ৰাজ্যখনৰ বহু প্ৰতিভাই নিজ অধ্যাৱসায় আৰু সাধনাৰ জৰিয়তে ৰাষ্ট্ৰীয় পৰ্যায়ত সুখ্যাতি অৰ্জন কৰাই নহয় নিজৰ এক সুকীয়া স্থান দখল কৰিবলৈ সক্ষম হৈছে৷ শেহতীয়াকৈ মাৰ্ঘেৰিটাৰ এগৰাকী যুৱতীয়ে নিজ অভিনয় প্ৰতিভাৰ জৰিয়তে Sony TVৰ হিন্দী চিৰিেয়েলত মুখ্য ভূমিকাত অভিনয় কৰাৰ সুবিধা লাভ কৰি ৰাজ্যলৈ কঢ়িয়াই আনিছে বিশেষ গৌৰৱ৷
Sony TV ৰ “BEYHADH-2” চিৰিয়েলখনৰ “অনন্যা“ নামৰ মূল নাৰী চৰিত্ৰটোত অভিনয় কৰিছে তিনিচুকীয়া জিলাৰ মাৰ্ঘেৰিটাৰ গৌতম বৰুৱা নাঙ্গীয়া আৰু মনিকা বৰুৱা নাঙ্গীয়াৰ কন্যা কংগন বৰুৱা নাঙ্গীয়াই৷২৩ বছৰ বয়সত ভৰি দিয়া কংগনে সৰুৰে পৰা অভিনয়ৰ সৈতে জড়িত হ’বলৈ ইচ্ছা প্ৰকাশ কৰিছিল বুলি পিতৃ-মাতৃয়ে সংবাদমাধ্যমক জানিবলৈ দিয়ে৷
কংগনে বলিউডৰ অভিনেতা অনুপম খেৰৰ ওচৰত ছয়মাহ অভিনয়ৰ পাঠ্যক্ৰম গ্ৰহণ কৰিছিল৷ দেৱীচৰণ বৰুৱা, জাহ্নু বৰুৱাৰ পৰিয়ালৰ সম্পৰ্কীয় জীয়ৰী কংগনে জীৱনৰ প্ৰথমটো বিজ্ঞাপনত চুপাৰষ্টাৰ শ্বাহৰুখ খানৰ সৈতে অভিনয় কৰিছিল৷
ইংৰাজী নৱবৰ্ষত মাত্ৰ দুটা দিনৰ বাবে ঘৰলৈ অহা কংগনে চিৰিয়েলখনৰ এশটা খণ্ডৰ বাবে চুক্তিবদ্ধ হৈছে। ইতিমধ্যে ২৭টা খণ্ডৰ চুটিং আৰু ২৩টা খণ্ড সম্প্ৰচাৰ হৈছে৷ অভিনয়ৰে লগতে ভাৰতীয় সংগীতো সাধনা কৰে কংগনে৷
সংবাদমাধ্যমৰ জৰিয়তে অসমবাসীক ইংৰাজী নৱবৰ্ষৰ শুভকামনা জ্ঞাপন কৰাৰ লগতে কংগনে সাম্প্ৰতিক অসমৰ পৰিস্থিতিত শান্তিপূৰ্ণ আন্দোলন কৰিবলৈ অসমৰ ৰাইজক আহ্বান জনায়৷ মুম্বাইতো তেওঁলোকে শান্তিপূৰ্ণ আন্দোলনত অংশগ্ৰহণ কৰে বুলি জনায়৷
অসমৰ নৱপ্ৰজন্মৰ মাজত প্ৰচুৰ সম্ভাৱনা থকা বুলি উল্লেখ কৰি অভিনেত্ৰী গৰাকীয়ে একাগ্ৰতা, অধ্যাৱসায় তথা সঠিক পথত আগবাঢ়িলে সুখ্যাতিয়ে লগ দিব বুলি অসমৰ নৱপ্ৰজন্মৰ প্ৰতি পৰাৰ্মশ প্ৰদান কৰে৷ জীৱনত আগবাঢ়িবলৈ কোনো চমু বাট নাই বুলিও উল্লেখ কৰে কংগনে৷
আনহাতে তিনিচুকীয়া জিলা সাংবাদিক সংস্থাৰ সাধাৰণ সম্পাদক ৰাণাজ্যোতি নেওগ, মাৰ্ঘেৰিটা সাংবাদিক সংস্থাৰ ভাঃ সম্পাদক তপন দে, তথ্য আৰু প্ৰচাৰ সম্পাদক মানস প্ৰতিম গগৈসহ সাংবাদিকৰ এটা দলে আজি কংগন বৰুৱা নাঙ্গীয়াৰ এই সাফ্যলত অভিনেত্ৰী গৰাকীৰৰ মাৰ্ঘেৰিটা চাৰিআলিস্থিত বাসগৃহত উপস্থিত হৈ শুভেচ্ছা জ্ঞাপন কৰে৷
