ৰাজ্যখনৰ কলিতা জনগোষ্ঠীক জনজাতিকৰণ প্ৰদানৰ দাবীত অহা ২৮ জানুৱাৰিত কলিতা জনগোষ্ঠী সন্মিলনে দিচপুৰ লাষ্টগে’টত ধৰ্ণা কাৰ্যসূচী পালন কৰাৰ উপৰি অৰ্ধউলংগ হৈ প্ৰতিবাদ সাব্যস্ত কৰিব।
সংবাদ মাধ্যমলৈ প্ৰেৰণ কৰা এটা বিবৃতিত সন্মিলনৰ সাধাৰণ সম্পাদক দেৱকুমাৰ ডেকাই জানিবলৈ দিয়ে যে বিগত ৩০ বছৰ ধৰি কৰি অহা আবেদন-নিবেদন তথা অনুৰোধৰ ভাষা বুজি নোপোৱা কেন্দ্ৰ তথা ৰাজ্য চৰকাৰক বাধ্য কৰাবৰ বাবে কলিতা জনগোষ্ঠী সন্মিলন, অসমে জনজাতিকৰণৰ দাবীত অহা ২৮ জানুৱাৰিত দিছপুৰ লাষ্টগে’টত ধৰ্ণা কাৰ্যসূচীৰ লগতে অৰ্ধউলংগ প্ৰতিবাদ সাব্যস্ত কৰিব।
উল্লেখযোগ্য যে যোৱা ৮ জানুৱাৰিত এক বিবৃতি যোগে সন্মিলনে শেহতীয়াভাৱে কলিতা জনগোষ্ঠীক বাদ দি অসমৰ ৬টা জনগোষ্ঠীক কেন্দ্ৰীয় চৰকাৰে জনজাতিৰ মৰ্য্যাদা দিবলৈ ওলোৱা বিষয়ত প্ৰতিক্ৰিয়া প্ৰকাশ কৰি কলিতা জনগোষ্ঠীটোক বাদ দি নতুকৈ কোনো জনগোষ্ঠীৰ জনজাতিকৰণ নকৰিবলৈ সকীয়াই দিছিল।
বিবৃতিটোত অসমৰ প্ৰাচীনতম জনগোষ্ঠীটো, যিটো জনগোষ্ঠীৰ মাজতে সৰ্বাধিক নিবনুৱা আছে আৰু লগতে অনগ্ৰসৰো, সেই কলিতাসকলেই জনজাতিকৰণৰ প্ৰথম উপযুক্ত দাবীদাৰ হোৱা সত্ত্বেও চৰকাৰে পদে পদে এনেদৰে বঞ্চিত কৰি আহিছে বুলি অভিযোগ কৰিছিল।
ইপিনে, সন্মিলনৰ যৌথ সংগ্ৰাম সমিতিৰ সভাপতি ডাঃ দীপক মজুমদাৰে অহা ২৮ জানুৱাৰিৰ প্ৰতিবাদী কাৰ্যসূচীত সকলো কলিতা ৰাইজক সহযোগ কৰি কাৰ্যসূচী সফল কৰি তুলিবলৈ আহ্বান জনাইছে।
