শ্বীনা বৰা হত্যাকাণ্ডত অভিযুক্ত হৈ বৰ্তমান কাৰাবন্দী হৈ থকা ইন্দ্ৰাণী মুখাৰ্জীয়ে দাবী কৰিছে যে তেওঁ জ্যেষ্ঠ কংগ্ৰেছ নেতা তথা প্ৰাক্তন বিত্ত মন্ত্ৰী পি চিদাম্বৰম আৰু তেওঁৰ পুত্ৰ কাৰ্তি চিদাম্বৰমক বিদেশত ৫০ লাখ ডলাৰ আদায় দিছিল।
বিদেশৰ ছিংগাপুৰ, মৰিছাছ, বাৰমুডা, ইংলেণ্ড আৰু ছুইজাৰলেণ্ডত এই লেনদেন কৰা হৈছিল।
কেন্দ্ৰীয় অনুসন্ধান সংস্থা (চিবিআই) য়ে আই এন এক্স মিডিয়া গোচৰত শুকুৰবাৰে বিশেষ আদালতত অভিযোগনামা দাখিল কৰে।
চিবিআইয়ে লগতে কয় যে তেওঁলোকে এই সন্দৰ্ভত বিদেশলৈও ন্যায়িক সহযোগ কৰাৰ বাবে পত্ৰ লিখিছে আৰু তেওঁলোকৰ সঁহাৰিৰ বাবে অপেক্ষা কৰিছে।
চিবিআইয়ে চাৰিটা কোম্পানী আৰু আঠগৰাকী লোকৰ বিৰুদ্ধে অভিযোগনামা দাখিল কৰিছে।
তেওঁলোকৰ বিৰুদ্ধে ধাৰা ১২০ বি (অপৰাধৰ চক্ৰান্ত), ৪২০(প্ৰৱঞ্চনা),৪৬৮(ভুৱা নথি ব্যৱহাৰ),৪৭১(ভুৱা নথি সঁচা নথি বুলি কৈ হস্তাক্ষৰ কৰা) আদি ধাৰা আৰোপ কৰা হৈছে।
এই গোচৰটোত ইন্দ্ৰাণী মুখাৰ্জী এগৰাকী চৰকাৰী সাক্ষী হৈছে। নিজ কন্যা শ্বীনা বৰাৰ হত্যাৰ অভিযোগত ইন্দ্ৰাণী বৰ্তমান মুম্বাইত কাৰাগাৰত বন্দী হৈ আছে।
ইন্দ্ৰাণীয়ে চিবিআইক দিয়া ভাষ্যত কৈছে যে তেওঁ উপঢৌকনৰ পৰিমান আলোচনাৰ বাবে ২০১৭’ৰ মাৰ্চ-এপ্ৰিলত পি চিদাম্বৰমক সাক্ষাৎ কৰিছিল।
উল্লেখ্য যে চিবিআইয়ে আই এন এক্স মিডিয়া প্ৰাইভেট লিমিটেডৰ ৪০৩.০৭ কোটি টকাৰ বিদেশী বিনিয়োগৰ তদন্তৰ বাবে ২০০৭চনৰ মে’ মাহত গোচৰ ৰুজু কৰিছিল।
