অসমৰ কাৰাৰুদ্ধ অপৰাধীলৈ সুখবৰ, শাস্তিৰ ম্যাদ কমাই দিছে ৰাজ্য চৰকাৰে
গণৰাজ্য দিৱস উপলক্ষে অসমৰ আদালতৰ আওতাত থকা সশ্ৰম কাৰাদণ্ডৰে দণ্ডিত বিভিন্ন শ্ৰেণীৰ কাৰাবন্দীৰ শাস্তিৰ ম্যাদ হ্ৰাস কৰাৰ সিদ্ধান্ত লৈছে ৰাজ্য চৰকাৰে।
২৬ জানুৱাৰিৰ পৰা এই সিদ্ধান্ত কাৰ্য্যকৰী হ’ব বুলি শুকুৰবাৰে জাননী জাৰি কৰিছে অসম চৰকাৰৰ তথ্য আৰু জনসংযোগ বিভাগে।
এই নিৰ্দেশ অনুসৰি এবছৰৰ অধিক কাৰাদণ্ডৰে দণ্ডিত অপৰাধীৰ শাস্তি ৩০ দিন আৰু ৩ মাহৰ পৰা ৬ মাহ পৰ্য্যন্ত শাস্তি পোৱা কাৰাবন্দীৰ শাস্তি ১০ দিন হ্ৰাস কৰা হৈছে।
অৱশ্যে সামৰিক আদালতে দোষী সাব্যস্ত কৰা অপৰাধী, জৰিমনাৰ পৰিৱৰ্তে শাস্তি লাভ কৰা কাৰাবন্দী, বিদেশী আইন, পাৰপত্ৰ আইন, চৰকাৰী গোপনীয়তা আইন ১৯২৩, ভাৰতীয় দণ্ডবিধি আইনৰ ১২১ৰ পৰা ১৩১ ধাৰাৰ অধীনত দেশৰ বিৰুদ্ধাচৰণ কৰা, দুৰ্নীতি প্ৰতিৰোধ আইন, মানৱ সৰবৰাহ প্ৰতিৰোধী আইন, নিচাযুক্ত দ্ৰব্য সৰবৰাহ আইনৰ লগতে ধৰ্ষণৰ বাবে দোষী সাব্যস্ত হোৱা অপৰাধীৰ ক্ষেত্ৰত প্ৰযোজ্য নহয় এই ৰেহাই।