বলীউদত ‘কাঁটা লাগা গাৰ্ল’ হিচাপে পৰিচিত শ্বেফালী জাৰিৱালা মৃত্যু ঘটিছে। ৪২ বছৰ বয়সত হাৰ্ট এটেকৰ ফলত প্ৰাণ হেৰুৱালে শ্বেফালীয়ে। মডেল-অভিনেত্ৰীগৰাকীৰ আকস্মিক মৃত্যুত স্তম্ভিত হৈ পৰিছে অভিনয় জগত।
মুম্বাইৰ চিকিৎসালয়ৰ সূত্ৰ অনুসৰি শুকুৰবাৰে শ্বেফালী হাৰ্ট এটেকত আক্ৰান্ত হয়। লগে লগে স্বামীয়ে তেওঁক চিকিৎসালয়লৈ লৈ যায়। কিন্তু তেওক বচাব পৰা নগ’ল। চিকিৎসালয়ৰ ৰিচেপচনিষ্টগৰাকীয়ে জনায় যে ডাক্তৰে শ্বেফালীক অনাৰ সময়তে মৃত বুলি ঘোষণা কৰিছিল।
২০০২ চনত ডিজে ডলৰ মিউজিক ভিডিঅ’ত ‘কাঁটা লাগা’ গীতটোৰ ৰিমেক কৰি শ্বেফালীয়ে নিশাটোৰ ভিতৰতে চাঞ্চল্যৰ সৃষ্টি কৰিছিল। তেতিয়াৰ পৰাই তেওঁক ‘কাঁটা লাগা গাৰ্ল’ হিচাপে জনা যায়। উল্লেখ্য যে কাঁটা লাগা ৰিমেক গীতটোত কণ্ঠদান কৰিছিল অসমৰ কণ্ঠশিল্পী শ্বাশ্বতী ফুকনে।
সেই বছৰতে ছলমান খান আৰু অক্ষয় কুমাৰ অভিনীত ছবি ‘মুঝছে শ্বাদী কৰোগী’ত অভিনয় কৰিছিল। ‘বেবী কাম না’ ৱেব ছিৰিজত শ্ৰেয়াস তালপাড়েৰ সৈতেও স্ক্ৰীণ শ্বেয়াৰ কৰিছিল।
ইয়াৰ পিছত এই মডেলগৰাকীয়ে পুনৰবাৰ জনপ্ৰিয় ৰিয়েলিটি শ্ব’ ‘নাচ বলিয়ে’ আৰু ‘বিগ বছ’ ছিজন ১৩ত অভিনয় কৰি অনুৰাগীসকলৰ নিশাৰ টোপনি কাঢ়িছিল।
তিনি দিন পূৰ্বে ইনষ্টাগ্ৰামত ফটোশ্বুটৰ ছবি এখন পোষ্ট কৰি তেওঁৰ গ্লেমাৰাছ লুকেৰে অনুগামীসকলক চমক দিছিল। তেতিয়া কোনে জানিছিল যে সেইটোৱেই তেওঁৰ জীৱনৰ শেষ পোষ্ট হ’ব! অনুৰাগীয়ে এতিয়াও বিশ্বাস কৰিব পৰা নাই তেওঁৰ মৃত্যুৰ খবৰ।
ইতিমধ্যে শ্বেফালীৰ মৃত্যুত বিভিন্নজনে শোক প্ৰকাশ কৰিছে। তেওঁৰ সহকৰ্মীসকলেও ইমান কম বয়সতে তেওঁৰ চিৰবিদায় মানি ল’ব পৰা নাই।
