গাড়ীত বান্ধি লৈছে বিচনা। মধ্য গাজাৰ পুৰণি ঘৰলৈ উভতিছে আয়া ফাহমী আৰু তেওঁৰ পৰিয়াল। যুদ্ধ আৰম্ভ হোৱাৰ পিছত তেওঁলোকে তৃতীয়বাৰৰ বাবে নিজৰ আশ্ৰয় সলনি কৰিবলগীয়া হৈছে। ইয়াৰ পূৰ্বে ইজৰাইলৰ আক্ৰমণৰ ফলত তেওঁলোকে দক্ষিণ গাজাত আশ্ৰয় লৈছিল।
সাতদিনীয়া অস্থায়ী যুদ্ধবিৰতিৰ অন্তত যোৱা শুকুৰবাৰে পুৱাৰে পৰা ইজৰাইলে বৃহৎ পৰিসৰৰ আক্ৰমণ চলাইছে। উত্তৰ গাজাৰ উপৰিও দক্ষিণ গাজাতো আক্ৰমণ বৃদ্ধি পাইছে। ইজৰাইলৰ বাহিনীয়ে সম্ভাৱ্য স্থল অভিযানৰ অংশ হিচাপে দক্ষিণ গাজাৰ খান ইউনিছৰ বাসিন্দাসকলক সেই অঞ্চল এৰি যাবলৈ নিৰ্দেশ দি প্ৰচাৰ লিফলেট পেলাইছে।
তিনিটা সন্তানৰ মাতৃ ফাহমীয়ে (৩৪) সংবাদ মাধ্যমক জনোৱা মতে, ‘’ইজৰাইলী সেনাৰ নিৰ্দেশত যুদ্ধ আৰম্ভ হোৱাৰ ষষ্ঠ দিনটোত আমি ঘৰৰ পৰা ওলাই আহিলোঁ। তেওঁলোকে ক’লে, আমাৰ অঞ্চলত আক্ৰমণ কৰা হ’ব। আমি ডেইৰ আল-বালাহ অঞ্চলৰ এজন আত্মীয়ৰ ঘৰত উঠিলোঁ। তাত তিনি সপ্তাহৰ দৰে আছিলো।‘’
ফাহমীয়ে কয়, “তাৰ পিছত নিৰাপদ হ’ব বুলি ভাবি আমি খান ইউনিছৰ এজন আত্মীয়ৰ ঘৰলৈ যোৱাৰ সিদ্ধান্ত লৈছিলো। বিশেষকৈ ডেইৰ আল বালাহৰ তুলনাত সেই অঞ্চলৰ দোকানবোৰত খাদ্য কিনাটো সহজ আছিল।”
তেওঁ কয়, “আমি সেই ঘৰৰ পাৰ্কিং লটত আন ৩০ জন মানুহৰ সৈতে তাত আছিলো। ইয়াৰ বাহিৰে আমাৰ হাতত উপায় নাছিল।”
অস্থায়ী যুদ্ধবিৰতিৰ সময়ত ফাহমীয়ে গম পায় যে গাজা চহৰৰ তাল আল হাৱা অঞ্চলত থকা তেওঁলোকৰ ঘৰটো ধ্বংস হৈছে। তথাপিও তেওঁলোক তালৈ উভতি আহিছে।
হামাছৰ আক্ৰমণৰ লগে লগে ইজৰাইল বাহিনীয়ে ৭ অক্টোবৰৰ পৰা গাজাত নিৰ্বিচাৰে আক্ৰমণ আৰম্ভ কৰে। গাজাৰ বিদ্যুৎ বিতৰণ কোম্পানী জেডচিঅ’ৰ তথ্যৰ উদ্ধৃতি দি ৰাষ্ট্ৰসংঘই জনোৱা মতে, অৱৰুদ্ধ গাজা ষ্ট্ৰিপ ১১ অক্টোবৰৰ পৰা বিদ্যুৎ বিহীন হৈ আছে।
তথ্য অনুসৰি ইজৰাইলে ৮ অক্টোবৰত গাজাৰ বিদ্যুৎ যোগান বন্ধ কৰি দিছিল। কিন্তু গাজাৰ বাসিন্দাসকলে বিদ্যুৎ বিচ্ছিন্ন হোৱাৰ পূৰ্বেও নিৰৱচ্ছিন্নভাৱে বিদ্যুৎ লাভ কৰা নাছিল। চলিত বৰ্ষৰ জানুৱাৰীৰ পৰা ছেপ্টেম্বৰৰ ভিতৰত গাজালৈ দিনটোত ১৩ ঘণ্টাৰ অলপ বেছি সময়হে বিদ্যুৎ যোগান ধৰা হৈছিল।
লগতে পঢ়কঃ ইজৰাইলৰ বিমান আক্ৰমণত নিহত পেলেষ্টাইনৰ প্ৰসিদ্ধ বিজ্ঞানী
গাজাৰ অধিকাংশ চিকিৎসালয় আৰু স্বাস্থ্য কেন্দ্ৰ বিদ্যুৎ আৰু চিকিৎসা সঁজুলিৰ অভাৱত বন্ধ হৈ আছে। ইজৰাইলৰ আক্ৰমণত আহত লোকৰ সংখ্যা বৃদ্ধি পোৱাৰ লগে লগে বাকী চিকিৎসালয়সমূহেও পৰিস্থিতি চম্ভালিবলৈ সংগ্ৰাম কৰি আছে।
ঠাইৰ অভাৱত আহতসকলক চিকিৎসালয়ৰ মজিয়াত চিকিৎসা প্ৰদান কৰা হৈছে। বিশ্ব স্বাস্থ্য সংস্থাৰ মুৰব্বী টেড্ৰ’ছ আধানম গেব্ৰেইছাছে কয় যে এই পৰিস্থিতি কল্পনাতীত।
গাজাৰ দক্ষিণ অংশৰ নাছেৰ মেডিকেল কমপ্লেক্স পৰিদৰ্শন কৰাৰ পিছত ডব্লিউ এইচ অ’ৰ সঞ্চালক প্ৰধানগৰাকীয়ে কয় যে ইয়াত সামৰ্থ্যতকৈ অধিক লোকে চিকিৎসা গ্ৰহণ কৰি আছে। তেওঁ কয়, এই চিকিৎসালয়খনত প্ৰায় ১০০০ ৰোগী আছে, যিটো চিকিৎসা ক্ষমতাৰ তিনিগুণ।
লগতে পঢ়কঃ গণনা সমাপ্ত হোৱাৰ আগতেই জনালে অভিনন্দন : তেলেংগানাৰ ডিজিক নিলম্বন নিৰ্বাচন আয়োগৰ
গেব্ৰেছছে কয় যে ৰোগীসকলক মজিয়াত চিকিৎসা কৰা হৈছে। বিষত চিঞৰিছে। পৰিস্থিতি নিয়ন্ত্ৰণৰ বাহিৰত। চিকিৎসা সেৱাৰ ক্ষেত্ৰত এয়া কল্পনাতীত।
ইজৰাইলে ঘেৰাও কৰা গাজাত ইন্ধন জেনেৰেটৰ চলাবলৈ দিয়া নাই। তাত থকা প্ৰায়বোৰ চিকিৎসালয় বন্ধ কৰি দিয়া হৈছে। ইয়াৰ উপৰিও ইজৰাইল বাহিনীয়ে আল-শ্বিফাকে ধৰি উত্তৰ গাজাৰ মূল চিকিৎসালয়তো অভিযান চলায়।
