Kerala to London on bicycleচাইকেলেৰে কেৰালাৰ পৰা লণ্ডনলৈ ৩০,০০০ কিলোমিটাৰৰ যাত্ৰা! ৪৫০ দিনত উপস্থিত হ’ব লণ্ডনত

লণ্ডনলৈ চাইকেলেৰে যাত্ৰা আৰম্ভ কৰিলে ভাৰতৰ কেৰালাৰ এজন লোকে।চাইকেল চলাই লোকজনে ৩০,০০০ কিলোমিটাৰ অতিক্ৰম কৰিবলৈ থিৰাং কৰিছে। কেৰালাৰ এই লোকজনে ৩৫ খন দেশ চাইকেল চলাই অতিক্ৰম কৰি লণ্ডনত উপস্থিত হোৱাৰ সিদ্ধান্ত লৈছে।

এই লোক জনৰ নাম ফৈজ আশ্ৰাফ আলী। লোকজনে দেশৰ স্বাধীনতাৰ ৭৫ সংখ্যক বাৰ্ষিকী উপলক্ষে “আজাদী কা অমৃত মহোৎসৱ” উদযাপনৰ অংশ হিচাপে ইয়াৰ কেৰালাৰ ৰাজধানীৰ পৰা লণ্ডনলৈ তেওঁৰ চাইকেল অভিযান আৰম্ভ কৰে৷ কেৰালাৰ শিক্ষা মন্ত্ৰী ভি শিৱানকুট্টিয়ে এক অনুষ্ঠানত চাইকেল ভ্ৰমণৰ শুভাৰম্ভ কৰে। ইকো হুইলাৰ্ছে “ফ্ৰম হাৰ্ট টু হাৰ্ট” শ্লোগানেৰে আয়োজন কৰা এই চাইকেল যাত্ৰা সম্পূৰ্ণ হ’বলৈ কমেও ৪৫০ দিন লাগিব।, এই অভিযানৰ উদ্দেশ্য হৈছে বিশ্বৰ দেশসমূহৰ মাজত শান্তি স্থাপনৰ বাৰ্তা বহন কৰা ।

আলিয়ে ৩৫ খন দেশৰ মাজেৰে ৩০,০০০ কিলোমিটাৰ অতিক্ৰম কৰিব আৰু ৪৫০ দিনৰ ভিতৰত লণ্ডনত উপস্থিত হ’ব বুলি আশা কৰা হৈছে। যিহেতু পাকিস্তান আৰু চীনে তেওঁক ভিছা প্ৰদান কৰা নাছিল, চাইকেল আৰোহীজনে তেওঁৰ ভ্ৰমণৰ সময়ত এই দেশবোৰৰ মাজেৰে নোযোৱাৰ সিদ্ধান্ত লৈছে।

চাইকেলেৰে মুম্বাই পোৱাৰ পিছত আলীয়ে ওমানলৈ বিমানত উঠিব আৰু তাৰ পৰা তেওঁ যাত্ৰা অব্যাহত ৰাখিব । চৌদি আৰৱ, বাহৰেইন, কুৱেইট, ইৰাক, ইৰাণ আৰু তুৰ্কীকে ধৰি দেশসমূহৰ মাজেৰে তেওঁ চাইকেলেৰে ভ্ৰমণ কৰিব। তেওঁ ইউৰোপীয় দেশসমূহৰ মাজেৰেও চাইকেল চলাই যাব।

লণ্ডন পোৱাৰ আগতে বুলগেৰিয়া, ৰোমানিয়া, ইউক্ৰেইন, অষ্ট্ৰিয়া, ইটালী, জাৰ্মানী আৰু ফ্ৰান্সকে ধৰি ভালে কেইখন দেশৰ মাজেৰে তেওঁ চাইকেল চলাই যাব। ৩৪ বছৰীয়া যুৱকজনে উইপ্ৰ’ত চাকৰি কৰিছিল যদিও এই অভিযানৰ বাবেই তেওঁ চাকৰি এৰি দিছে। ২০১৯ চনত তেওঁৰ কোজিকোডৰ পৰা ছিংগাপুৰলৈ চাইকেল চলাই গৈছিল।ৰোটাৰী ইণ্টাৰনেচনেলে আলীৰ যাত্ৰাত সহায় কৰিছে।