গুৱাহাটী হৈ চলা ৰে’লসমূহত গণৰাজ্য দিৱস উপলক্ষে আন সুৰক্ষা সংস্থাবোৰৰ লগতে তালাচী অভিযান তীব্ৰ কৰি তুলিছে উত্তৰ-পূব সীমান্ত ৰে’লৱে’ই আহোম কুঁৱৰী জয়মতীৰ নামত নতুনকৈ আৰম্ভ কৰা “জয়মতী বাহিনী”য়ে।
বিশেষকৈ মহিলাসকলৰ তালাচীত দিনে নিশাই ব্যস্ত আছে যোৱা ১৯ জানুৱাৰিত আৰম্ভ কৰা কেৱল মহিলা ৰে’ল আৰক্ষীৰ বিশেষ গোটটো।
সদ্যহতে গুৱাহাটী আৰু কামাখ্যা ৰে’ল ষ্টে’চনত দায়িত্ব পালন কৰিছে বিশেষ আৰ পি এফ গোটটোৱে।
গুৱাহাটী ৰে’ল ষ্টে’চনত মুখ্য কাৰ্য্যালয়স্থিত ১২ জনীয়া গোটটোৱে ষ্টে’চনৰ লগতে ৰে’লসমূহতো নিৰাপত্তাৰ তদাৰকী কৰি আছে। এগৰাকী সহ পৰিদৰ্শক আৰু ১১ গৰাকী কনিষ্টবলক লৈ গঠিত হৈছে জয়মতী বাহিনী।
ৰে’ল কৰ্তৃপক্ষই জনোৱা মতে মহিলা আৰু শিশু সুৰক্ষাৰ ক্ষেত্ৰত বিশেষভাৱে কাম কৰিব জয়মতী বাহিনীয়ে। ১৮২ত ফ’ন কৰি যিকোনো জৰুৰীকালীন বিষয়ত গোটটোৰ পৰা সহায় বিচাৰিব পাৰে যাত্ৰীসকলে।
গুৱাহাটীৰ কামাখ্যা ৰে’ল ষ্টে’চনত যোৱা ১৯ জানুৱাৰিত জয়মতী বাহিনীৰ শুভাৰম্ভ কৰিছিল উত্তৰ-পূব সীমান্ত ৰে’লৱে’ৰ মহাপৰিদৰ্শক আৰু মুখ্য নিৰাপত্তা আয়ুক্ত বি বি মিশ্ৰাই।
