অহা বৰ্ষৰ ইণ্ডিয়ান প্ৰিমিয়াৰ লীগ (IPL) ৰ বাবে দলসমূহে প্ৰকাশ কৰিছে ৰিটেইন কৰা খেলুৱৈৰ চুড়ান্ত তালিকা। এই বৰ্ষৰ চেম্পিয়ন চেন্নাই চুপাৰ কিংছ, কলকাতা নাইট ৰাইডাৰ্ছ, মুম্বাই ইণ্ডিয়াঞ্চ আৰু দিল্লী কেপিটেলছে চাৰিজনকৈ খেলুৱৈক ৰিটেইন কৰাৰ বিপৰীতে ছানৰাইজাৰ্ছ হাইদৰাবাদ, ৰাজস্থান ৰয়েলছ আৰু ৰয়েল চেলেঞ্জাৰ্চ বাঙ্গালোৰে তিনিজনকৈ খেলুৱৈক ৰিটেইন কৰে। আনহাতে পঞ্জাৱ কিংছে ৰিটেইন কৰে দুজন খেলুৱৈক।
অহা বৰ্ষত নতুনকৈ আত্মপ্ৰকাশ কৰিবলগীয়া IPL ৰ নতুন দল আহমেদাবাদ আৰু লক্ষ্মৌৱে ডিচেম্বৰৰ ১ তাৰিখৰ পৰা ২৫ তাৰিখৰ ভিতৰত তিনিজনৈ খেলুৱৈক চুক্তিবদ্ধ কৰাৰ সুযোগ পাব। ইয়াৰে দুজন ভাৰতীয় খেলুৱৈৰ বিপৰীতে এজন বিদেশী খেলুৱৈ হ’ব।
ৰিটেইন কৰা খেলুৱৈৰ মাজত এইবাৰ সৰ্বাধিক দৰ লাভ কৰিছে ৰবীন্দ্ৰ জাদেজা, ৰোহিত শৰ্মা আৰু ঋষভ পণ্টে। তিনিওগৰাকী খেলুৱৈক তেওঁলোকৰ পূৰ্বৰ দল কেইটাই ১৬ কোটি টকাত চুক্তিবদ্ধ কৰে।
এই বৰ্ষৰ চেম্পিয়ন চেন্নাই চুপাৰ কিংছে প্ৰথম বৰ্ষৰ পৰাই দলক নেতৃত্ব প্ৰদান কৰি অহা মহেন্দ্ৰ সিং ধোনীক অহা বৰ্ষৰ বাবেও দলত ধৰি ৰাখে। দলটোৱে ধোনীক ১২ কোটি টকাত চুক্তিবদ্ধ কৰে। আনহাতে ৰবীন্দ্ৰ জাদেজাক ১৬ কোটি, মঈন আলীক ৮ কোটি আৰু ৰুতুৰাজ গাইকোৱাডক ৬ কোটি টকাৰ বিনিময়ত ৰিটেইন কৰে চেন্নায়ে। আনহাতে দলৰ আটাইতকৈ সফল তাৰকা সুৰেশ ৰাইনাক এইবাৰ দলৰ পৰা মুকলি কৰি দিয়ে। ৰাইনাই এতিয়া খেলুৱৈৰ নিলামত অংশগ্ৰহণ কৰিব।
মুম্বাই ইণ্ডিয়াঞ্চেও দলৰ চাৰিজন খেলুৱৈক ৰিটেইন কৰিছে। দলৰ নিয়মীয়া অধিনায়ক ৰোহিত শৰ্মাক ১৬ কোটি টকাত চুক্তিবদ্ধ কৰাৰ বিপৰীতে যশপ্ৰীত বুমৰাহক ১২ কোটি, সুৰ্যকুমাৰ যাদৱক ৮ কোটি আৰু কাইৰণ পোলাৰ্ডক ৬ কোটি টকাত ৰিটেইন কৰে দলটোৱে।
কলকাতা নাইট ৰাইডাৰ্ছে ১২ কোটি টকাত আন্দ্ৰে ৰাছেলক ৰিটেইন কৰাৰ লগতে বৰুণ চক্ৰৱৰ্তীক ৮ কোটি, ভেংকটেশ আয়াৰক ৮ কোটি আৰু সুনীল নাৰাইণক ৬ কোটি টকাত ৰিটেইন কৰে।
ৰাজস্থান ৰয়েলছে প্ৰথম পচন্দ হিচাপে সঞ্জু চেমচনক ১৪ কোটি টকাৰ বিনিময়ত দলত ৰাখে। দলটোৱে জ’ছ বাটলাৰক ১০ কোটি আৰু য়স্বভী জয়ছোৱালক ৪ কোটি টকাত ৰিটেইন কৰে।
দিল্লী কেপিটেলছে ঋষভ পণ্টক সৰ্বাধিক ১৬ কোটি টকাৰে ৰিটেইন কৰে। আনহাতে অক্সৰ পেটেলক ৯ কোটি, পৃথ্বী শ্ব’ক ৭.৫ কোটি আৰু এনৰিখ ন’কিয়াক ৬.৫ কোটি টকাৰে দলত ৰাখে।
ছানৰাইজাৰ্ছ হাইদৰাবাদে সৰ্বাধিক ১৪ কোটি টকাত ৰিটেইন কৰে নিউজিলেণ্ডৰ তাৰকা কেন উইলিয়ামচনক। কেইবাজনো মূল্যৱান তাৰকা খেলুৱৈক মুকলি কৰি দিয়া দলটোৱে উদীয়মান খেলুৱৈ আব্দুল চামাদ আৰু উমৰান মালিকক ৪ কোটি টকাত ৰিটেইন কৰি এক প্ৰকাৰৰ চমক সৃষ্টি কৰে।
পঞ্জাৱ কিংছে মাত্ৰ দুজন খেলুৱৈক দলত ৰাখে। দলটোৱে মায়াংক আগৰৱালক ১২ কোটি টকাৰ বিনিময়ত আৰু অৰ্শদ্বীপ সিঙক ৪ কোটি টকাত ৰিটেইন কৰে। দলটোৱে তাৰকা খেলুৱৈ লোকেশ ৰাহুলক ৰিটেইন কৰিবলৈ আগ্ৰহী আছিল যদিও ৰাহুলে নিলামত ভাগ লোৱাৰ ইচ্ছা প্ৰকাশ কৰে।
আনহাতে ৰয়েল চেলেঞ্জাৰ্চ বাঙ্গালোৰে দলৰ মূল তাৰকা বিৰাট কোহলীক পুনৰ বাৰ ১৫ কোটি টকাৰ বিনিময়ত দলত ৰাখে। দলটোৱে মেক্সৱেলক ১১ কোটি আৰু মহম্মদ চিৰাজক ৭ কোটি টকাত ৰিটেইন কৰে।
আইপিএলৰ দলসমূহে কেইবাজনো তাৰকা খেলুৱৈক মুকলি কৰি দিয়াৰ পাছত দল গঠনৰ বাবে হ’বলগীয়া নিলামত এই খেলুৱৈসকলে ভাগ ল’ব লাগিব। নিলামত কেইবাজনো তাৰকাই বৃহৎ দৰ লাভ কৰাৰ সম্ভাৱনা আছে।
