ইণ্ডোনেছিয়াৰ ভূমিকম্পত নিহতৰ সংখ্যা ২৬৮ জনলৈ বৃদ্ধি: এতিয়াও সন্ধানহীন শতাধিক লোক

সোমবাৰে ইণ্ডোনেছিয়াত সংঘটিত হোৱা বিধ্বংসী ভূমিকম্পৰ ফলত মৃত্যু হোৱা লোকৰ সংখ্যা ২৬৮ জনলৈ বৃদ্ধি পাইছে। ভূমিকম্পই ধ্বংসস্তূপত পৰিণত কৰা এলেকাসমূহত এতিয়াও অব্যাহত আছে উদ্ধাৰ অভিযান।

ইণ্ডোনেছিয়াৰ ৰাষ্ট্ৰীয় দুৰ্যোগ প্ৰশমন সংস্থাৰ মুৰব্বী সুহাৰিয়ানটোৱে জানিবলৈ দিয়া মতে, এতিয়াও প্ৰায় ১৫১ গৰাকী লোক নিৰুদ্দেশ হৈ আছে আৰু সহস্ৰাধিক লোক ভূমিকম্পৰ ফলত আহত হৈছে।

উল্লেখ্য যে সোমবাৰে নিশালৈকে ভূমিকম্পৰ ফলত ক্ষতিগ্ৰস্ত হোৱা অঞ্চল সমূহৰ পৰা ১৬২ গৰাকী লোকৰ মৃতদেহ উদ্ধাৰ কৰিছিল উদ্ধাৰকাৰী দলে।

৫.৬ প্ৰাবল্যৰ এই ভূমিকম্পৰ অভিকেন্দ্ৰ আছিল ৰাজধানী জাকাৰ্টাৰ পৰা প্ৰায় ৭৫ কিলোমিটাৰ দক্ষিণ-পূবে থকা পাহাৰীয়া পশ্চিম জাভাৰ চিয়ানজুৰ চহৰৰ ওচৰত।

এই ভয়াৱহ দুৰ্যোগত মৃতকৰ সংখ্যা বৃদ্ধি পাব পাৰে বুলি স্থানীয় প্ৰশাসনে ধাৰণা কৰিছে।