প্ৰেমত পৰিলে মগজুত কি চলি থাকে জানেনে? ইয়াৰ আঁৰত আছে বিজ্ঞানৰ খেল

প্ৰেমক প্ৰায়ে আৱেগৰ ৰোলাৰকোষ্টাৰ হিচাপে দেখুওৱা হয়। ই কেৱল ৰোমান্টিক কল্পনা নহয়, প্ৰেমৰ সময়ত আমাৰ শৰীৰ আৰু মনত বহুতো ৰাসায়নিক পৰিৱৰ্তন ঘটে। এই পৰিৱৰ্তনবোৰ বুজি পাই আমি জানিব পাৰোঁ যে প্ৰেমে আমাৰ আচৰণ আৰু সম্পৰ্কত কেনে প্ৰভাৱ পেলায়।

যেতিয়া আপুনি প্ৰেমত পৰে?

যদি কাৰোবাৰ বাবে আপোনাৰ হৃদয়খনে ধপধপাইবলৈ আৰম্ভ কৰে, তেন্তে আপুনি জানে যে আপোনাৰ মগজু আৰু শৰীৰত কিছু ৰাসায়নিক পৰিৱৰ্তন ঘটিছে। প্ৰেমৰ প্ৰাৰম্ভিক পৰ্যায়ত মগজুৱে ড’পামিন, অক্সিট’চিন, ন’ৰেপিনেফ্ৰিন আৰু ভেছ’প্ৰেচিন আদি হৰম’ন আৰু নিউৰ’ট্ৰান্সমিটাৰৰ মিশ্ৰণ নিৰ্গত কৰে। এই হৰম’নবোৰৰ বিষয়ে জানি ওও আহক।

ড’পামিন (Dopamine)

ইয়াক “feel-good” হৰম’ন বুলিও কোৱা হয়, যিয়ে আনন্দ আৰু উপভোগৰ অনুভূতি দিয়ে। ভালপোৱা কোনোবা এজনৰ কথা ভাবিলে মগজুৰ কিছু অংশ সক্ৰিয় হৈ পৰে আৰু ড’পামিনৰ উৎপাদন বাঢ়ি যায়। সেইবাবেই প্ৰেমত পৰাটো নিচা যেন লাগে।

নৰেপিনেফ্ৰিন (Norepinephrine)

এই হৰম’নে আপোনাৰ হৃদস্পন্দন দ্ৰুত কৰি তোলে, হাত-ভৰি ঘামি উঠে, আৰু আপোনাক উত্তেজনাৰে ভৰাই তোলে। প্ৰেমৰ আৰম্ভণিৰ দিনবোৰৰ উত্তেজনা আৰু উদ্দীপনা ইয়াৰ বাবেই হয়।

অক্সিট’চিন (Oxytocin)

ইয়াক “প্ৰেম হৰম’ন” বুলি কোৱা হয়, যিটো আলিংগন বা স্পৰ্শৰ দ্বাৰা নিঃসৰিত হয়। ই দুজন মানুহৰ মাজত গভীৰ সংযোগ আৰু বিশ্বাসৰ সৃষ্টি কৰে। ইয়াৰ উপৰি ভেছ’প্ৰেচিনো (Vasopressin) নিঃসৰিত হয়। এই হৰম’নে দীৰ্ঘম্যাদী প্ৰতিশ্ৰুতি আৰু নিৰাপত্তাবোধক প্ৰসাৰিত কৰে।

প্ৰেম কিয় নিচাৰ দৰে অনুভৱ হয়

প্ৰখ্যাত জীৱবিজ্ঞানী হেলেন ফিচাৰে কয় যে প্ৰেমৰ মগজুৰ ওপৰত নিচাযুক্ত পদাৰ্থৰ দৰেই প্ৰভাৱ পৰে। প্ৰেমত পৰিলে আমাৰ মগজুৱে সেই উচ্চ অনুভৱটোক বাৰে বাৰে বিচাৰি ফুৰে। এই কাৰণেই প্ৰেমৰ প্ৰাৰম্ভিক পৰ্যায়টো আৱেগেৰে ভৰপূৰ।

প্ৰেমত আচৰণগত পৰিৱৰ্তন

প্ৰেমত পৰাৰ পিছত মানুহে নিজৰ সংগীৰ সৈতে অধিক সময় কটাবলৈ চেষ্টা কৰে, নিজৰ ৰুটিন সলনি কৰিবলৈ আনকি শাৰীৰিক ৰূপো সলনি কৰিবলৈ চেষ্টা কৰে। এই সকলোবোৰ মগজুৰ পুৰস্কাৰ ব্যৱস্থাৰ দ্বাৰা নিয়ন্ত্ৰিত হয়, যিয়ে আমাৰ সংগীক বিশেষ অনুভৱ কৰিবলৈ প্ৰেৰণা দিয়ে।