ইৰাণৰ ৰাজধানী তেহৰাণত ইজৰাইলৰ বাহিনীয়ে ক্ষেপণাস্ত্ৰ আৰু ড্ৰ’ন আক্ৰমণ চলাইছে। ইৰাণৰ চৰকাৰী টেলিভিছনৰ বাতৰি অনুসৰি তেহৰাণত থকা ইছলামিক ৰিভল্যুচনেৰী গাৰ্ড কৰ্পছৰ মুখ্য কাৰ্যালয়ত আক্ৰমণ কৰা হৈছে। এই আক্ৰমণৰ পিছতে মধ্য ইৰাণৰ নাটাঞ্জ পাৰমাণৱিক কেন্দ্ৰত জুই জ্বলি থকা দেখা গৈছে।
ইজৰাইলৰ প্ৰতিৰক্ষা মন্ত্ৰী ইজৰাইল কাৰ্জাইয়ে কয় যে ইজৰাইলে ইৰাণৰ ওপৰত “আগতীয়া প্ৰতিৰোধমূলক” আক্ৰমণ চলাইছে।
একে সময়তে প্ৰধানমন্ত্ৰী বেঞ্জামিন নেতানিয়াহুৰ চৰকাৰে সমগ্ৰ ইজৰাইলতে “জৰুৰীকালীন অৱস্থা” ঘোষণা কৰিছে।
অদূৰ ভৱিষ্যতে ইজৰাইল ৰাষ্ট্ৰ আৰু ইয়াৰ সাধাৰণ নাগৰিকৰ বিৰুদ্ধে মিছাইল আৰু ড্ৰ’ন আক্ৰমণৰ আশংকাৰ কাৰণে ইৰাণৰ সামৰিক আৰু পাৰমাণৱিক ঘাটিসমূহত এই আগতীয়া প্ৰতিৰোধমূলক আক্ৰমণ চলোৱা হৈছে বুলি ঘোষণাটোত উল্লেখ কৰা হৈছে।
ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে এক বিবৃতিত কয় যে এই অভিযানত ইৰাণৰ পাৰমাণৱিক কাৰ্যসূচী, বেলিষ্টিক মিছাইল আৰু সামৰিক সামৰ্থ্যক লক্ষ্য কৰি লোৱা হৈছে।
বিবৃতিটোত নেতানিয়াহুৱে লগতে কয় যে, “যেতিয়ালৈকে প্ৰয়োজন সিমান দিন এই অভিযান অব্যাহত থাকিব।”
বাতৰি মতে, তেহৰাণৰ উত্তৰ-পূবত বিস্ফোৰণৰ শব্দ শুনা গৈছে। অৱশ্যে প্ৰাৰম্ভিকভাৱে কোনো লোক হতাহত হোৱাৰ বা ক্ষয়-ক্ষতিৰ খবৰ পোৱা নাই।
ইৰাণৰ সংবাদ মাধ্যমে প্ৰকাশ কৰিছে যে সমগ্ৰ তেহৰাণত ৬ৰ পৰা ৯টা বিস্ফোৰণৰ শব্দ শুনা গৈছে। আৱাসগৃহতো আক্ৰমণ কৰা হৈছে।
বাতৰি অনুসৰি সমগ্ৰ চহৰখনতে ইজৰাইলে আক্ৰমণ কৰাৰ পিছত কৰ্তৃপক্ষই তেহৰানৰ ইমাম খোমেইনী আন্তঃৰাষ্ট্ৰীয় বিমানবন্দৰত বিমান সেৱা বন্ধ কৰি দিয়ে।
আমেৰিকাৰ বিদেশ মন্ত্ৰী মাৰ্কো ৰুবিঅ’ই কয় যে ইৰাণত ইজৰাইলৰ অভিযানত আমেৰিকা জড়িত নহয়। ৱাশ্বিংটনৰ শীৰ্ষ অগ্ৰাধিকাৰ হৈছে অঞ্চলটোত আমেৰিকান বাহিনীৰ সুৰক্ষা নিশ্চিত কৰা।
