ক’লৈ নিয়া হ’ল হাজোৰ বিষ্ণুপুস্কৰ পুখুৰীৰ বৃহৎ বৃহৎ মাছ সমূহ?
সাম্ভাব্য বিপদৰ পূৰ্বে তৎপৰ হৈ পৰিছে কামৰূপ জিলা প্ৰশাসন। প্ৰথম বাৰিষাৰ বৰষুণতে বিগত কেইবাটাও বছৰত হাজোৰ হয়গ্ৰীৱ মাধৱ মন্দিৰত থকা ঐতিহাসিক বিষ্ণুপুস্কৰ পুখুৰীত মৃত্যু হৈছিল মাছৰ।
এইবেলি যেন বিপদ হোৱাৰ পূৰ্বেই তৎপৰ হৈছে কামৰূপ জিলা প্ৰশাসন। হাজোৰ ঐতিহাসিক শ্ৰীশ্ৰী হয়গ্ৰীৱ মাধৱ মন্দিৰৰ বিষ্ণুপুস্কৰ পুখুৰীৰ ৩৪ টাকৈ বৃহৎ আকাৰৰ মাছ স্থানান্তৰ কৰা হ’ল আমিনগাঁৱলৈ।
আমিনগাঁৱৰ কামৰূপ জিলা উপায়ুক্ত কাৰ্য্যালয়ৰ গাতে লাগি থকা শৰাইঘাট সৰোবৰলৈ স্থানান্তৰ কৰা হৈছে এই বৃহৎ আকাৰৰ মাছ কেইটা।
প্ৰতিবছৰে শ্ৰীশ্ৰী হয়গ্ৰীৱ মাধৱ মন্দিৰৰ বিষ্ণুপুস্কৰ সৰোৱৰত অক্সিজেনৰ অভাৱত প্ৰকাণ্ড প্ৰকাণ্ড মাছৰ মৃত্যু হৈ আহিছে।
সেয়েহে এইবাৰ কামৰূপ জিলা প্ৰশাসনৰ দ্বাৰা সৰোবৰটোৰ বৃহৎ বৃহৎ আকাৰৰ মাছসমূহ শৰাইঘাট সৰোবৰলৈ স্থানান্তৰ কৰা হৈছে।
পৰ্যায়ক্ৰমে মাছসমূহ শৰাইঘাট সৰোবৰলৈ স্থানান্তৰ কৰি বিষ্ণুপুস্কৰ পুখুৰীটো পৰিষ্কৰণ ব্যৱস্থা কৰা হ’ব, তাৰ পিছত পুনৰ বিষ্ণু পুষ্কৰলৈ অনা হ’ব মাছখিনি।
কিন্তু মন্দিৰ পৰিচালনা সমিতিক বিষ্ণু পুষ্কৰৰ মাছসমূহ স্থানান্তৰৰ ক্ষেত্ৰত কোনো খবৰ নিদিয়াত এতিয়া প্ৰতিক্ৰিয়া প্ৰকাশ কৰিছে মন্দিৰ পৰিচালনা সমিতিয়ে।