ভাৰতৰ কোভিড-১৯ ভেকচিনৰ ৰপ্তানি সন্দৰ্ভত আজি সংসদত তথ্য দাঙি ধৰে বাণিজ্য আৰু উদ্যোগ মন্ত্ৰী পিযুষ গোৱেলে।
ভাৰতে ৮ ফেব্ৰুৱাৰি পৰ্যন্ত প্ৰায় ৩৩৮ কোটি টকাৰ কোভিড ভেকচিন অন্য দেশসমূহলৈ ৰপ্তানি কৰিছে বুলি গোৱেলে সংসদত উল্লেখ কৰে।
ভাৰত চৰকাৰে অনুমতি প্ৰদান কৰাৰ পাছত চেৰাম ইষ্টিটিউট আৰু অক্সফোৰ্ডে প্ৰস্তুত কৰি উলিওৱা কোভিশ্বিল্ড ভেকচিনৰ প্ৰায় ৬২.৭ লাখ ভেকচিন ভাৰতে বিনামূলীয়াভাৱে অন্য দেশলৈ ৰপ্তানি কৰিছে।
আনহাতে, মূল্যৰ বিনিময়ত ১.০৫ কোটি কোভিড ভেকচিন ভাৰতে অন্য দেশলৈ ৰপ্তানি কৰিছে।
উল্লেখযোগ্য যে, ভাৰতে নেপাল, ভূটান, শ্ৰীলংকা, আফগানিস্তান, বাংলাদেশকে আদি কৰি আফ্ৰিকা আৰু অন্যান্য কিছুসংখ্যক দেশলৈ বিনামূলীয়াভাৱে কোভিড ভেকচিন আগবঢ়াইছিল।
ইতিমধ্যে বিশ্ব স্বাস্থ্য সংস্থাই ভাৰতৰ কোভিড ভেকচিন প্ৰস্তুত কৰিব পৰা ক্ষমতাক সমগ্ৰ বিশ্বৰ বাবে এক সম্পদ হিচাপে অভিহিত কৰিছে।
