শ্ৰমিকক মৰণফান্দত পেলাই ‘পলাল’ কণিকা! দেশ এৰি বিদেশ পালেগৈ দেৱলালৰ পত্নী

অবৈধ কয়লা খনিৰ বহু শ্ৰমিকৰ মৃত্যুৰ কাৰক হৈ পৰা বুলি চৰ্চা চলি থকাৰ সময়তে ডিমা হাছাওৰ পৰা পলায়ন কৰিছে অভিযুক্ত কণিকা হোজাইয়ে। ডিমা হাছাও স্বায়ত্ত শাসিত পৰিষদৰ মুখ্য কাৰ্যবাহী সদস্য দেৱলাল গাৰ্লোচাৰ পত্নী কণিকা হোজাইয়ে গ্ৰেপ্তাৰৰ হোৱাৰ ভয়তে পলায়ন কৰা বুলি চৰ্চা চলিছে।

এক নিৰ্ভৰযোগ্য সূত্ৰৰ উদ্ধৃতিৰে  দৈনিক বাতৰি কাকত আমাৰ অসমে প্ৰকাশ কৰিছে যে দেৱলালৰ পত্নী কণিকাই ডিমা হাছাও জিলা বা অসমেই নহয় দেশ এৰি বিদেশলৈ পলায়ন কৰিছে। গ্ৰেপ্তাৰ হোৱাৰ আগতীয়া উমান পাই কণিকাই দেশ এৰি পলায়ন কৰা বুলি চৰ্চা চলিছে।

উল্লেখ্য যে, ১০ জনৰো অধিক শ্ৰমিক আৱদ্ধ হৈ মৃত্যু মুখত পৰা কয়লা কোৱেৰীটোৰ অনুজ্ঞাপত্ৰ মুখ্য কাৰ্যবাহী সদস্য দেৱলাল গাৰ্চোলাৰ পত্নী কণিকা হোজাইৰ নামত আছে।

ইতিমধ্যে হিমন্ত বিশ্ব শৰ্মাৰ চৰকাৰে দেৱলাল গাৰ্চোলাৰ পত্নীক সুৰক্ষা দিবলৈ চেষ্টা কৰাৰ অভিযোগো উত্থাপিতো হৈছে। কণিকা গাৰ্চোলাক সুৰক্ষা দিয়াৰ স্বাৰ্থতে দুজন মহৰীক গ্ৰেপ্তাৰ কৰা হৈছে বুলিও চৰ্চা চলিছে। অৰ্থাৎ পুঠি খলিহনাক ধৰি ৰৌ বৰালিক বাছি যাবলৈ ব্যৱস্থা কৰি দিয়াৰো গুৰুতৰ অভিযোগ উত্থাপন হৈছে।

এনে এক সময়তে গ্ৰেপ্তাৰৰ ভয়ত কণিকা গাৰ্লোচাই পলায়ন কৰা খবৰ প্ৰকাশ পাইছে আমাৰ অসম কাকতত। কাকতখনত কোৱা হৈছে যে সংবাদ মাধ্যমৰ অহৰহ বাতৰি পৰিৱেশনৰ ফলত গ্ৰেপ্তাৰ হোৱাৰ ভয়ত কেৱল জিলা অথবা অসমেই নহয় দেশ এৰি বহিঃদেশলৈ গোপনে গুচি গৈছে দেৱলাল পত্নী কণিকা হোজাই। অসম চৰকাৰে এই ঘটনাৰ সংক্ৰান্তত কেৱল দুজন মহৰীক গ্ৰেপ্তাৰ কৰি বিষয়টো গাপ দিবলৈ চেষ্টা চলোৱাৰ অভিযোগ উঠিছে যদিও বহু দল-সংগঠনে বিষয়টো সন্দৰ্ভত উচ্চ ন্যায়ালয়ৰ কাষ চপাৰ সম্ভাৱনাৰ প্রতি লক্ষ্য ৰাখি দেৱলাল পত্নীয়ে নিৰাপদ দূৰত্বত অৱস্থান কৰা বুলি সূত্ৰটোৱে দাবী কৰিছে।

ইফালে অভিশপ্ত খনিতটোত শ্ৰমিক আৱদ্ধ হোৱা ঘটনাই আঠ দিন স্পৰ্শ কৰিলে। এতিয়ালৈকে আৱদ্ধ হৈ পৰা শ্ৰমিকসকলক উদ্ধাৰৰ কাৰ্য সম্পূৰ্ণ হোৱা নাই। উদ্ধাৰ অভিযানৰ সপ্তম দিনালৈকে মাত্ৰ ৪ গৰাকী শ্ৰমিকৰ মৃতদেহহে উদ্ধাৰ কৰিবলৈ সক্ষম হৈছে উদ্ধাৰকাৰী দলে। চৰকাৰী তথ্যৰ মতে আৰু ৫ গৰাকী শ্ৰমিক আৱদ্ধ হৈ আছে খনিটোত। ইফালে বেচৰকাৰী তথ্যৰ মতে খনিটোত ১০ গৰাকীৰো অধিক শ্ৰমিক আৱদ্ধ হৈ পৰিছিল। চৰকাৰে  শ্ৰমিকৰ তথ্য গাপ দিয়া বুলি এতিয়া চৰ্চা চলিছে। ইফালে খনিটোৰ পানী নিষ্কাশনতো ব্যৰ্থ হৈছে অভিযানকাৰী দল। পানী নিষ্কাশন কৰা মেচিন বন্ধ কৰিলেই খনিটোত লগে লগে জলস্তৰ বৃদ্ধি হৈ পৰে। যাৰ ফলত উদ্ধাৰ অভিযান ব্যাহত হৈছে। এনে পৰিপ্ৰেক্ষিতত আৱদ্ধ হৈ থকা শ্ৰমিকৰ উদ্ধাৰৰ অভিযানক লৈ সংশয়ৰো সৃষ্টি হৈছে।