গাজাত মাজনিশা পুনৰ আক্ৰমণ চলালে ইজৰায়েলী সেনাই। সাময়িক যুদ্ধবিৰতিৰ পিছত এই নৱম দিনতো গাজাত আক্রমণ অব্যাহত ৰাখিছে ইজৰায়েলী সেনাই। ‘আল জাজ়িৰা’ৰ প্ৰতিবেদন অনুসৰি, এই অক্ৰমণত ৭ শিশুসহ ২৩ জনৰ মৃত্যু হৈছে আৰু যথেষ্ট সংখ্যক আহত হৈছে বুলি খবৰ পোৱা গৈছে। আক্ৰমণত হতাহতৰ প্ৰায়ভাগ দক্ষিণ আৰু মধ্য গাজাৰ বাসিন্দা।
ইফালে, সোমবাৰে ছিৰিয়াৰ দুটা বিমানঘাঁটিতো ইজৰায়েলে হামলা চলাইছে, যিটো কেইদিনমান আগতেও আক্রমণৰ চিকাৰ হৈছিল। ইউৰোপীয় ইউনিয়নৰ শীৰ্ষ কূটনীতিবিদ কাজা কল্লাছে এই আক্ৰমণৰ বিৰুদ্ধে অসন্তোষ প্ৰকাশ কৰি কয় যে বাচাৰ-আল-আছদৰ চৰকাৰ পতনৰ পিছত ছিৰিয়াই ইজৰায়েলৰ ওপৰত আক্রমণ কৰা নাই। তেওঁ সতর্ক কৰি দিছে যে, এনে আক্ৰমণৰ ফলত পৰিস্থিতি জটিল কৰি তুলিব।
দেওবাৰে দক্ষিণ গাজাৰ সৰ্ববৃহৎ নাছেৰ হাস্পতালতো ইজৰায়েলৰ আক্ৰমণত অগ্নিকাণ্ড সংঘটিত হৈছিল। ইজৰায়েল ডিফেন্স ফ’ৰ্চে (আইডিএফ) দাবি কৰিছে যে, এই আক্ৰমণত হামাছৰ এগৰাকী শীৰ্ষনেতাৰ মৃত্যু হৈছে। হামাছ পৰিচালিত স্বাস্থ্য মন্ত্ৰণালয়ৰ উদ্ধৃতি দি এপিয়ে জনাইছে, হাস্পতালত যুদ্ধত আঘাত প্ৰাপ্ত বহু ৰোগীৰ চিকিৎসা চলি থকাৰ সময়ত শল্যচিকিৎসা বিভাগত বোমা পৰাত অগ্নিকাণ্ড সংঘটিত হৈছিল, এজনৰ মৃত্যুৰ লগতে বহুতো আহত হৈছে।
উল্লেখ্য যে ২০২৩ৰ দ্বিতীয়াৰ্ধৰ পৰা ইজৰায়েল আৰু হামাসৰ মাজত চলা ১৮ মাহৰ যুদ্ধত গাজ়াত ৫০ হাজাৰতকৈ অধিক পেলেষ্টাইনীৰ মৃত্যু হৈছে বুলি হামাছে দাবী কৰিছে। জানুৱাৰীত সাময়িক যুদ্ধবিৰতিৰ পিছতো ইজৰায়েলে চুক্তি ভংগ কৰি পুনৰ আক্ৰমণ আৰম্ভ কৰিছে বুলি অভিযোগ উত্থাপন হৈছে। প্ৰধানমন্ত্ৰী বেঞ্জামিন নেতানিয়াহুয়ে কৈছে, সকলো পণবন্দীক মুক্তি আৰু হামাছক সম্পূৰ্ণৰূপে ধ্বংস নোহোৱালৈকে যুদ্ধ চলি থাকিব। আমেৰিকাৰ সৈতে আলোচনাৰ পিছতো যুদ্ধবিৰতি ভংগ কৰাৰ কথা তেওঁ স্বীকাৰ কৰিছে।
