অসমত কিতাপ অনুপাতে পঢ়ুৱৈৰ সংখ্যা কম : গল্পকাৰ জয়ন্ত মাধৱ বৰা
আজি গুৱাহাটী প্ৰেছ ক্লাবত এক গাম্ভীৰ্যপূৰ্ণ অনুষ্ঠানত লেখিকা মঞ্জুলা গোস্বামীৰ তিনিখনকৈ গ্ৰন্থ উন্মোচন কৰা হয়। বিশিষ্ট সাংবাদিক তথা আমাৰ অসম কাকতৰ সম্পাদক প্ৰশান্ত ৰাজগুৰু, সাহিত্যিক জয়ন্ত মাধৱ বৰা, বিশিষ্ট সাংবাদিক অপূৰ্ব বল্লভ গোস্বামীয়ে লেখিকাগৰাকীৰ গ্ৰন্থকেইখন উন্মোচন কৰে।
উন্মোচন কৰা গ্ৰন্থকেইখন হ’ল ক্ৰমে উপন্যাস ‘ছাঁ হৃদয়ৰ’, গল্প সংকলন ‘ৰাধাচূড়া’ আৰু প্ৰবন্ধ সংকলন ‘হৃদিস্পৰ্শ’।
উন্মোচনী সভাত প্ৰশান্ত ৰাজগুৰুৱে কয় যে ৰাজ্যত প্ৰত্যেক বছৰেই শ শ কিতাপ প্ৰকাশ হৈ আছে যদিও সেই অনুপাতে কিতাপ বিক্ৰীৰ সংখ্যা বৃদ্ধি পোৱা নাই।
আনহাতে গল্পকাৰ জয়ন্ত মাধৱ বৰাই কিতাপ অনুপাতে পঢ়ুৱৈৰ সংখ্যা কম হোৱা বিষয়টোক লৈ উদ্বিগ্নতা প্ৰকাশ কৰে। তেওঁ কয় যে অসমত সাহিত্য সৃষ্টিৰ অজস্ৰ সমল আছে।
ইফালে স্তম্ভ লেখক হাইদৰ হুছেইনে কয় যে আৱেগৰ আধিপত্যই ক্ষতিগ্ৰস্ত কৰিছে।
আজিৰ গ্ৰন্থ উন্মোচনী সভাখনত মৃদুল পবন জোন, সঞ্জীৱ লোচন তামুলী, ৰজনী চুতীয়া, অনন্ত বৈৰাগী, কৰবী মিলি, গীতালি শইকীয়াকে ধৰি আৰু বহুকেইজন গ্ৰন্থনুৰাগী উপস্থিত থাকে।