সাংবাদিকৰ বাবে ক্ৰমাৎ এক অসহিষ্ণু পৰিৱেশৰ সৃষ্টি হৈছে নেকি ভাৰতত ? দেশত সুৰক্ষিত নহয় নেকি সংবাদ কৰ্মীসকল ? বিশ্ব প্ৰেছ স্বাধীনতা সূচকত ভাৰতে ১৮০ খন দেশৰ ভিতৰত ১৫০ তম স্থান লাভ কৰাৰ পাছতেই এই প্ৰশ্ন ক্ৰমাৎ প্ৰাসঙ্গিক হৈ পৰিছে।
আন্তৰ্জাতিক সংস্থা মিডিয়া ৱাচডগ ৰিপ’ৰ্টাৰ্ছ চান্স ফ্ৰণ্টিৰেছে মঙলবাৰে এই তালিকা প্ৰকাশ কৰিছে। উদ্বেগজনকভাৱে এই তালিকাত ২০২১ বৰ্ষত ১৪২ তম স্থান লাভ কৰা ভাৰতে এইবাৰ আঠটাকৈ স্থানৰ অৱনমিত হৈ ১৫০ স্থানত স্থিতি লাভ কৰিছে।
সংগঠনটোৱে ২০০২ চনৰ পৰা ৱৰ্ল্ড প্ৰেছ ফ্ৰীডম ইণ্ডেক্স প্ৰকাশ কৰি আহিছে। এই তালিকাত ধাৰাবাহিকভাৱে অৱনমিত হৈ আহি আছে ভাৰত। ২০১৬ চনত ১৩৩ তম স্থানৰ পৰা ২০২২ চনত ভাৰতৰ স্থান ১৫০ লৈ হ্ৰাস পাইছে।
আন্তৰ্জাতিক সংস্থাটোৱে ইয়াৰ ৱেবছাইটত এক বিবৃতিত কয়, “বিশ্ব সংবাদ মাধ্যমৰ স্বাধীনতা দিৱসত ৰিপ’ৰ্টাৰ্ছ উইদাউট বৰ্ডাৰ আৰু আন ৯ টাকৈ মানৱ অধিকাৰ সংগঠনে ভাৰতীয় কৰ্তৃপক্ষক সাংবাদিকসকলকৰ কামৰ ক্ষেত্ৰত বাধা প্ৰদান বন্ধ কৰিবলৈ আহ্বান জনায়।”
ৰিপ’ৰ্টাৰ্ছ চেন্স ফ্ৰণ্টিয়াৰচ (আৰএছএফ)- এ কয় যে ভাৰতীয় কৰ্তৃপক্ষই মত প্ৰকাশৰ স্বাধীনতাৰ অধিকাৰক সন্মান কৰা উচিত। সংবাদ কৰ্মীসকলক বাধা প্ৰদান কৰিবলৈ সন্ত্ৰাসবাদ আৰু ৰাজদ্ৰোহ আইনৰ অধীনত তেওঁলোকৰ বিৰুদ্ধে মোকৰ্দমা কৰা বন্ধ কৰা উচিত।”
লগতে সাংবাদিকসকলকৰ সমালোচনামূলক প্ৰতিবেদনৰ বাবে ৰাজনৈতিক উদ্দেশ্যপ্ৰণোদিত অভিযোগত আটক কৰা যিকোনো সাংবাদিকক মুকলি কৰিবলৈ আহ্বান জনায় সংস্থাটোৱে।
আন এক আন্তৰ্জাতিক সংস্থা ৰিপ’ৰ্টাৰ্ছ উইদাউট বৰ্ডাৰে “সাংবাদিকৰ বিৰুদ্ধে হিংসা, ৰাজনৈতিকভাৱে পক্ষপাতদুষ্ট সংবাদ মাধ্যম আৰু সংবাদ মাধ্যমৰ মালিকীস্বত্বৰ” বিষয়ে উল্লেখ কৰি কয় যে ভাৰতত সংবাদ মাধ্যমৰ স্বাধীনতা বৰ্তমান সংকটত আছে।
“কিছু বছৰ পূৰ্বলৈকে ভাৰতীয় সংবাদ মাধ্যমক যথেষ্ট প্ৰগতিশীল হিচাপে দেখা গৈছিল। কিন্তু চলিত দশকৰ মাজভাগত পৰিস্থিতি আমূল পৰিৱৰ্তন হৈছে। নৰেন্দ্ৰ মোডী প্ৰধানমন্ত্ৰী হিচাপে নিৰ্বাচিত হোৱাৰ পিছত শাসকীয় দল বিজেপি আৰু সংবাদ মাধ্যমত আধিপত্য বিস্তাৰ কৰা বৃহৎ মালিকগোষ্ঠী পৰিয়ালসমূহৰ মাজত এক চমৎকাৰ মিত্ৰতা গঢ়ি উঠিছে।”— ৰিপ’ৰ্টাৰ্ছ উইদাউট বৰ্ডাৰে কয়।
লগতে চৰকাৰৰ অত্যাধিক সমালোচনা কৰা সাংবাদিকসকল মোডীৰ অনুৰাগীসকলৰ দ্বাৰা ধাৰবাহিক নিৰ্যাতন আৰু আক্ৰমণৰ সন্মুখীন হ’ব লগা হৈছে বুলিও সংস্থাটোৱে বিবৃতিটোত উল্লেখ কৰিছে।
ৰিপ’ৰ্টাৰ্ছ উইদাউট বৰ্ডাৰে লগতে কয় যে চৰকাৰ আৰু চৰকাৰৰ সমৰ্থকসকলে ক’ভিদ মহামাৰী সন্দৰ্ভত চৰকাৰী বিবৃতিৰ বিৰোধীতা কৰি প্ৰতিবেদন প্ৰকাশ কৰা সংবাদ মাধ্যমসমূহৰ বিৰুদ্ধে একপ্ৰকাৰৰ গেৰিলা যুদ্ধ আৰম্ভ কৰিছে।
লগতে চৰকাৰ বিৰোধী প্ৰতিবাদ কভাৰ কৰিবলৈ চেষ্টা কৰা সাংবাদিকসকলক প্ৰায়ে গ্ৰেপ্তাৰ কৰা হৈছে বুলিও বিবৃতিটোত অভিযোগ কৰা হৈছে।
উল্লেখ্য যে যোৱা বৰ্ষ ডিচেম্বৰত এই সংস্থাটোৱে ২০২১ বৰ্ষত নিহত সাংবাদিকৰ সংখ্যাৰ আধাৰত ভাৰতক বিশ্বৰ পাঁচখন আটাইতকৈ বিপদজনক দেশৰ ভিতৰত তালিকাভুক্ত কৰিছিল।
এইদৰে আন্তৰ্জাতি মঞ্চত ভাৰতৰ এনে প্ৰতিচ্ছবিয়ে দেশৰ বাবে এক লজ্জাজনক পৰিস্থিতিৰ সৃষ্টি কৰাই নহয়, দেশৰ গণতান্ত্ৰিক চৰিত্ৰৰ ওপৰতো প্ৰশ্ন উত্থাপন কৰিছে। ইয়াৰ পিছতো দেশৰ শাসকবৰ্গই সংবাদ মাধ্যমৰ স্বতন্ত্ৰতাত হস্তক্ষেপ নকৰাকৈ গণতান্ত্ৰিক প্ৰমূল্যবোধৰ প্ৰতি সন্মান জনাব নে সেইয়া লক্ষ্যণীয় হ’ব।
