৰ সংখ্যা,
• এটা বাসগৃহত কিমান লোক বাস কৰে।

এই দিশবোৰৰ লগত জাতিগত, অৰ্থনৈতিক আৰু সামাজিক তথ্যো যুক্ত থাকিব। বিশেষজ্ঞসকলৰ মতে, প্ৰশ্নৰ সংখ্যা বৃদ্ধি হোৱাৰ বাবে সমগ্ৰ প্ৰক্ৰিয়াটো আগৰ লোকপিয়লবোৰতকৈ দীঘলীয়া আৰু ব্যয়বহুল হ’ব।

উল্লেখযোগ্য যে, ২০১১ চনত ভাৰতে শেষবাৰ লোকপিয়ল কৰিছিল। তাৰ পাছত ২০২১ চনৰ বাবে লোকপিয়ল নিৰ্ধাৰিত আছিল, কিন্তু ক’ভিড-১৯ মহামাৰীৰ বাবে সেই প্ৰক্ৰিয়া স্থগিত ৰখা হৈছিল। এতিয়া কেন্দ্ৰীয় চৰকাৰে এই নতুন অধিসূচনাৰ জৰিয়তে পুনৰ লোকপিয়ল আৰম্ভ কৰাৰ ঘোষণা কৰিছে।