জম্মুৰ সমীপত পাক সেনাৰ শিবিৰ আৰু সন্ত্ৰাসবাদীৰ লঞ্চ পেড ধ্বংস কৰিলে ভাৰতে
জম্মুৰ সমীপত পাকিস্তানী সেনাৰ এটা শিবিৰ ধ্বংস কৰিছে ভাৰতে। পাকিস্তান অধিকৃত জম্মু-কাশ্মীৰৰ সেই অঞ্চলসমূহত সন্ত্ৰাসবাদীৰ লঞ্চ পেডো ধ্বংস কৰা হৈছে। অভিযোগ কৰা হৈছে যে সেই সকলোবোৰ পাকিস্তানী সেনা শিবিৰৰ পৰা টিউব ড্ৰ’ন নিক্ষেপ কৰা হৈছিল।
প্ৰতিৰক্ষা মন্ত্ৰালয়ৰ সূত্ৰৰ উদ্ধৃতি দি সংবাদ সংস্থা এএনআইয়ে এই কথা প্ৰকাশ কৰিছে। একে সময়তে শুকুৰবাৰে নিশা কমেও চাৰিটা পাকিস্তানী সেনাৰ বিমান ঘাটিত আক্ৰমণ চলোৱাৰ খবৰ পোৱা গৈছে।
পেহেলগামত সংঘটিত সন্ত্ৰাসবাদী আক্ৰমণৰ প্ৰতি সঁহাৰি জনাই ভাৰতে আৰম্ভ কৰে অপাৰেচন সিন্দুৰ। এই অভিযানত ভাৰতে পাকিস্তান আৰু পাকিস্তান অধিকৃত কাশ্মীৰত প্ৰৱেশ কৰি সন্ত্ৰাসবাদী ঘাটি ধ্বংস কৰে। তেতিয়াৰ পৰাই পাকিস্তানী সেনাই নিয়ন্ত্ৰণ ৰেখাত প্ৰচণ্ড গুলীবৰ্ষণ কৰি আহিছে। ড্ৰোন ব্যৱহাৰ কৰি আক্ৰমণৰ চেষ্টাও কৰিছে। কিন্তু পাকিস্তানে প্ৰেৰণ কৰা অধিকাংশ ড্ৰ’ন ভাৰতৰ শক্তিশালী বায়ু প্ৰতিৰক্ষা ব্যৱস্থাই ধ্বংস কৰিছে।
ভাৰতৰ প্ৰতিৰক্ষা মন্ত্ৰালয়ে এক বিবৃতিত কয় যে পাকিস্তানী ড্ৰ’নে আন্তঃৰাষ্ট্ৰীয় সীমান্ত আৰু নিয়ন্ত্ৰণ ৰেখাৰ ২৬টা অঞ্চলত প্ৰৱেশ কৰিবলৈ চেষ্টা কৰিছিল। ইয়াৰ ভিতৰত জম্মু-কাশ্মীৰ, পঞ্জাৱ আৰু ৰাজস্থানৰ কেইবাটাও অঞ্চল অন্তৰ্ভুক্ত।
সীমান্তত বসবাস কৰা সাধাৰণ নাগৰিকৰ ওপৰতো পাকিস্তানী সেনাই আক্ৰমণ চলাইছে বুলি বাতৰি প্ৰকাশ পাইছে। কাশ্মীৰৰ কেইবাঠাইতো বিস্ফোৰণৰ শব্দও শুনা যায়। শনিবাৰে পুৱা উধমপুৰৰ দিবৱাৰ অঞ্চলৰ পৰাও ধোঁৱা ওলোৱা দেখা গৈছিল। ৰাজৌৰী খণ্ডৰ কেইবাটাও ঘৰ-দুৱাৰ আৰু সা-সম্পত্তিৰ ক্ষতি হোৱাৰ খবৰ পোৱা গৈছে। ইয়াৰ উপৰিও পঞ্জাৱৰ জলন্ধৰৰ গ্ৰাম্য অঞ্চলত ড্ৰোন সম্পৰ্কীয় বিস্ফোৰণত এটা ঘৰৰ ব্যাপক ক্ষতিসাধন হয়।