Cattle smuggling ৰাজ্যত অব্যাহত আছে গৰুৰ চোৰাং সৰবৰাহ। দেওবাৰে পুৱা কলিয়াবৰ আৰক্ষীয়ে এক গোপন সূত্ৰৰ ভিত্তিত জব্দ কৰিবলৈ সক্ষম হয় এখন গৰুভৰ্তি কন্টেইনাৰ ট্ৰাক। কন্টেইনাৰ ট্ৰাকখনত আছিল প্ৰায় ৪০টা গৰু।
জব্দকৃত কন্টেইনাৰ ট্ৰাকখনৰ নম্বৰ AS 01 BC 9943 । জব্দকৃত কন্টেইনাৰ ট্ৰাকখন বোকাখাতৰ পৰা সোণাপুৰ অভিমুখী আছিল। আৰক্ষীয়ে বৰ্তমানলৈকে কোনো লোকক আটক কৰিবলৈ সক্ষম হোৱা নাই।
কলিয়াবৰ আৰক্ষীৰ এক গোপন সূত্ৰৰ ভিত্তিত থানাৰ সন্মুখতনাকা চেকিং আৰম্ভ কৰিছিল। কিন্তু গো-সৰবৰাহকাৰীয়ে আৰক্ষীৰ এই অভিযানৰ বিষয়ে আগতীয়াকৈ উমান পাই পুনৰ কন্টেইনাৰ বাহনখন বোকাখাত অভিমুখী পথৰ কাষত ৰখাই চালক-হেণ্ডিমেনে পলায়ন কৰে।
আৰক্ষীৰ সন্দেহ অনুসৰি উক্ত কন্টেইনাৰ বাহনখন আৰক্ষী থানালৈ লৈ আহি তালাচী চলোৱাত উদ্ধাৰ হয় ৪০ টাকৈ চোৰাং গৰু।
এতিয়া প্ৰশ্ন হয় চৰকাৰৰ গো-সুৰক্ষা আইনক ভেঙুচালি কৰি ৰাজ্যত কাৰ ছত্ৰছায়াত চলি আছে গৰুৰ চোৰাং বেহা? নাকী লগাব পাৰিবনে চৰকাৰে এই দুষ্ট চক্ৰটোক? নে চলি যাব গৰুৰ চোৰাং বেহা? সেয়া অনাগত সময়তহে স্পষ্ট হ’ব।
