বিশ্বজুৰি কৰ’নাভাইৰাছৰ আতংকৰ মাজতে বৃদ্ধি পাইছে ভাৰতীয় নমস্কাৰৰ জনপ্ৰিয়তা আৰু গ্ৰহণযোগ্যতা।
আমেৰিকাৰ ৰাষ্ট্ৰপতি ড’নাল্ড ট্ৰাম্পে আয়াৰলেণ্ডৰ প্ৰধান মন্ত্ৰী লিঅ’ ৱাৰদকাৰৰ সৈতে শেহতীয়া সাক্ষাতৰ সময়তো হেণ্ডশ্বেকৰ সলনি বাচি ল’লে নমস্কাৰক।
ইজৰাইলৰ প্ৰধান মন্ত্ৰী বেঞ্জামিন নেতান্যাহুয়েও কিছুদিন পূৰ্বে হেণ্ডশ্বেক এৰি নমস্কাৰক আদৰি ল’বলৈ দেশবাসীক আহ্বান জনাইছিল।
দুয়োজন ৰাষ্ট্ৰনেতাই সংবাদ মাধ্যমৰ সন্মুখত নমস্কাৰ জনাই পৰস্পৰক সম্ভাষণ জনোৱাৰ ছবি বিশ্বজুৰি চৰ্চিত হৈছে।
ভাৰতীয় নমস্কাৰক লৈ ট্ৰাম্পে নিজৰ মন্তব্যও আগবঢ়াইছে। ট্ৰাম্পে ভাৰতীয় আৰু জাপানী সম্ভাষণৰ প্ৰথাক বৰ্তমানৰ সময়তকৈ আগবঢ়া বুলিও মন্তব্য কৰে।
“তেওঁলোক (ভাৰতীয় আৰু জাপানীসকল) বৰ্তমানতকৈ আগবঢ়া,” জাপানীসকলে মূৰ দোঁৱাই জনোৱা সম্ভাষণৰ প্ৰথাও প্ৰদৰ্শন কৰি ট্ৰাম্পৰ মন্তব্য।
ট্ৰাম্পে শেহতীয়া ভাৰত ভ্ৰমণৰ সময়ৰ অভিজ্ঞতাৰ কথাও উল্লেখ কৰিছে।
“মই অলপতে ভাৰতৰ পৰা আহিছো। আৰু মই তাত হেণ্ডশ্বেক কৰা নাই। আৰু এইটো বৰ সহজ, কাৰণ তেওঁলোকে এনেকুৱা কৰে,” নমস্কাৰৰ ভংগী দেখুৱাই ট্ৰাম্পে কয়।
উল্লেখযোগ্য যে আয়াৰলেণ্ডৰ প্ৰধান মন্ত্ৰী লিঅ’ ৱাৰাদকাৰো ভাৰতীয় বংশোদ্ভৱ।
