জো বিডেনৰ যুদ্ধভূমি ইউক্ৰেইনত আচম্বিত ভ্ৰমণ; কেনেকৈ গোপনে ৰখা হৈছিল এই যাত্ৰা?
আমেৰিকা যুক্তৰাষ্ট্ৰৰ ৰাষ্ট্ৰপতি জো বিডেনক পোলেণ্ডৰ সীমান্তত অতি গোপনীয়ভাৱে ৰে’লযোগে ইউক্ৰেইনলৈ লৈ যোৱা হৈছিল। ‘নিউয়ৰ্ক টাইমছ’ৰ বাতৰিত এই কথা প্ৰকাশ পাইছে।
পোলেণ্ডৰ পৰা ইউক্ৰেইনৰ ৰাজধানী কিয়েভলৈ বিডেনৰ আকস্মিক ভ্ৰমণ সুৰক্ষাজনিত কাৰণত অতি গোপনীয় ৰখা হৈছিল। কোৱা হৈছে যে আমেৰিকাৰ ৰাষ্ট্ৰপতি বিডেনে এতিয়া ইউক্ৰেইন ত্যাগ কৰিছে।
বাতৰি অনুসৰি, শনিবাৰে বিডেনে তেওঁৰ পত্নী জিলৰ সৈতে এখন ৰেষ্টুৰেণ্টত ৰাতিৰ আহাৰ গ্ৰহণ কৰিছিল আৰু তাৰ পিছত চুপে চাপে ৱাশ্বিংটন এৰিছিল।
অৱশ্যে, বিডেনে পূব ইউৰোপৰ পূৰ্ব নিৰ্ধাৰিত ভ্ৰমণত ইউক্ৰেইনো ভ্ৰমণ কৰাৰ কথা বিষয়াসকলে আগতে অস্বীকাৰ কৰিছিল।
নিউয়ৰ্ক টাইমছে লিখিছে, “দেওবাৰে নিশা হোৱাইট হাউছে প্ৰকাশ কৰা ৰাষ্ট্ৰপতিৰ কাৰ্যসূচী অনুসৰি ৰাষ্ট্ৰপতিয়ে সোমবাৰে ৱাশ্বিংটনত থাকিব আৰু সন্ধিয়া বাৰ্ছালৈ ৰাওনা হ’ব। কিন্তু তেতিয়ালৈকে তেওঁ তেওঁৰ আধা ভ্ৰমণ সম্পূৰ্ণ কৰিছিল।”
এবছৰ আগতে ৰাছিয়াৰ ইউক্ৰেইন আক্ৰমণৰ পিছত এইটো আমেৰিকা যুক্তৰাষ্ট্ৰৰ ৰাষ্ট্ৰপতিৰ প্ৰথম ভ্ৰমণ। ইয়াৰ আগতে বিডেনে পোলেণ্ডৰ ৰাষ্ট্ৰপতি এন্দ্ৰেজ ডুডাক লগ কৰিবলৈ গৈছিল।
শেহতীয়া ভ্ৰমণত বিডেনে কি ক’লে? জো বিডেনে ইউক্ৰেইনৰ নাগৰিকসকলক প্ৰশংসা কৰি কয় যে তেওঁলোকে সামৰিক প্ৰশিক্ষণৰ অভিজ্ঞতা অবিহনে খুব ভালদৰে যুঁজিছে।
তেওঁ কয়, “আকৌ এবাৰ মই ইউক্ৰেইনৰ লোকসকলক প্ৰশংসা কৰোঁ, যিসকল সাধাৰণ আৰু কঠোৰ পৰিশ্ৰমী নাগৰিকে কেতিয়াও সামৰিক প্ৰশিক্ষণ লাভ কৰা নাই, কিন্তু তেওঁলোকে যিধৰণে আগবাঢ়ি আহি যুঁজ দিছে সেয়া এজন নায়কতকৈ কম নহয় আৰু সমগ্ৰ বিশ্বই তেওঁলোকক এনেকৈয়ে ভাবে।”
এক টিভি সম্প্ৰচাৰত বিডেন আৰু জেলেনস্কিয়ে এক যুটীয়া বিবৃতি জাৰি কৰি কয় যে “গণতান্ত্ৰিক বিশ্ব” এই “সাহসী যুদ্ধ”ত জয়ী হ’ব লাগিব।
বিডেনে কয় যে ইউক্ৰেনে আমেৰিকা যুক্তৰাষ্ট্ৰৰ সমৰ্থন লাভ কৰি থাকিব।
জেলেনস্কিয়ে কয়, “আমেৰিকা-ইউক্ৰেইন সম্পৰ্কৰ সমগ্ৰ ইতিহাসত এই ভ্ৰমণ আটাইতকৈ গুৰুত্বপূৰ্ণ। এইটোৱে দেখুৱায় যে আমি ইতিমধ্যে কি প্ৰাপ্ত কৰিছো। আজি আমাৰ আলোচনা বহুত সাৰ্থক হৈছে।
তেওঁ কয় যে এই ভ্ৰমণৰ প্ৰভাৱ নিশ্চিতভাৱে যুদ্ধক্ষেত্ৰত দেখা যাব।
জানুৱাৰীৰ আৰম্ভণিতে আমেৰিকাই ইউক্ৰেইনক আব্ৰামছ টেংক দিয়াৰ সিদ্ধান্ত লয়, যি এতিয়া ইউক্ৰেইনৰ প্ৰতিৰক্ষাত অৰিহণা যোগাই আছে।
জেলেনস্কিয়ে কয় যে বিডেনৰ সৈতে দীৰ্ঘ দূৰত্বৰ অস্ত্ৰ-শস্ত্ৰৰ বিষয়েও আলোচনা কৰা হৈছে। তেওঁ কয়, “মই জানো যে ইউক্ৰেইনৰ বাবে এক গুৰুত্বপূৰ্ণ সমৰ্থন পেকেজ আহিব আৰু এইটো এটা ইংগিত যে এতিয়া ৰাছিয়াৰ আক্ৰমণৰ কোনো সুযোগ নাই।”
জেলেনস্কিয়ে বিডেনক কয়, “মাননীয় ৰাষ্ট্ৰপতি, ইউক্ৰেইন আপোনাৰ প্ৰতি কৃতজ্ঞ।”