আমেৰিকা আৰু চীনৰ শুল্ক যুদ্ধত ভাৰতো জড়িত হৈ আছে। ভাৰতীয় ঔষধ কোম্পানীসমূহে বেইজিংক অতিক্ৰম কৰি বিশ্বব্যাপী বাণিজ্য সম্প্ৰসাৰণৰ পথত অগ্ৰহৰ হৈছে। ভাৰতীয় কেইবাটাও কোম্পানীয়ে বিদেশী কোম্পানীৰ সহযোগত ঔষধ প্ৰস্তুত প্ৰক্ৰিয়া আৰম্ভ কৰিছে। এনে পৰিস্থিতত চীনা বজাৰত ঔষধ ৰপ্তানিৰ ক্ষেত্ৰত বৃহৎ লোকচানৰ সন্মুখীন হ’ব পাৰে।
ইকনমিক টাইমছে প্ৰকাশ কৰা এক প্ৰতিবেদন অনুসৰি চুভেন ফাৰ্মাচিউটিকেলছ, জিংজিং ইণ্টাৰনেশ্যনেল, অৰিজিন ফাৰ্মাচিউটিকেলছৰ দৰে ভাৰতীয় কোম্পানীয়ে আমেৰিকা আৰু ইউৰোপীয় দেশসমূহত নিজৰ ব্যৱসায় ব্যাপকভাৱে সম্প্ৰসাৰণৰ দিশত আগবাঢ়িছে। চীনৰ ওপৰত পশ্চিমীয়া দেশসমূহৰ নিৰ্ভৰশীলতা হ্ৰাস কৰি ভাৰতৰ আধিপত্য বৃদ্ধি কৰাৰ লক্ষ্যৰে এই দিশত অগ্ৰসৰ হৈছে।
জানিব পৰা মতে ভাৰতীয় কোম্পানী সুভেনে আমেৰিকাৰ এন জে বায়’ ইনক নামৰ এটা ঔষধ কোম্পানীত বৃহৎ অংশীদাৰিত্ব ক্ৰয় কৰিছে। গৱেষণাৰ উপৰিও কোম্পানীটোৱে কেন্সাৰ চিকিৎসাৰ বাবে ঔষধ প্ৰস্তুত কৰে। ভাৰতীয় কোম্পানীটোৱে এই বিদেশী কোম্পানীটোত ৬৫ মিলিয়ন ডলাৰ বিনিয়োগ কৰিছে বুলি জানিব পৰা গৈছে।
তেওঁলোকে আমেৰিকাৰ বাল্টিমোৰত অৱস্থিত ইমাৰ্জেণ্ট বায়’ ছলিউচনছ নামৰ এটা কোম্পানীক ৩৬.৫ মিলিয়ন ডলাৰত ক্ৰয় কৰিছিল। সেই বিদেশী কোম্পানীটোৱে প্ৰটিন সম্পৰ্কীয় আৰু জিন সম্পৰ্কীয় ৰোগৰ ঔষধ প্ৰস্তুত কৰে। কেৱল সেয়াই নহয়, ভাৰতৰ কেইবাটাও সৰু-বৰ ঔষধ কোম্পানীয়ে পশ্চিমীয়া দেশসমূহৰ বৃহৎ ঔষধ কোম্পানীসমূহৰ সৈতে হাতে হাত ধৰি কাম কৰিবলৈ আৰম্ভ কৰিছে। আমেৰিকা আৰু ইউৰোপত ভাৰতে খোপনি পুতিবলৈ আৰম্ভ কৰিছে। ইউৰোপেও ভাৰতীয় কোম্পানীসমূহৰ সৈতে হাত মিলাই শুল্ক বাধা অতিক্ৰম কৰিব বিচাৰিছে। বিদেশত ভাৰতীয় ঔষধ কোম্পানীসমূহৰ আধিপত্যৰ আঁৰত আছে আমেৰিকা আৰু চীনৰ মাজত চলি থকা শুল্ক যুদ্ধ ।
মন কৰিবলগীয়া যে কিছুদিন পূৰ্বে আমেৰিকাই চীনৰ সামগ্ৰীৰ ওপৰত ২০০ শতাংশতকৈ অধিক শুল্ক আৰোপ কৰিছিল। যদিও শেহতীয়াকৈ শুল্কৰ ওপৰত ৩০ দিনৰ বাবে স্থগিত ৰখা হৈছিল, তথাপিও দুয়োখন দেশৰ মাজত সৃষ্টি হোৱা উত্তেজনাৰ প্ৰতি আমেৰিকা আৰু ইউৰোপৰ ঔষধ কোম্পানীসমূহে সতৰ্ক হৈ পৰিছে। দীৰ্ঘদিনীয়া পৰম্পৰাগত যোগান শৃংখল সলনি কৰি চীনৰ ওপৰত নিৰ্ভৰশীলতা হ্ৰাস কৰাৰ বাবে তেওঁলোকে কাম কৰি আহিছে। আৰু ভাৰতে এই সুযোগ গ্ৰহণ কৰিছে।
ইফালে, আমেৰিকাৰ ৰাষ্ট্ৰপতি ড’নাল্ড ট্ৰাম্পে দেশখনৰ ঔষধ কোম্পানীসমূহক ৩০ দিনৰ ভিতৰত ঔষধৰ মূল্য হ্ৰাস কৰিবলৈ নিৰ্দেশ দিছে। এই পৰিস্থিতিত চীনৰ সৈতে অংশীদাৰিত্বৰে মূল্য হ্ৰাস কৰা আৰু শুল্কৰ বোজা কান্ধত বহন কৰাটো আমেৰিকাৰ কোম্পানীসমূহৰ বাবে অতি কঠিন হৈ পৰাত ঔষধ নিৰ্মাণৰ ক্ষেত্ৰত ভাৰতক অগ্ৰাধিকাৰ দিছে কোম্পানীসমূহে। যাতে গৱেষণা আৰু উৎপাদনৰ খৰচ কম কৰিব পৰা যায়।
