‘’সকলো পূজা মণ্ডপতে থাকিব লাগিব চি চি টিভি কেমেৰা আৰু লগতে চাফ-চিকুনতাৰ প্ৰতি দিব লাগিব বিশেষ ধ্যান।‘’
বৃহস্পতিবাৰে আগন্তুক দূৰ্গ্যোৎসৱক লৈ মহানগৰ জিলা উপায়ুক্ত বিশ্বজিৎ পেগুৰ অধ্যক্ষতাত উপায়ুক্তৰ কাৰ্যালয়ৰ এক গুৰুত্বপূৰ্ণ বৈঠকত লোৱা হয় এই সিদ্ধান্ত।
সভাত উপায়ুক্ত গৰাকীয়ে পূজাৰ সময়ত বিভিন্ন বিভাগ সমূহে পালন কৰিব লগা দায়িত্ব সমূহৰ বিষয়ে বিস্তাৰিত ভাৱে বাখ্যা আগবঢ়ায়।
উপায়ুক্ত গৰাকীয়ে সংবাদমেলযোগে এই সকলোবোৰ কথা সদৰী কৰে।
আগন্তুক পূজাৰ সময়ত যাতে মহানগৰীক সম্পূৰ্ণৰূপে প্ৰদূষণমুক্ত কৰি গঢ়ি তুলিব পাৰি তাৰ প্ৰতি দৃষ্টি ৰাখি জিলা প্ৰশাসনে পূজা মণ্ডপ সমূহত ক্ষতিকাৰক পলিথিনৰ লগতে থাৰ্মোকলৰ সামগ্ৰী ব্যৱহাৰত নিষেধাজ্ঞা আৰোপ কৰিছে।
তদুপৰি সকলো পূজা কমিটিয়ে যাতে পূজা মণ্ডপসমূহ সম্পূৰ্ণৰূপে প্লাষ্টিক মুক্ত কৰি গঢ়ি তোলে তাৰ প্ৰতি লক্ষ্য ৰাখিবলৈ সকলো পূজা কমিটিকে আহ্বান জনায়।
আনহাতে, এই সভাতে সকলো পূজা মণ্ডপতে সুৰক্ষা আৰু দুৰ্যোগ প্ৰশমন ব্যৱস্থাৰ ওপৰত বিশদভাৱে আলোচনা কৰা হয়।
সকলো পূজা মণ্ডপতে পৰ্যাপ্ত পোহৰৰ ব্যৱস্থা কৰিবৰ বাবে প্ৰশাসনে নিৰ্দেশনা জাৰি কৰে।
ইপিনে, পূজাৰ সময়ত যাতে সকলো চৰকাৰী চিকিৎসালয়ত চিকিৎসক উপস্থিত থাকে তাৰ প্ৰতি দৃষ্টি ৰাখিবলৈ জিলা উপায়ুক্ত গৰাকীয়ে স্বাস্থ্য বিভাগক নিৰ্দেশনা দিয়ে।
তদুপৰি, পূজাৰ সময়ত সকলো এম্বুলেন্স আৰু জৰুৰীকালীন সেৱা যাতে সকলো সময়তে উপলব্ধ হয় তাৰ বাবেও উপায়ুক্ত গৰাকীয়ে স্বাস্থ্য বিভাগক নিৰ্দেশনা জাৰি কৰিছে।
আনহাতে, পূজাৰ সময়ত যাতে বিদ্যুৎ, খোৱা পানী সকলো সময়তে উপলব্ধ হয় তাৰ প্ৰতিও দৃষ্টি ৰাখিবৰ বাবে অসম বিদ্যুৎ বিতৰণ কোম্পানী আৰু জলসম্পদ বিভাগক নিৰ্দেশনা জাৰি কৰিছে।
