শনিবাৰে চীন আৰু ইৰাণৰ দুই বৈদেশিক মন্ত্ৰীয়ে ২৫ বছৰীয়া এক সহযোগিতা চুক্তিত স্বাক্ষৰ কৰিছে।
আন্তঃৰাষ্ট্ৰীয় সংবাদ সংস্থা ৰয়টাৰ-এ প্ৰকাশ কৰা অনুসৰি চীনৰ বৈদেশিক মন্ত্ৰী ৱাং য়ী আৰু ইৰাণৰ বৈদেশিক মন্ত্ৰী মহম্মদ জাভেদ জাৰীফৰ মাজত সম্পন্ন হয় দুই দেশৰ মাজৰ এই সহযোগিতাৰ চুক্তি।
“বৰ্তমানৰ পৰিস্থিতিৰ দ্বাৰা ইৰাণৰ সৈতে আমাৰ সম্পৰ্ক প্ৰভাৱান্বিত নহ’ব, কিন্তু ই স্থায়ী আৰু কৌশলগত হ’ব।” ৰয়টাৰ-এ এইদৰে প্ৰকাশ কৰিছে চীনৰ বৈদেশিক মন্ত্ৰীৰ ৱাঙৰ উদ্ধৃতি।
উল্লেখ্য যে চীনৰ বৈদেশিক মন্ত্ৰী ৱাং য়ীয়ে ইৰাণ ভ্ৰমণৰ সময়ছোৱাত এই চুক্তি স্বাক্ষৰ কৰাৰ পূৰ্বে ইৰাণৰ ৰাষ্ট্ৰপতি হাছান ৰৌহানীকো সাক্ষাৎ কৰে।
চীনে এই চুক্তিৰ দ্বাৰা ইৰাণৰ আন্তঃগাঁঠনি আৰু শক্তিখণ্ডত বিনিয়োগ কৰিব বুলি আশা কৰা হৈছে। চীনৰ বৈদেশিক মন্ত্ৰীয়ে চুক্তিত স্বাক্ষৰ কৰাৰ পূৰ্বে ইৰাণৰ ৰাষ্ট্ৰপতিৰ সৈতে এই বিষয়বোৰ সম্পৰ্কে আলোচনা কৰা বুলি প্ৰকাশ কৰিছে ৰয়টাৰ-এ।
ইফালে এই চুক্তিৰ পিছতে অতি আশাবাদী হৈ উঠিছে চীন। দেশখনৰ বৈদেশিক মন্ত্ৰীয়ে এই চুক্তিত স্বাক্ষৰ কৰাৰ বাবে ইৰাণক ভূয়সী প্ৰশংসা কৰিছে।
“ইৰাণে আন দেশৰ সৈতে ইয়াৰ সম্পৰ্কৰ বিষয়ে স্বতন্ত্ৰভাৱে সিদ্ধান্ত লয় আৰু কিছুমান দেশৰ দৰে নহয়, যিয়ে এটা ফোন কলেৰে তেওঁলোকৰ স্থিতি সলনি কৰে।” ৱাঙে কয়।
ইফালে এই চুক্তিক ইৰাণে এক ‘সফল কূনৈতিক’ চুক্তি বুলি আখ্যা দিছে।
ৰাষ্ট্ৰপতি ৰৌহানীৰ উপদেষ্টা হেচামেদ্দিন আছেনাই কয় যে এই চুক্তিখন ‘সফল কূটনীতি’ৰ এক উদাহৰণ।
আচেনাকে ইৰাণী সংবাদ মাধ্যমৰ আগত কয় যে “ঐক্যৱদ্ধ হোৱাটোৱেহে এখন দেশৰ শক্তি, বিচ্ছিন্ন হৈ থকাটো নহয়।”
আনহাতে ইৰাণৰ বৈদেশিক মন্ত্ৰণালয়ৰ মুখপাত্ৰ ছাইদ খাতিবজাদেহে কয় যে চুক্তিখন বাণিজ্য, অৰ্থনৈতিক আৰু পৰিবহণ সহযোগিতাৰ বাবে এক ‘ৰোডমাপ’, য’ত দুয়োপক্ষৰ ব্যক্তিগত খণ্ডৰ ওপৰত বিশেষ গুৰুত্ব দিয়া হৈছে।
উল্লেখ্য যে আমেৰিকাৰ শত্ৰু ইৰাণ আৰু চীনৰ এই দীৰ্ঘম্যাদী সহযোগিতাৰ চুক্তিয়ে আন্তঃৰাষ্ট্ৰীয় ৰাজনৈতিক আৰু কূটনৈতিক ক্ষেত্ৰখনত বিশেষ প্ৰভাৱ পেলাব বুলি ধাৰণা কৰা হৈছে। বিশেষকৈ আমেৰিকাই কি প্ৰতিক্ৰিয়া প্ৰকাশ কৰে সেয়া লক্ষণীয় হ’ব।
