ভাৰতীয় মহাকাশ গৱেষণা সংস্থাই আজি দুপৰীয়া ২ বাজি ৪৩ মিনিটত শ্ৰহৰি কোটাৰ সতীশ ধাৱান স্পেছ চেণ্টাৰৰ পৰা ভাৰতৰ দ্বিতীয় চন্দ্ৰলৈ অভিযান ‘চন্দ্ৰযান-২’ সফলভাৱে উক্ষেপণ কৰে।
‘ইছৰো’ৰ দ্বাৰা সফলভাৱে আৰম্ভ হোৱা চন্দ্ৰযান-২ মিছনত উপদেষ্টা সঞ্চালক হিচাপে জড়িত হৈ আছে অসমৰ মহাকাশ বিজ্ঞানী ড০ জিতেন্দ্ৰ নাথ গোস্বামী। গোস্বামী ভাৰতৰ মংগল অভিযানৰ লগতো জড়িত হৈ আছিল।
শ্ৰীহৰি কোটা স্পেছ চেণ্টাৰৰ পৰা ‘বাহুবলী’ নামাকৰণ কৰা GSLV-MkIII-M1 ৰকেটৰ সহায়ত চন্দ্ৰযান-২ পৃথিৱীৰ কক্ষপথলৈ উক্ষেপণ কৰা হয়।
ভাৰতীয় মহাকাশ গৱেষণা সংস্থাই উক্ষেপণ কৰা চন্দ্ৰযান-২ খনে প্ৰায় ৩,৮৪,৪০০০ কিলোমিটাৰ দূৰত্ব অতিক্ৰম কৰি চন্দ্ৰৰ দক্ষিণ প্ৰান্তত প্ৰৱেশ কৰিব।
চন্দ্ৰযান-২য়ে চন্দ্ৰৰ দক্ষিণ প্ৰান্তত প্ৰৱেশ কৰাৰ লগে লগে চন্দ্ৰৰ দক্ষিণ প্ৰান্তলৈ অভিযান চলোৱা ভাৰত বিশ্বৰ প্ৰথমখন দেশত পৰিণত হ’ব।
চন্দ্ৰযান-২ য়ে ৭ ছেপ্তেম্বৰত সফলভাৱে চন্দ্ৰপৃষ্ঠত অৱতৰণ কৰিব বুলি আশাপ্ৰকাশ কৰিছে ভাৰতীয় মহাকাশ বিজ্ঞানীসকলে। ‘চন্দ্ৰযান-২’ৰ সফল উৎক্ষেপণৰ পাছতে ভাৰতীয় মহাকাশ গৱেষণা সংস্থাৰ অধ্যক্ষ কে শিৱমে এই সফলতাৰ বাবে তেওঁলোক অত্যন্ত সুখী বুলি মত প্ৰকাশ কৰে।
ভাৰতৰ দ্বিতীয় চন্দ্ৰ অভিযানত মুঠ ব্যয় হৈছে ৯৭৮ টকা যিটো বৰ্তমানলৈ আটাইতকৈ কম খৰছি চন্দ্ৰ অভিযান হিচাপে পৰিগণিত হৈছে। ২০০৮ চনত ভাৰতে প্ৰথমবাৰ চন্দ্ৰলৈ সফলভাৱে অভিযান চলাইছিল।
ভাৰতৰ ৰাষ্ট্ৰপতি ৰামনাথ কোৱিন্দ, প্ৰধান মন্ত্ৰী নৰেন্দ্ৰ মোদীকে ধৰি সকলো স্তৰৰ ব্যক্তিয়ে ভাৰতীয় মহাকাশ গৱেষণা সংস্থাৰ সফলতাৰ বাবে বিজ্ঞানীসকলক ধন্যবাদ জ্ঞাপন কৰিছে।
