ইছলামিক ষ্টেট সন্ত্ৰাসবাদী দলৰ সদস্যসকলে মাজে মাজে ইৰাক আৰু চিৰিয়াত আক্ৰমণ চলায়। আই এছ গোটে পৃথিৱীৰ বিভিন্ন দেশত ইয়াৰ শাখা সংগঠনো স্থাপন কৰিছে। আইএছ বা ইয়াৰ সহযোগী সকলে পৃথিৱীৰ বহুতো দেশত সন্ত্ৰাসবাদী আক্ৰমণৰ দায়িত্বও স্বীকাৰ কৰে। এনে কট্টৰ দলটোৰ নেতাজনৰ মৃত্যুৰ কথা ঘোষণা কৰা হৈছে। যুদ্ধত ইছলামিক ষ্টেট উগ্ৰপন্থী গোটৰ মুৰব্বী আবু হাছান আল-হাছিমি আল-কুৰাছি নিহত হোৱা বুলি কোৱা হৈছে। লগতে তেওঁৰ উত্তৰাধিকাৰীৰ নামো ঘোষণা কৰা হৈছে।
বুধবাৰে এক সংবাদ সংস্থাই প্ৰকাশ কৰে, “হাছিমী আল্লাৰ শত্ৰুৰ বিৰুদ্ধে যুদ্ধত নিহত হৈছে।” অৱশ্যে, কেতিয়া আৰু কি পৰিস্থিতিত হাছিমীৰ মৃত্যু হৈছে তাৰ সৱিশেষ জনা নাযায়। আইএছে বুধবাৰৰ দিনটোতে এটা অডিঅ’ বাৰ্তা মুকলি কৰিছে। বাৰ্তাটোত উগ্ৰপন্থী দলটোৰ মুৰব্বী হাছিমীৰ মৃত্যুৰ খবৰ দিয়া হৈছে। আবু আল-হুছেইন আল-হুছাইনি আল-কুৰাছিয়ে আই এছ গোটৰ নতুন মুৰব্বী হিচাপে দায়িত্ব গ্ৰহণ কৰিছে।
লগতে পঢ়ক: সংকটমোচক নেতা! চীনৰ প্ৰাক্তন ৰাষ্ট্ৰপতি জিয়াং জেমিনৰ ৯৬ বছৰ বয়সত মৃত্যু
উল্লেখ্য যে হাছিমীক যোৱা মে’ মাহত তুৰস্কত গ্ৰেপ্তাৰ কৰা হৈছিল। অৱশ্যে, গ্ৰেপ্তাৰ কৰা ব্যক্তিজন আইএছৰ মুৰব্বী হাছিমী আছিল নে নাই তাক লৈ যথেষ্ট অস্পষ্টতা আছিল। এই বছৰৰ আৰম্ভণিতে উত্তৰ চিৰিয়াৰ ইদলিব প্ৰদেশত আমেৰিকা যুক্তৰাষ্ট্ৰৰ আক্ৰমণত আই এছ গোটৰ প্ৰাক্তন মুৰব্বী আবু ইব্ৰাহিম আল-কুৰাছি নিহত হৈছিল। তেওঁৰ পূৰ্বসূৰী আবু বকৰ আল-বাগদাদীকো ২০১৯ চনৰ অক্টোবৰত ইদলিবত হত্যা কৰা হৈছিল।
মন কৰিকৰিব লগীয়া যে ‘কুৰাছি’ সম্প্ৰদায়ক হজৰত মহম্মদৰ বংশৰ এটা গোত্ৰ বুলি গণ্য কৰা হয়। এইকাৰণেই আইএছ গোটৰ মুৰব্বীসকলে নিজকে হজৰত মহম্মদৰ বংশধৰ বুলি দাবী কৰে।
লগতে পঢ়ক: মুম্বাইৰ ৰাজপথত দক্ষিণ কোৰিয়াৰ মহিলা ইউটিউবাৰক অশালীন আচৰণ দুৰ্বৃত্তৰ: দুই অভিযুক্তক গ্ৰেপ্তাৰ
২০১৪ চনত সন্ত্ৰাসবাদী দলটোৰ ইৰাক আৰু চিৰিয়াত আকস্মিকভাৱে আৱিৰ্ভাৱ ঘটিছিল। তেওঁলোকে দুয়োখন দেশৰ এক বৃহৎ এলেকা তেওঁলোকৰ নিয়ন্ত্ৰণলৈ আনিছিল। অৱশ্যে, সেই আধিপাত্য বেছি দিন স্থায়ী নহ’ল। ২০১৭ চনত ইৰাকত নাটো, ৰাছিয়ান বাহিনী আৰু স্থানীয় প্ৰতিৰোধ বাহিনীৰ যৌথ আক্ৰমণৰ বিৰুদ্ধে আৰু দুবছৰ পিছত চিৰিয়াত আইএছ পৰাজিত হৈছিল।
