কোনো জাতীয় সংগঠনৰ কাৰোৰে ওপৰত যেন ভৰসা নাইকিয়া হৈছে। বিজেপিক উৎখাত কৰাৰ লক্ষ্য আৰু উদ্দেশ্য একে হ’লেও এতিয়া যেন নতুন নতুন ৰাজনৈতিক দল গঠনৰ প্ৰতিযোগিতাত নামিছে একাংশ জাতীয় দল-সংগঠন।
শনিবাৰে কৃষক মুক্তি সংগ্ৰাম সমিতিৰ কেন্দ্ৰীয় কাৰ্যালয়ত এক সংবাদমেল সম্বোধন কৰি এক নতুন ৰাজনৈতিক দল গঠন কৰাৰ কথা ঘোষণা কৰে সংগঠনটোৰ সভাপতি ভাস্ক’ ডি শইকীয়াই।
কিছু দিন পূৰ্বলৈকে কৃষক মুক্তি সংগ্ৰাম সমিতি, অনুসূচিত জাতি যুৱ ছাত্ৰ পৰিষদকে ধৰি ৭০ সংগঠনৰ নেতৃত্বত এটা ৰাজনৈতিক দল গঠন কৰিব বুলি চৰ্চা লাভ কৰিছিল তেনে সময়তে কৃষক মুক্তি সংগ্ৰাম সমিতিয়ে নিজাববীয়াকৈ ৰাজনৈতিক দল গঠন কৰিব বুলি কৰা ঘোষণাই বিশেষ তাৎপৰ্য বহন কৰিছে।
৭০ সংগঠনৰ নেতৃত্বত সকলো সমভাৱাসম্পন্ন চিন্তাধাৰাৰ জাতীয় দল সংগঠনৰ সমৰ্থনত অখিল গগৈক হাইকামাণ্ড হিচাপে লৈ ৰাজনৈতিক দল গঠনৰ চৰ্চা চলি থকাৰ সময়তে কৃষক মুক্তি সংগ্ৰাম সমিতিয়ে নিজাববীয়াকৈ ৰাজনৈতিক দল গঠনৰ কথা ঘোষণা কৰে।
এই সন্দৰ্ভত প্ৰতিক্ৰিয়া প্ৰকাশ কৰি ৭০ সংগঠনৰ অন্যতম নেতৃত্ব তথা অনুসূচিত জাতি যুৱ ছাত্ৰ পৰিষদৰ সভাপতি ৰুবুল দাসে কয় ‘কৃষক মুক্তি সংগ্ৰাম সমিতিৰ নতুন ৰাজনৈতিক দলৰ প্ৰতি অভিনন্দন আছে। আশা ৰাখিছো জাতীয় জনগোষ্ঠীয় আঞ্চলিকতাবাদী প্ৰগতিশীল চিন্তা কৰা সকলো ৰাজনৈতিক দল সংগঠনে আৰু অসমৰ জনসাধাৰণে এই দলটোক সমৰ্থন জনাব। আমি বাৰম্বাৰ পূৰ্বতে স্পষ্ট কৰি দিছো যে অখিল গগৈৰ নেতৃত্বত বিভিন্ন জাতীয় জনগোষ্ঠীয় সমভাৱাসম্পন্ন সংগঠনৰ সহযোগত এটি ৰাজনৈতিক দল গঠিত হ’ব। কৃষখ মুক্তি সংগ্ৰাম সমিতিয়ে যি সিদ্ধান্ত লৈছে সেয়া তেওঁলোকৰ নিজাববীয়া সিদ্ধান্ত।‘
ইপিনে, সদৌ অসম ছাত্ৰ সন্থাৰ নেতৃত্বতো এক ৰাজনৈতিক দল গঠন কৰাৰ ইতিমধ্যে কুচ-কাৱাজ আৰম্ভ হৈছে।
তেনেক্ষেত্ৰত জাতীয়তাবাদী ভাৱাসম্পন্ন জনসাধাৰণে বিজেপিৰ বিকল্প বিচাৰিলেও যেন এতিয়া বিবুধিত পৰিছে। কাক ভোট দিব তেওঁলোকে? এইক্ষেত্ৰত নিশ্চয়কৈ ভোট বিভাজনৰ আশংকা নথকা নহয়।
এই চৰ্চা চলি থকাৰ মাজতে এক সংবাদমেল সম্বোধন কৰি কৃষক মুক্তি সংগ্ৰাম সমিতিৰ সভাপতি ভাস্ক’ ডি শইকীয়াৰ ঘোষণা ‘‘আমি কৃষক মুক্তি সংগ্রাম সমিতিয়ে এটা নতুন ৰাজনৈতিক দল গঠন কৰিবলৈ সাজু হৈছো।এটা নতুন নামেৰে আমি আৰম্ভ কৰিম। পূৰ্বৰ ‘গণ মুক্তি সংগ্ৰাম অসম’ নামটো নাথাকিব।‘
ইপিনে, এইটো আঞ্চলিক ৰাজনৈতিক দল হ’ব বুলি মন্তব্য কৰি শইকীয়াই কয় ‘সকলো প্ৰস্তুতি ইতিমধ্যে আৰম্ভ হৈছে। এই আঞ্চলিক দলটোৱে সকলো জাতি-জনগোষ্ঠী, ধৰ্ম-বৰ্ণ-ভাষাৰ ৰাইজক সামৰি ল’ব।‘
শইকীয়াৰ দাবী ‘এই ৰাজনৈতিক দলটো আপোচবিহীন আঞ্চলিক দল হ’ব। দল গঠনৰ সকলো ধৰণৰ বৌদ্ধিক কাম-কাজ সমাপন কৰা হৈছে।‘
আনহাতে, দলৰ সংবিধান আৰু কৰ্মসূচী প্ৰস্তুতি সম্পূৰ্ণ হৈছে বুলি সদৰী কৰি শইকীয়াৰ দাবী ‘কৰ্মসূচীখনৰ নাম হ’ব অসমবাসীৰ জাতীয় কৰ্মসূচী। সেইখনক আমি আধুনিক অসমীয়া জাতিৰ বুনিয়াদী দলিল বুলি ভাবিছো।‘
ইপিনে, দলৰ সংবিধান আৰু কৰ্মসূচী কৃষক মুক্তি সংগ্ৰাম সমিতিৰ কেন্দ্ৰীয় সমিতিৰ বিষয়ববীয়া আৰু জিলা সমিতিৰ সভাপতিসকলৰ মতামতৰ বাবে প্ৰেৰণ কৰা হ’ব বুলি তেওঁ জানিবলৈ দিয়ে।
ইপিনে, ৰাষ্ট্ৰীয়তাবাদী শক্তি কংগ্ৰেছ আৰু এআইয়ুডিএফৰ লগত কোনোধৰণৰ মিত্ৰতা নকৰে বুলি আওপকীয়াকৈ সদৰী কৰি শইকীয়াই কয় ‘হিন্দু নাইবা মুছলমান সাম্প্ৰদায়িক শক্তিৰ লগত কোনোধৰণৰ মিত্ৰতা কৰা নহয় লগতে ৰাষ্ট্ৰীয়তাবাদী দলৰ লগতো কোনোধৰণৰ মিত্ৰতা কৰা নহ’ব।‘
‘আমি ঐক্যৱদ্ধ আঞ্চলিক ৰাজনৈতিক শক্তি বিচাৰো। অসমৰ সকলোবোৰ আঞ্চলিক শক্তি একত্ৰিত হওক। আমি আছুৰ লগতে ৭০ সংগঠনৰ নেতৃত্বৰ সৈতে পৰৱৰ্তী সময়ত আলোচনাত মিলিত হ’ম। সকলো ধৰণৰ সাম্প্ৰদায়িক মুছলমানৰ সাম্প্ৰদায়িকতাই হওক, হিন্দু সাম্প্ৰদায়িকতাই হওক, শক্তিৰ বিৰুদ্ধে ঐক্যৱদ্ধ আঞ্চলিক দল গঢ়ি তোলা হ’ব।‘ সাংবাদিকে সোধা এক প্ৰশ্নৰ উত্তৰত ভাস্ক’ ডি শইকীয়াই এইদৰে কয়।
অহা অক্টোবৰ মাহৰ শেষৰ ফালে এই ৰাজনৈতিক দলটোৱে আত্মপ্ৰকাশ কৰিব বুলি সদৰী কৰি শইকীয়াই লগতে কয় ‘ইতিমধ্যে অক্টোবৰ মাহৰ শেষৰ ফালে অখিল গগৈ মুকলি আকাশৰ তললৈ ওলাই আহিব বুলি দৃঢ় বিশ্বাস আছে। গতিকে এই ৰাজনৈতিক দলৰ প্ৰক্ষেপিত মুখ্যমন্ত্ৰী পদৰ প্ৰাৰ্থী অখিল গগৈ হ’ব।‘
