ভাৰতীয় ক্ৰিকেট নিয়ন্ত্ৰণ ব’ৰ্ডে (বিচিচিআই) আজি আগন্তুক শ্ৰীলংকা ভাৰত ভ্ৰমণৰ সময়সূচী সলনি কৰাৰ কথা ঘোষণা কৰে।
পূৰ্বৰ সময়সূচী অনুসৰি প্ৰথমে দুখন টেষ্টৰ শৃংখলাৰ পিছত তিনিখন খেলৰ টি-২০ শৃংখলা অনুষ্ঠিত হোৱাৰ কথা আছিল। কিন্তু নতুন সময়সূচী অনুসৰি এতিয়া প্ৰথমে টি-২০ শৃংখলাৰ পিছতহে টেষ্ট শৃংখলা অনুষ্ঠিত হ’ব।
তদুপৰি পূৰ্বৰ সময়সূচী অনুসৰি ২৫ ফেব্ৰুৱাৰীৰ পৰা আৰম্ভ হ’বলগীয়া এই শৃংখলা এতিয়া ২৪ ফেব্ৰুৱাৰীৰ পৰা আৰম্ভ হ’ব।
বিচিচিআইৰ এক অফিচিয়েল বিজ্ঞপ্তিত কোৱা হৈছে, “শ্ৰীলংকাই প্ৰথমে তিনিখন মেচৰ টি-২০ শৃংখলা খেলিব আৰু তাৰ পিছত দুখন মেচৰ টেষ্ট শৃংখলা অনুষ্ঠিত হ’ব। এই টেষ্ট শৃংখলা আইচিচি বিশ্ব টেষ্ট চেম্পিয়নশ্বিপ, ২০২১-২৩ৰ অংশ হ’ব।”
🚨 NEWS 🚨: BCCI announces a change in schedule for the upcoming @Paytm Sri Lanka Tour of India. #INDvSL #TeamIndia
More Details 🔽
— BCCI (@BCCI) February 15, 2022
লক্ষ্ণৌত প্ৰথম খন টি-২০ অনুষ্ঠিত হোৱাৰ বিপৰীতে শৃংখলাৰ পৰৱৰ্তী দুখন টি-২০ ধৰ্মশালাত অনুষ্ঠিত হ’ব।
সেইদৰে নতুন সময়সূচী অনুসৰি প্ৰথম খন টেষ্ট এতিয়া ৪ মাৰ্চৰ পৰা ৮ তাৰিখলৈ ম’হালিত অনুষ্ঠিত হ’ব আৰু দ্বিতীয় খন টেষ্ট ১২ মাৰ্চৰ পৰা ১৬ মাৰ্চলৈ বেংগালুৰুত অনুষ্ঠিত হ’ব।
উল্লেখ্য যে, ভাৰতীয় টেষ্ট দলৰ অধিনায়ক পদৰ পৰা বিৰাট কোহলীয়ে পদত্যাগ কৰাৰ পিছত বিচিচিআই- এ এই পৰ্যন্ত দলৰ অধিনায়কৰ নাম ঘোষণা কৰা নাই।
অৱশ্যে নতুন অধিনায়ক হিচাপে ভাৰতৰ সীমিত অভাৰৰ দলৰ অধিনায়ক ৰোহিত শৰ্মাৰ নামেই চৰ্চিত হৈছে।
