সংস্থাৰ বিৰুদ্ধে মুখ খুলি মাতিলে নেকি বিপদ! ৰহস্যৰ আৱৰ্তত ভাৰতীয় মূলৰ AI বিশেষজ্ঞৰ মৃত্যু
ভাৰতীয় মূলৰ এ আই বা কৃত্ৰিম বুদ্ধিমত্তা বিশেষজ্ঞৰ ৰহস্যজনকভাৱে মৃত্যু ঘটিছে কেলিফৰ্ণিয়াত। মৃতকৰ নাম সুচিৰ বালাজী। বয়স ২৬ বছৰ। চাৰি বছৰ ধৰি তেওঁ OpenAI সংস্থাৰ সৈতে জড়িত আছিল। কিছুদিনৰ পৰা তেওঁ পূৰ্বৰ সংস্থাটোৰ বিৰুদ্ধে সৰৱ আছিল।
সুচিৰে ছান ফ্ৰান্সিস্কোৰ বুকানান ষ্ট্ৰীটৰ এটা বহুমহলীয়া ঘৰত বাস কৰিছিল। আৰক্ষীয়ে জনোৱা মতে, ২৬ নৱেম্বৰত তাৰ পৰা তেওঁৰ মৃতদেহ উদ্ধাৰ কৰা হৈছিল। শনিবাৰে প্ৰথম পোহৰলৈ আহে এই খবৰ। প্ৰথম অৱস্থাত আৰক্ষীয়ে ইয়াক আত্মহত্যাৰ ঘটনা বুলি অনুমান কৰে।
সুচিৰে কেলিফৰ্ণিয়া বিশ্ববিদ্যালয়ৰ পৰা কম্পিউটাৰ বিজ্ঞানত স্নাতক ডিগ্ৰী লাভ কৰে। ২০১৯ চনত ছেম অল্টমেনৰ সংস্থা ‘অ’পেন এআই’ত ইন্টাৰশ্বিপ কৰে। ২০২০ চনৰ নৱেম্বৰ মাহত তাত যোগদান কৰে। ২০২৪ চনৰ আগষ্ট মাহলৈকে তাত গৱেষক হিচাপে কাম কৰিছিল।
‘Open AI’ ৰ আটাইতকৈ জনপ্ৰিয় এপ্লিকেচনটো হ’ল ChatGPT। টেছলাৰ চিইঅ’ ইলন মাস্ক আৰু ছেম অল্টমেনে যৌথভাৱে ২০১৫ চনত কোম্পানীটো আৰম্ভ কৰিছিল। ২০১৮ চনত মাস্ক তাৰ পৰা ওলাই যায়।
সুচিৰে OpenAIৰ বিৰুদ্ধে সৰৱ হৈছিল। তেওঁ ৰাজহুৱাভাৱে দাবী কৰিছিল যে তেওঁৰ কোম্পানীটোৱে কপিৰাইট আইন উলংঘা কৰিছে। তেওঁ লগতে দাবী কৰে যে ChatGPTৰ দৰে প্ৰযুক্তিয়ে ইণ্টাৰনেটৰ ক্ষতি কৰিছে। মৃত্যুৰ এদিন পূৰ্বে ‘অপেন এআই’ৰ বিৰুদ্ধে দাখিল কৰা গোচৰত সুচিৰৰ নাম আহিছিল।
সংস্থাটোৰ বিৰুদ্ধে মুখ খোলাৰ পিছতে সুচিৰ মৃত্যুক লৈ জল্পনা-কল্পনাৰ সৃষ্টি হৈছে। মাস্কৰ এটা পোষ্টে এই বিতৰ্কক ইন্ধন যোগাইছে। এক্সত তেওঁ সুচিৰ মৃত্যুৰ খবৰ শ্বেয়াৰ কৰি লিখিছে, ‘হুমম্’।