বিহাৰৰ বুদ্ধগয়া বিস্ফোৰণৰ সৈতে জড়িত থকাৰ সন্দেহত কলকাতা আৰক্ষীৰ বিশেষ টাস্ক ফ’ৰ্চে ১৬ ফেব্ৰুৱাৰিৰ পুৱাতে কলকাতাৰে এটা অঞ্চলৰ পৰা গ্ৰেপ্তাৰ কৰিছে অসমৰ বৰপেটা জিলাৰ আৰিফুল ইছলাম নামৰ এজন যুৱকক। আৰক্ষীৰ মতে আৰিফুল বাংলাদেশ ভিত্তিক সন্ত্ৰাসবাদী সংগঠন জামাতুল মুজাহিদিন বাংলাদেশৰ (জে এম বি)ৰ এজন সক্ৰিয় সদস্য।
তদন্তকাৰী আৰক্ষীৰ দাবীমতে যোৱা বছৰ বুদ্ধগয়াৰ মহাবুধি মন্দিৰত দালাই লামাৰ ভ্ৰমণৰ ঠিক পিছতে হোৱা বোমা বিস্ফোৰণটোত জে এম বিৰ সক্ৰিয় সদস্য আদিল হাছান, চোটা কৰিম আৰু মিজান ওৰফে কৌছেৰৰ সৈতে আৰিফুল ওৰফে আৰিফ জড়িত আছিল। তেওঁ বিস্ফোৰণটোৰ পিছত বাংগালোৰলৈ পলায় যায়। এই সময়ত বিভিন্ন ছদ্মনাম লৈ বিভিন্ন ঠাইত আত্মগোপন কৰি আছিল আৰিফে।
অসমৰ বৰপেটা জিলাৰ বাসিন্দা আৰিফ বংগৰ হুগলী জিলাত পঢ়া-শুনা কৰিছিল আৰু তেওঁ পিছত ট্ৰাকচালকৰ কামো কৰিছিল। তেতিয়াই জে এম বিৰ সংস্পৰ্শত আহে।
আৰক্ষীৰ সূত্ৰটোৱে জনোৱামতে, আৰিফে বুদ্ধগয়া বিস্ফোৰণত অভিযুক্ত হৈ আলিপুৰ জেইলত বন্দী হৈ থকা জে এম বিৰ নেতা মিজান ওৰফে কৌছেৰক জেলৰ পৰা পলুৱাই নিবলৈ আঁচনি কৰি কলকাতালৈ আহিছিল। কিন্তু তাৰ পূৰ্বেই নিজেই আৰক্ষীৰ হাতত পৰে।
কিছুদিন পূৰ্বে শিয়ালদহৰ পৰা গ্ৰেপ্তাৰ কৰা জে এম বিৰ আন এজন সদস্য মনিৰুল ইছলামৰ স্বীকাৰোক্তিৰ ভিত্তিত আৰিফুল ইছলামক ধৰিবলৈ কলকাতা আৰক্ষীৰ বিশেষ টাস্ক ফ’ৰ্চ সক্ষম হয়।
আদালতত হাজিৰ কৰাৰ পিছত আৰিফক ১ মাহৰ আৰক্ষীৰ জিম্মাত দিয়ে।
