জাগীৰোড আৰক্ষীয়ে সোমবাৰে চলোৱা এক অভিযানত প্ৰায় দুই কোটি টকাৰ নকল নোটসহ নকল নোট ছপা কৰা এটা যন্ত্ৰ জব্দ কৰে। আৰক্ষীয়ে লগতে এই সন্দৰ্ভত জড়িত দুজন লোকক গ্ৰেপ্তাৰ কৰিবলৈ সক্ষম হয়।
জাগীৰোড থানাৰ অন্তৰ্গত ধৰমতুল আটিগাঁৱৰ দীঘলবড়িৰ ৰিপণ চন্দ্ৰ মান্তাৰ ঘৰৰ পৰা আৰক্ষীয়ে এই নকল টকা ছপা কৰা মেচিনটোৰ লগতে পাঁচশ আৰু দুহেজাৰ টকাৰ প্ৰায় দুই কোটি টকাৰ নকল নোট জব্দ কৰে।
আৰক্ষীয়ে এই ঘটনাৰ সৈতে জড়িত থকাৰ অপৰাধত ৰিপণ চন্দ্ৰ মান্তা আৰু হবিবুৰ ৰহমান নামৰ দুজন লোককো আটক কৰে। জাগীৰোড আৰক্ষীৰ ভাৰপ্ৰাপ্ত বিষয়া প্ৰদীপ বৰাৰ নেতৃত্বত চলা অভিযানটোত আন দুজন অপৰাধী পলাই সৰা বুলি জানিব পৰা গৈছে।
আৰক্ষীয়ে জানিবলৈ দিয়া মতে, সোমবাৰে এটা দলে ধৰমতুল ৰে’ল ষ্টেশ্যনৰ সমীপত অপৰাধীচক্ৰটোৰ সৈতে জালনোট আৰু নগদ ধনৰ সালসলনিৰ লেনদেন কৰাৰ কথা আছিল।
আৰক্ষীয়ে সাধাৰণ পোছাকত ৰে’ল ষ্টেশ্যনৰ আশে-পাশে অৱস্থান কৰি গোটেই ঘটনাক্ৰম পৰ্যবেক্ষণ কৰিছিল। কিন্তু নগদ ধন লৈ অহা দলটো উপস্থিত নোহোৱা দেখি ৰিপণ চন্দ্ৰ মান্তা আৰু হবিবুৰ ৰহমানে সেই স্থান পৰিত্যাগ কৰিব বিচৰাৰ সময়তে আৰক্ষীৰ দলটোৱে দুয়োজনকে আটক কৰে।
ইয়াৰ পাছতে আৰক্ষীয়ে ধৃত ৰিপণ মান্তাৰ ঘৰৰ পৰা নকল টকা ছপা কৰা মেচিন আৰু প্ৰায় দুই কোটি টকাৰ নকল নোট জব্দ কৰে। বৰ্তমানে ধৃত লোক দুজনক আৰক্ষীয়ে জেৰা চলাই থকাৰ লগতে এই চক্ৰটোৰ সৱিশেষ উদ্ধাৰৰ প্ৰচেষ্টা অব্যাহত ৰাখিছে।
