তেওঁ মালালা নহয়। কেতিয়াও নহ’ব। কাৰণ তেওঁ কেতিয়াও নিজৰ দেশ এৰি পলায়ন কৰিব নালাগে। জন্মভূমি কাশ্মীৰত তেওঁ সুৰক্ষিত। তেওঁ কাশ্মীৰত স্বাধীনভাৱে চলাফুৰা কৰিব পাৰে। শেহতীয়াকৈ ব্ৰিটিছ সংসদ ভৱনত ইয়ানা মিৰৰ ভাষণ ছ’চিয়েল মিডিয়াত ভাইৰেল হৈ পৰিছে।
ইয়ানাৰ ভাষণক লৈ চৌদিশে চৰ্চা চলি আছে। ছচিয়েল মিডিয়াত একপ্ৰকাৰ ধুমুহাৰ সৃষ্টি কৰিছে তেওঁৰ সাৱলীল বক্তৱ্যই। ইয়ানা মিৰ ভাৰতৰ কাশ্মীৰৰ বাসিন্দা। তেওঁ কাশ্মীৰতে ডাঙৰ-দীঘল হৈছে। তেওঁ কাশ্মীৰৰ এগৰাকী সমাজকৰ্মী।
ব্ৰিটিছ সংসদ ভৱনত দিয়া সেই ভাইৰেল ভাষণত ইয়ানাই কোৱা শুনা গৈছে, ‘মই কোনো মালালা ইউছাফজাই নহয়। কাৰণ মই মোৰ দেশ ভাৰতত স্বাধীন আৰু নিৰাপদ। ভাৰতৰ অংগ মোৰ জন্মভূমি কাশ্মীৰত মই স্বাধীন আৰু নিৰাপদ। মই কেতিয়াও নিজৰ দেশ এৰি আপোনাৰ দেশত আশ্ৰয় ল’ব নালাগিব। মই কেতিয়াও মালালা ইউছুফজাই নহওঁ।’
উল্লেখ্য যে মালালা ইউছুফজাই বৰ্তমান ব্ৰিটেইনত থাকে। মহিলাৰ শিক্ষাৰ ওপৰত তালিবানী নিষেধাজ্ঞাৰ বিৰুদ্ধে থিয় দিছিল মালালা। আৰু তাৰ বাবেই ২০১২ চনত পাকিস্তানৰ শ্বাট উপত্যকাত তালিবানে মালালাক আক্ৰমণ কৰিছিল। মালালাক লক্ষ্য কৰি গুলীওৱা হৈছিল। সেই আক্ৰমণৰ পিছত মালালা ব্ৰিটেইনলৈ গুচি যায় আৰু অক্সফৰ্ড বিশ্ববিদ্যালয়ত অধ্যয়ন কৰে। ২০১৪ চনত শান্তিৰ নোবেল বঁটা লাভ কৰা আটাইতকৈ কম বয়সীয়া মহিলা হিচাপে পৰিগণিত হয় মালালা।
কিন্তু মালালাই নিজৰ দেশৰ পৰা পলায়ন কৰি ব্ৰিটেইনত বহি ভাৰতক লৈ যি ধৰণৰ মন্তব্য কৰে তাক লৈ কাশ্মীৰী কন্যা ইয়ানা মিৰৰ তীব্ৰ আপত্তি আছে। সেই ভাইৰেল ভাষণত ইয়ানাই কোৱা শুনা গৈছে, “কিন্তু মোৰ আপত্তি আছে, মালালা ইউছুফজাই মোৰ দেশক অপমান কৰিছে। মোৰ প্ৰগতিশীল মাতৃভূমিক ‘নিপীড়িত’ বুলি কৈছে। ছ’চিয়েল মিডিয়া আৰু বিদেশী মিডিয়াত এনে সকলো ‘টুলকিট মেম্বাৰ’ৰ প্ৰতি মোৰ আপত্তি আছে, যিসকলে ভাৰতীয় কাশ্মীৰ কেনেকুৱা কেতিয়াও দেখা নাই, কিন্তু ‘নিপীড়ণ’ৰ কাহিনী সৃষ্টি কৰি আছে৷”
I am not a Malala
I am free and safe in my homeland #Kashmir, which is part of India
I will never need to runaway from my homeland and seek refuge in your country: Yana Mir @MirYanaSY in UK Parliament. #SankalpDiwas pic.twitter.com/3C5k2uAzBZ
— Sajid Yousuf Shah (@TheSkandar) February 22, 2024
কাশ্মীৰ উপত্যকাৰ পৰা ওলাই অহা প্ৰথমগৰাকী ভাৰতীয় মহিলা ব্লগাৰ হৈছে ইয়ানা মিৰ। ব্ৰিটিছ সংসদ ভৱনত দিয়া সেই অগ্নিময় ভাষণত ইয়ানাই সকলোকে আহ্বান জনায় যাতে ধৰ্মৰ ভিত্তিত ভাৰতীয়ক মেৰুকৰণৰ চেষ্টা বন্ধ কৰে। উদাত্ত ভাষণৰ শেষত তেওঁ কোৱা শুনা গৈছে, “আমি আমাক কোনো কাৰণতে (ঐক্য) ভাঙিব নিদিওঁ। আশাকৰোঁ ব্ৰিটেইন আৰু পাকিস্তানত বাস কৰা কিছুমান মানুহে মোৰ দেশক অপমান কৰা বন্ধ কৰিব।’
