অৱশেষত কংগ্ৰেছৰ সভাপতি পদৰ দৰে গুৰু দায়িত্ব গ্ৰহণ কৰিলে মল্লিকাৰ্জুন খাৰ্গেই। ২২ বছৰৰ মূৰত অনুষ্ঠিত নিৰ্বাচনত
মল্লিকাৰ্জুন খাৰ্গেই শশী থাৰুৰক পৰাস্ত কৰি কংগ্ৰেছৰ সভাপতি হিচাবে নিৰ্বাচিত হৈছিল।খাৰ্গেই নিৰ্বাচনত থাৰুৰতকৈ ৭,০০০ তকৈও অধিক ভোটত জয়ী হৈছিল।
শেহতীয়াকৈ তেওঁ আনুষ্ঠানিকভাৱে কংগ্ৰেছৰ ৰাষ্ট্ৰীয় সভাপতিৰ দায়িত্ব গ্ৰহণ কৰে। মল্লিকাৰ্জুন খাৰ্গেৰ শপত গ্ৰহণ অনুষ্ঠানত উপস্থিত থাকে কংগ্ৰেছ নেত্ৰী ছোনিয়া গান্ধী আৰু প্ৰিয়ংকা গান্ধী, ৰাহুল গান্ধীৰ লগতে আন বহু নেতা।ইপিনে কংগ্ৰেছৰ সভাপতি পদটো এইবাৰ গান্ধী পৰিয়ালৰ হাতৰ পৰা আনৰ হাতলৈ গৈছে। গান্ধী পৰিয়ালৰ কোনো সদস্যই কংগ্ৰেছৰ সভাপতি নিৰ্বাচনত প্ৰতিদ্বন্দ্বিতা কৰা নাছিল। ইয়াৰ মাজতে অভিযোগ উঠিছে সভাপতি যিয়েই নহওঁক তেওঁ ছোনিয়া গান্ধীৰ মতেই চলিব লাগিব। কিন্তু এনে ধাৰণাক নস্যাৎ কৰিছে সভাপতি পদৰ প্ৰাৰ্থী মল্লিকাৰ্জুন খাৰ্গেই। মল্লিকাৰ্জুন খাৰ্গেই ছোনিয়া গান্ধীৰ ৰিম’ট কণ্ট্ৰোল হৈ নপৰে বুলি মন্তব্য কৰিছে।
খাৰ্গেই কয় যে ভাৰতীয় জনতা পাৰ্টিয়ে ভবাৰ দৰে তেওঁৰ দলত “ৰিম’ট কণ্ট্ৰোল” বুলি কোনো বস্তু নাই, য’ত প্ৰতিজন সভাপতিক “সহমত”ৰ জৰিয়তে বাছনি কৰা হয়। খাৰ্গেই দৃঢ়তাৰে কয় যে যদি তেওঁ পুৰণি দলটোৰ মুৰব্বী হয়, তেন্তে ৰিম’ট কণ্ট্ৰোল তেওঁৰ সৈতেহে থাকিব। উল্লেখ্য বিজেপিয়ে এইবুলি দাবীকৰি আহিছে যে খাৰ্গে এই পদত নিৰ্বাচিত হোৱাৰ পিছত ছোনিয়া গান্ধীৰ “ৰিম’ট কণ্ট্ৰোল” আৰু “প্ৰক্সি” হিচাপে কাম কৰিব।
