গুৱাহাটীৰ মেয়ৰ মৃগেন শৰনীয়াই শুকুৰবাৰে ঘোষণা কৰে যে ১ জুনৰ পৰা মহানগৰীৰ নিৰ্দিষ্ট পাৰ্কিং স্থানত পাৰ্কিং কৰা দুচকীয়া আৰু তিনিচকীয়া বাহনৰ পৰা কোনো ধৰণৰ পাৰ্কিং মাচুল সংগ্ৰহ কৰা নহ’ব।
উজান বজাৰৰ গুৱাহাটী পৌৰ নিগমৰ কাৰ্যালয়ত আয়োজিত এক সংবাদ মেলৰ সময়ত এই ঘোষণা কৰা হৈছে৷
মেয়ৰগৰাকীয়ে কয়, ‘আমি ১ জুনৰ পৰা দুচকীয়া আৰু তিনিচকীয়া বাহনৰ পৰা কোনো ধৰণৰ পাৰ্কিং মাচুল নোলোৱাৰ সিদ্ধান্ত লৈছো। অৱশ্যে চাৰিচকীয়া বাহনে এতিয়াও পাৰ্কিং মাচুল দিব লাগিব।’
গুৱাহাটী পৌৰ নিগমে বাণিজ্যিক অনুজ্ঞাপত্ৰৰ শ্ৰেণীৰ সংখ্যাও ৭ হাজাৰৰ পৰা মাত্ৰ ১২০টালৈ হ্ৰাস কৰিছে। প্ৰক্ৰিয়াসমূহ সুশৃংখলিত কৰি ক্ষুদ্ৰ ব্যৱসায়ীসকলৰ ওপৰত বোজা হ্ৰাস কৰাৰ লক্ষ্যৰে নতুন অনুজ্ঞাপত্ৰ ব্যৱস্থা শুকুৰবাৰৰ পৰা কাৰ্যকৰী হৈছে ।
সংশোধিত ব্যৱস্থাৰ অধীনত একাধিক ব্যৱসায় চলোৱা ব্যৱসায়ীক একক অনুজ্ঞাপত্ৰৰ অধীনত সামৰি লোৱা হ’ব।
মেয়ৰ মৃগেন শৰনীয়াই কয় যে, ‘জিএমচিৰ অধীনত আমাৰ ৭০০০ বাণিজ্যিক অনুজ্ঞাপত্ৰৰ ব্যৱস্থা আছিল, কিন্তু এতিয়া আমি ইয়াক ১২০লৈ হ্ৰাস কৰিছো। পূৰ্বতে ৭ৰ পৰা ৮টা ব্যৱসায়িক প্ৰতিষ্ঠান থকা লোকসকলে প্ৰতিটোৰ বাবে পৃথক অনুজ্ঞাপত্ৰ লাভ কৰিবলগীয়া হৈছিল। এতিয়া তেওঁলোকৰ সকলো ব্যৱসায়ৰ বাবে এখন অনুজ্ঞাপত্ৰ যথেষ্ট হ’ব।‘
তদুপৰি, ক্ষুদ্ৰ ব্যৱসায়ীসকলৰ নবীকৰণ মাচুল ১৭৫০ টকাৰ পৰা ১০০০ টকালৈ হ্ৰাস কৰা হৈছে। অৱশ্যে বাৰ্ষিক আয় ৫ লাখ টকাৰ তলৰ ব্যৱসায়ীসকলে এতিয়াও ১৭৫০ টকীয়া অনুজ্ঞাপত্ৰ দিব লাগিব।
তেওঁ জনায়, “যদি কোনো ব্যৱসায়িক প্ৰতিষ্ঠানৰ আয় ৫ লাখতকৈ কম হয়, তেন্তে তেওঁলোকে অনুজ্ঞাপত্ৰ লাভ কৰিবলৈ ১৭৫০ টকা দিব লাগিব। যিসকল লোকৰ আয় ৫ লাখৰ পৰা ১০ লাখ টকাৰ ভিতৰত হয় তেতিয়া তেওঁলোকে ২৭০০ টকা দিব লাগিব; ১০-২০ লাখ আয়ৰ স্কেলৰ ভিতৰত ৪৭৫০ টকাত অনুজ্ঞাপত্ৰ লাভ কৰিব পাৰি, আৰু ২০ লাখ টকাৰ ওপৰৰ আয় থকা প্ৰতিষ্ঠানসমূহে অনুজ্ঞাপত্ৰ লাভ কৰিবলৈ ৮,৬৫০ টকা দিব লাগিব।’’
শৰনীয়াই কয় যে ব্যৱসায়িক অনুজ্ঞাপত্ৰৰ অপব্যৱহাৰ আৰু কাৰ্য্যকলাপত যিকোনো অনিয়মৰ বিৰুদ্ধে কঠোৰ ব্যৱস্থা গ্ৰহণ কৰা হ’ব।
আনহাতে, জিএমচিৰ লীজত থকা বজাৰত মহিলা আৰু খিলঞ্জীয়া সম্প্ৰদায়ৰ বিক্ৰেতাসকলক কোনো ধৰণৰ মাচুল আদায় দিয়াৰ পৰা ৰেহাই দিয়াৰ সিদ্ধান্ত গ্ৰহণ কৰিছে নিগমে। শৰনীয়াই জানিবলৈ দিয়ে যে ‘’আমি এই মহিলা বিক্ৰেতাসকলক পৰিচয় পত্ৰ প্ৰদান কৰিম, আৰু সেইবোৰ দেখুৱালে তেওঁলোকক কোনো ধৰণৰ মাচুল দিয়াৰ পৰা ৰেহাই দিয়া হ’ব।‘’
