মুকেশ আম্বানীৰ ঘৰৰ সন্মুখত বিস্ফোৰক ভৰ্তি বাহন ৰখাৰ দায়িত্ব স্বীকাৰ কৰিলে জইছ-উল-হিন্দে
ৰিলায়েন্স ইণ্ডাষ্ট্ৰীজৰ স্বত্বাধিকাৰ তথা এছিয়াৰ আটাইতকৈ ধনী ব্যক্তি উদ্যোগপতি মুকেশ আম্বানীৰ ঘৰৰ সন্মুখত বিস্ফোৰক ভৰ্তি বাহন কোনে ৰাখিছিল সেই প্ৰশ্নৰ উত্তৰ বিচাৰি মুম্বাই আৰক্ষী হায়ৰাণ হৈ থকাৰ সময়তে এই কাণ্ডৰ দায়িত্ব স্বীকাৰ কৰিছে এটি বিশেষ সন্ত্ৰাসবাদী সংগঠনে।
মুকেশ আম্বানীৰ ঘৰৰ সন্মুখত বিস্ফোৰক ভৰ্তি বাহন ৰখাৰ দায়িত্ব স্বীকাৰ কৰিছে ইছলামিক সন্ত্ৰাসবাদী সংগঠন জইছ-উল-হিন্দে।
টেলিগ্ৰাম এপৰ জৰিয়তে আজি সংগঠনটোৱে এই দায়িত্ব স্বীকাৰ কৰে।
আম্বীক উদ্দেশ্যি লিখা এখন ভাবুকি পত্ৰত সংগঠনটোৱে আম্বানীৰ পৰা ধন দাবী কৰাৰ লগতে তেওঁলোক কোনো কাৰণতে থমকি নৰয় বুলিও কৈছে।উল্লেখ্য চলিত বৰ্ষৰ জানুৱাৰী মাহত সংগঠনটোৱে দিল্লীস্থ ইজৰাইলী দূতাবাসৰ সন্মুখতো বোমা বিস্ফোৰণ ঘটাইছিল।
উল্লেখ্য ২৬ ফেব্ৰুৱাৰীত আম্বানিৰ বাসভৱন এন্টিলিয়াৰ সন্মুখত উদ্ধাৰ হৈছিল এখন বিস্ফোৰক ভৰ্তি গাড়ী।
পৰিত্যক্ত এখন গাড়ী অঞ্চলটোত ৰৈ থকা দেখি স্থানীয় বাসিন্দাসকলৰ সন্দেহ ওপজে। লগে লগে তেওঁলোকে আৰক্ষীক খবৰ দিয়ে।
বৃহস্পতিবাৰে আবেলি সংঘটিত এই ঘটনাই স্বাভাৱিকতে আতংকৰ সৃষ্টি কৰে। বহুসময় ধৰি এখন এছ য়ু ভি আম্বানিৰ ঘৰৰ সন্মুখত ৰৈ থকা দেখা গৈছিল।
মুম্বাই আৰক্ষীয়ে ততাতয়াকৈ বোম স্কোৱাডক খৱৰ দিয়ে। বোম স্কোৱাড আহি গাড়ীখন পৰীক্ষা কৰি দেখা পায় যে পৰিত্যক্ত গাড়ীখনত ২০ডাল জিলেটিন ষ্টিক আছে।
গামদেবী থানাৰ পৰা অহা বিশাল আৰক্ষী বাহিনীয়ে গোটেই অঞ্চলটো ঘেৰি পেলায়। তদুপৰি, ডগ স্কোৱাডকো মাতি পঠিওৱা হয়।
গাড়ীখনৰ ভিতৰত কেইবাখনো নাম্বাৰ প্লেট পোৱা গৈছিল। আৰক্ষীয়ে জানিবলৈ দিয়া মতে মুকেশ আম্বানিৰ নিৰাপত্তাত ব্যৱহৃত গাড়ীৰ নম্বৰৰ সৈতে নাম্বাৰ প্লেটৰ নম্বৰৰ মিল আছে।