কাৰাটে খেলৰ জৰিয়তে দেশলৈ কেইবাটাও পদক কঢ়িয়াই আনি অসম তথা ভাৰতলৈ গৌৰৱ কঢ়িয়াই অনা বৰপেটাৰ সুযোগ্য সন্তান নিচাদ আলীৰ নাগৰিকত্বক লৈও এন আৰ চিত অভিযোগ উত্থাপিত হৈছে ৷ সম্পূৰ্ণ ঠিকনা নথকা অভিযোগকাৰীৰ অভিযোগৰ বাবেই আন্ত:ৰাষ্ট্ৰীয় কাৰাটে খেলুৱৈগৰাকীয়ে আজি নিজকে ভাৰতীয় বুলি প্ৰমাণিত কৰাৰ পৰীক্ষাত অৱতীৰ্ণ হয় ৷
অনুশীলনৰ বাবে সম্প্ৰতি ৰাজ্যৰ বাহিৰত থকা নিচাদ আলীয়ে নিজকে ভাৰতীয় বুলি প্ৰমাণ কৰাৰ বাবে বৰপেটাত উপস্থিত হয় ৷ আজি সৰ্থেবাৰীত থকা এন আৰ চি কেন্দ্ৰত নিজকে ভাৰতীয় বুলি প্ৰমাণ কৰাৰ বাবে অৱতীৰ্ণ হয় আন্ত:ৰাষ্ট্ৰীয় খেলুৱৈ গৰাকীয়ে ৷
উল্লেখ্য যে, দক্ষিণ আফ্ৰিকাৰ ডাৰবানত বিগত বৰ্ষত অনুষ্ঠিত নৱম কমনৱেলথ কাৰাটে চেম্পিয়নশ্বিপত ভাৰতীয় দলৰ হৈ অংশগ্ৰহণ কৰি সোণৰ পদক লাভ কৰা নিশাদ আলীয়ে ৰাষ্ট্ৰীয় আৰু আন্ত:ৰাষ্ট্ৰীয় পৰ্যায়ত কেইবাটাও পদক লাভ কৰিবলৈ সক্ষম হৈছে ৷
কেইবাখন দেশৰ “ভিছা” লাভ কৰা এনে এগৰাকী খেলুৱৈৰ প্ৰতি নাগৰিকত্বৰ ওপৰত অভিযোগ দাখিল কৰাকলৈ আশ্চৰ্য প্ৰকাশ কৰিছে খেলুৱৈ গৰাকীৰ পিতৃ মাতৃৰ লগতে স্থানীয় ৰাইজে ৷
