অষ্ট্ৰেলিয়াত চলি থকা মহিলা টি-২০ বিশ্বকাপৰ আজি অনুষ্ঠিত হোৱা এখন খেলত ভাৰতে শ্ৰীলংকাক ৭ উইকেটত সহজে পৰাস্ত কৰে।
ইতিমধ্যে ছেমিফাইনেলত স্থান সুৰক্ষিত কৰা হৰমনপ্ৰীত কৌৰ নেতৃত্বাধীন ভাৰতীয় মহিলা ক্ৰিকেট দলটোৱে এই বিজয়ৰ লগে লগে প্ৰতিযোগিতাখনত বৰ্তমানলৈ আটাইকেইখন খেলত বিজয় সাব্যস্ত কৰাৰ লগতে নিজৰ গ্ৰুপত শীৰ্ষস্থান দখল কৰে।
আজি অনুষ্ঠিত হোৱা খেলখনত প্ৰথমে বেটিং কৰিবলৈ অহা শ্ৰীলংকাক ভাৰতে নিয়ন্ত্ৰিত বলিঙেৰে মাত্ৰ ১১৩ ৰানত নিজৰ ইনিংছ সামৰিবলৈ বাধ্য কৰায়।
ভাৰতীয় দলৰ সুন্দৰ বলিঙৰ সন্মুখত শ্ৰীলংকাই নিৰ্ধাৰিত ২০ অভাৰত ৯ টা উইকেট হেৰুৱাই মাত্ৰ ১১৩ ৰানহে কৰিবলৈ সক্ষম হয়।
ভাৰতৰ হৈ স্পীনাৰ ৰাধা যাদৱে কেৰিয়াৰৰ শ্ৰেষ্ঠ প্ৰদৰ্শন দাঙি ধৰি মাত্ৰ ২৩ ৰানৰ বিনিময়ত ৪ টা উইকেট দখল কৰাৰ লগতে ৰাজেশ্বৰী গাইকোৱাডে দুটা আৰু শিখা পাণ্ডে, দিপ্তী শৰ্মাই এটাকৈ উইকেট দখল কৰে।
আনহাতে, শ্ৰীলংকাই বান্ধি দিয়া ১১৪ ৰানৰ বিজয় লক্ষ্য আগত ৰাখি ভাৰতে যুৱ তাৰকা অপেনাৰ চেফালি বাৰ্মাৰ বিস্ফোৰক ৪৬ ৰানৰ সহায়ত ৩ টা উইকেট হেৰুৱাই নিৰ্ধাৰিত বিজয় লক্ষ্য উপনীত হয়।
ৰান আউটৰ বাবে চেফালিয়ে নিজৰ অৰ্ধশতৰাণৰ পৰা বঞ্চিত হয় যদিও দলৰ বিজয়ত গুৰুত্বপূৰ্ণ ভূমিকা আগবঢ়াবলৈ সক্ষম হয়।
চেফালিৰ উপৰিও স্মৃতি মন্ধনাই ১৭, অধিনায়ক হৰমনপ্ৰীত কৌৰ, জেমিমাহ ৰোড্ৰিগেজ আৰু দীপ্তি শৰ্মাই ১৫ ৰানকৈ বৰঙনি যোগায়।
