শক্তিপীঠ কামাখ্যাৰ অম্বুবাচী মেলাৰ বাবে প্ৰশাসন আৰু দেৱালয় কৰ্তৃপক্ষই যাৱতীয় প্ৰস্তুতি প্ৰায় সম্পূৰ্ণ কৰিছে। ২২ জুনৰ পৰা আৰম্ভ হ’বলগীয়া মেলাৰ বাবে ইতিমধ্যে ভাৰতৰ বিভিন্ন প্ৰান্তৰ পৰা যথেষ্ট সংখ্যক সাধু-সন্যাসী আৰু ভক্ত আহি কামাখ্যাত উপস্থিত হৈছেহি।
পঞ্জিকা অনুসৰি ২২ জুনৰ নিশা ১ বাজি ৪০ মিনিট ১৮ ছেকেণ্ডত অম্বুবাচীৰ প্ৰবৃত্তি ঘটিব। গতিকে সেইদিনাৰ পৰা ২৫ জুনলৈ মন্দিৰৰ মূল প্ৰৱেশদ্বাৰ বন্ধ থাকিব বুলি কামাখ্যা দেৱালয়ৰ দলৈ মোহিত চন্দ্ৰ শৰ্মাই জানিবলৈ দিয়ে। ২৬ জুনত অম্বুবাচীৰ নিবৃত্তিৰ পাছত পুৱা ৬ বজাত মন্দিৰৰ দুৱাৰ দেৱী দৰ্শন আৰু পূজা অৰ্চনাৰ বাবে পুনৰ খোল খাব বুলিও তেওঁ জানিবলৈ দিয়ে।
‘মেলাৰ দিনকেইটাত দেশ-বিদেশৰ পৰা অহা ভক্ত সকলৰ সুবিধাৰ্থে আৰু মেলা সুচাৰুৰূপে সম্পন্ন কৰাৰ উদ্দেশ্য জিলা প্ৰশাসন, মহানগৰ আৰক্ষী আৰু চৰকাৰৰ বিভিন্ন বিভাগৰ সহযোগত দেৱালয় কৰ্তৃপক্ষই বিভিন্ন ব্যৱস্থা লৈছে। খাদ্য, ভক্ত সকলৰ বাবে শিবিৰ, খোৱা পানী, স্বাস্থ্যকেন্দ্ৰ, স্বেচ্চাসেৱককে ধৰি সকলো খিনি ইতিমধ্যে প্ৰায় সাজু হৈছে’, দলৈ মোহিত চন্দ্ৰ শৰ্মাই কয়।
যিহেতু নিশাহে অম্বুবাচীৰ প্ৰবৃত্তি ঘটিব গতিকে ২২ জুনৰ দিনৰ ভাগত নিয়মিত পূজা-অৰ্চনা চলিব বুলিও দলৈয়ে প্ৰকাশ কৰে। একেদৰে ২৬ জুনৰ দিনা মন্দিৰ পৰিস্কাৰ কৰাৰ পাছত দেৱীৰ পূজা অৰ্চনা হ’ব বুলিও তেওঁ জানিবলৈ দিয়ে।
অম্বুবাচী মেলাৰ বাবে এইবাৰ বিগত ১০ জুনৰ পৰাই সাধু-সন্যাসীৰ আগমণ আৰম্ভ হৈছে। মূলতঃ বংগ, ওড়িষা, উত্তৰ ভাৰতৰ বিভিন্ন ৰাজ্য, পাঞ্জাৱ, জম্মু আৰু কাশ্মীৰ আদিৰ পৰা প্ৰায় তিনি হাজাতকৈ অধিক সাধু আহি কামাখ্যাত উপস্থিত হৈছে। ইয়াৰ উপৰিও আৰু যথেষ্ট সংখ্যক ভক্ত আৰু সাধু-সন্যাসী আহি থকা বুলি কামাখ্যা মন্দিৰ কৰ্তৃপক্ষই জানিবলৈ দিছে। তেওঁলোকক কামাখ্যা ধামৰ আখৰা, বলিঘৰ আদিৰ উপৰিও ভূৱনেশ্বৰী মন্দিৰ, কোটিলিংগ, ভূতনাথকে ধৰি নীলাচল পৰ্বতৰ নামনিৰ কেইবাটাও মন্দিৰত থকাৰ থকাৰ ব্যৱস্থা কৰা বুলি দেৱালয় কৰ্তৃপক্ষই জানিবলৈ দিছে।
মেলাৰ দিনকেইটাত পৰিস্কাৰ পৰিচন্নতাত বিশেষ গুৰুত্ব দিয়া বুলিও দেৱালয় কৰ্তৃপক্ষই জানিবলৈ দিয়ে। ইয়াৰ উপৰিও কৰ্তৃপক্ষই ভক্তসকলৰ লগতে মেলাত ব্যৱসায়ৰ বাবে যোৱা সকলো ব্যৱসায়ীকে প্লাষ্টিক বৰ্জন কৰিবলৈ আহ্বান জনাইছে। লগতে মন্দিৰলৈ যোৱা পথত বিভিন্ন স্থানত থাকিবলগীয়া জোতা-চেণ্ডেল ৰখাৰ নিৰ্দিষ্ট স্থানতহে জোতা-চেণ্ডেল ৰাখিবলৈ ভক্তসকললৈ কৰ্তৃপক্ষই আহ্বান জনাইছে।
