‘‘তিনিচুকীয়াৰ কালি সংঘটিত হৈ যোৱা ঘটনাৰ পাছতেই মুখ্য মন্ত্ৰীয়ে কালিয়েই আৰক্ষী মহা পৰিদৰ্শকৰ তদন্তৰ নিৰ্দেশনা দিছে। তাৰ পাছতেই তিনিচুকীয়া আৰক্ষীয়ে অভিযান চলাই তিনিগৰাকীক গ্ৰেপ্তাৰ কৰিছে।‘’ এই কথা সংবাদমেলযোগে উল্লেখ কৰে ৰাজ্যিক বিজেপিৰ এগৰাকী মুখপাত্ৰই।
বিজেপিৰ ৰাজ্যিক মুখপাত্ৰ তথা বিধায়ক নোমল মুমিনৰ এই মন্তব্যৰ পাছতেই স্বাভাৱিকতে দল-সংগঠনৰ নেতৃত্বৰ মাজত প্ৰশ্ন উত্থাপন হৈছে, সঁচাকৈয়ে অসম আৰক্ষীয়ে নিৰপেক্ষতা অৱলম্বন কৰিছে নে বিজেপি চৰকাৰে আৰক্ষী প্ৰশাসনক ব্যৱহাৰ কৰিছে?
কিয়নো, যোৱা ২৭ জানুৱাৰিৰ দিনা নলবাৰীৰ ঘগ্ৰাপাৰাত আছু আৰু বিজেপি কৰ্মীৰ মাজত সংঘাতৰ সময়ত বিজেপিৰ যুৱ মৰ্চাৰ নলবাৰী জিলাৰ সম্পাদক কিশোৰ দাসে আছুৰ পতাকা ভৰিৰে মোহাৰি পেলোৱাৰ ভিডিঅ’ ইতিমধ্যে প্ৰচাৰিত হৈছে। তদুপৰি আছুৰ কৰ্মীক থানাৰ ভিতৰত মাৰ-পিট কৰাৰো এক গুৰুতৰ অভিযোগ উঠিছে নলবাৰী বিজেপি কৰ্মীৰ বিৰুদ্ধে।
তাৰ পাছতো অভিযুক্ত কিশোৰ দাসক বৰ্তমানলৈকে গ্ৰেপ্তাৰ কৰাটো বাদেই তেওঁক সোধ-পোচৰ বাবেও আৰক্ষীয়ে অনা নাই কিয়? সচেতন মহলত এই প্ৰশ্নৰ অৱতাৰণা হৈছে।
তদুপৰি, নলবাৰীৰ ঘগ্ৰাপাৰা আৰক্ষী থানাৰ আৰক্ষী বিষয়া বাবুল মেধিয়ে নৰ্থ ইষ্ট নাওক জানিবলৈ দিয়া অনুসৰি নলবাৰী জিলা আছুৱে ইতিমধ্যে ঘগ্ৰাপাৰ আৰক্ষী থানাত গোচৰ ৰুজু কৰিছে যদিও বৰ্তমানলৈকে ঘটনাৰ সৈতে জৰিত কোনো বিজেপিৰ কৰ্মীক সোধ-পোচৰ বাবে অনা হোৱা নাই।
‘সমগ্ৰ ঘটনাটো তদন্তৰ পৰ্য্যায়ত আছে। ফুটেজবোৰ সংগ্ৰহ কৰা হৈছে। গতিকে অলপ সময়ৰ প্ৰয়োজন হ’ব। বৰ্তমানলৈকে কিশোৰ দাসক সোধ-পোছ কৰা হোৱা নাই,‘’- এই কথা প্ৰকাশ কৰিছে ঘগ্ৰাপাৰা আৰক্ষী থানাৰ ভাৰপ্ৰাপ্ত আৰক্ষী বিষয়াই।
উল্লেখযোগ্য যে, বুধবাৰে তিনিচুকীয়াত বিজেপিৰ তিনিচুকীয়া জিলা সভাপতি লক্ষেশ্বৰ মৰাণৰ আক্ৰমণৰ ঘটনাৰ পাছতেই আৰক্ষীয়ে তদন্ত চলাই তথা ভিডিঅ’ ফুটেজৰ সহায়ত ইতিমধ্যে ঘটনাৰ সৈতে জড়িত তিনিজন লোকক আৰক্ষীয়ে গ্ৰেপ্তাৰ কৰা বুলি জানিব পৰা গৈছে।
ইপিনে, কালি তিনিচুকীয়াত সংঘটিত হোৱা ঘটনাটোক দুৰ্ভাগ্যজনক আখ্যা দিয়াৰ লগতে আইন সকলোৰে বাবে সমান হ’ব লাগে বুলি দাবী জনাইছে নলবাৰী জিলা আছুৰ সভাপতি গুণজিৎ পাঠকে।
‘’কালি তিনিচুকীয়াত হোৱা ঘটনাটো অতিকৈ দুৰ্ভাগ্যজনক। আইন সকলোৰে বাবে সমান হ’ব লাগে, ইয়াত ৰজাঘৰীয়া-প্ৰজাঘৰীয়াৰ কথা আহি নপৰে। কিশোৰ দাসে আছুৰ পতাকা গচকাটো অসমৰ ৰাইজে দেখিছে তথা সংবাদ মাধ্যমত কথাটো প্ৰচাৰ হ’ল। আৰক্ষীক তথ্য-পাতি যোগান ধৰাৰ পাছতো তেওঁৰ বিৰুদ্ধে কোনোধৰণৰ তদন্ত নহ’ল,’‘- আক্ষেপ প্ৰকাশ কৰি এইদৰে কয় আছুৰ নলবাৰী জিলাৰ সভাপতি গুণজিৎ পাঠকে।
আনহাতে, যোৱা ২৭ জানুৱাৰিত নলবাৰীত সংঘটিত ঘটনাত পৰিকল্পিতভাৱে আছু কৰ্মীৰ ওপৰত বিজেপি কৰ্মীয়ে জপিয়াই পৰা বুলি তেওঁ অভিযোগ তোলে।
‘’কেইগৰাকীমান বিজেপি কৰ্মীয়ে হিমন্ত বিশ্ব শৰ্মাৰ আগমণৰ প্ৰাক্ মুহূৰ্তত ফেচবুকযোগে আছুক ভাবুকি দিছিল। আনকি চেগুণৰ তক্তা পিঠিত বান্ধি থ’বৰ বাবেও আছু কৰ্মীক সকিয়নী দিছিল। কিন্তু সেই ভাবুকিক গুৰুত্ব নিদি আমি গণতান্ত্ৰিক পদ্ধতিৰে আন্দোলনৰ কাৰ্য্যসূচী ৰূপায়ণ কৰিছিলো,’‘-এইদৰে কয় সভাপতি পাঠকে।
ইপিনে, ২৭ জানুৱাৰিৰ ঘটনাক ‘বিজেপিৰ সংঘাতৰ ৰাজনীতি’ আখ্যা দিয়ে কৃষক নেতা অখিল গগৈয়ে। তেওঁ কয়,’’হিমন্ত বিশ্ব শৰ্মা আৰু সৰ্বানন্দ সোণোৱালে এই সংঘাতৰ ৰাজনীতি কৰিছে। তেওঁলোকে সদৌ অসম ছাত্ৰ সন্থাৰ কৰ্মীসকলৰ ওপৰত আক্ৰমণ কৰিলে।‘‘
গগৈয়ে অনতিবিলম্বে আছুৰ ওপৰত চলোৱা আক্ৰমণৰ লগত জৰিত বিজেপি কৰ্মীক গ্ৰেপ্তাৰৰ দাবী জনায়। নলবাৰীৰ ঘটনাৰ সৈতে জৰিত বিজেপি কৰ্মীক আটক নকৰাৰ বিপৰীতে বুধবাৰে তিনিচুকীয়াৰ ঘটনাৰ সৈতে জৰিত দোষীক শীঘ্ৰে গ্ৰেপ্তাৰ কৰা কাৰ্যত প্ৰতিক্ৰিয়া প্ৰকাশ কৰে কৃষক নেতা অখিল গগৈয়ে।
’’২৭ জানুৱাৰিত আক্ৰমণৰ সৈতে জৰিত বিজেপি কৰ্মীক আটক কৰা হোৱা নাই। তাৰ বিপৰীতে কালি তিনিচুকীয়াৰ ঘটনাৰ সৈতে জৰিত দেশপ্ৰেমিক যুৱকসকলক গ্ৰেপ্তাৰ কৰাৰ কাম আৰক্ষীয়ে তৎকালীনভাৱে আৰম্ভ কৰিছে,’‘-এইদৰে কয় গগৈয়ে।
তাৎপৰ্য্যপূৰ্ণভাৱে, অসম আৰক্ষীৰ এনে কাণ্ডৰ পৰা ‘’অসম আৰক্ষী নিৰপেক্ষ নহয়’’ বুলি সু-স্পষ্ট হৈ পৰিছে বুলিও দাবী কৰে কৃষক নেতাজনে।
