Kohinoor Crown ব্ৰিটেইনৰ ৰাণী দ্বিতীয় এলিজাবেথৰ ৯৬ বছৰ বয়সত দেহাৱসান ঘটিছে। বৃহস্পতিবাৰে আবেলি তেওঁ স্কটলেণ্ডৰ বালম’ৰেল পেলেচত শেষ নিশ্বাস ত্যাগ কৰে। বাকিংহাম পেলেচে সন্ধিয়া এক বিবৃতিযোগে আনুষ্ঠানিকভাৱে তেওঁৰ মৃত্যুৰ খবৰটো ঘোষণা কৰিছিল।
ব্ৰিটেইনৰ পৰৱৰ্তী ৰজা হ’ব ৰাণী দ্বিতীয় এলিজাবেথৰ পুত্ৰ চাৰ্লছ। মাতৃৰ মৃত্যুৰ ২৪ ঘণ্টাৰ ভিতৰত তেওঁক আনুষ্ঠানিকভাৱে ৰজা ঘোষণা কৰা হ’ব। এইবাৰ প্ৰশ্ন হৈছে, কহিনুৰৰ গৰাকী কোন হ’ব?
চলিত বছৰৰ আৰম্ভণিতে ৰাণী এলিজাবেথে ঘোষণা কৰিছিল যে তেওঁৰ অনুপস্থিতিত ‘কুইন কনছৰ্ট’ হ’ব প্ৰিন্স চাৰ্লছৰ পত্নী ডাচেছ অফ কৰ্ণৱাল কেমিলা। গতিকে স্বাভাৱিকতে যেতিয়া চাৰ্লছ ৰজা হ’ব, কেমিলাৰ মুৰতো জিলিকিব কহিনুৰৰ খটোৱা মুকুট। সেইটো প্ৰকৃততে ৰাণী এলিজাবেথৰ মাতৃৰ আছিল।
১০৫.৬ কেৰেটৰ কহিনুৰ হীৰাৰ জন্মস্থান হৈছে ভাৰত। চতুৰ্দশ শতিকাত ভাৰতত এই হীৰাটো পোৱা গৈছিল। তাৰ পিছত বহু হাত ঘূৰিলে। ১৮৪৯ চনত ব্ৰিটিছসকলে পাঞ্জাৱ দখল কৰাৰ সময়তে কহিনুৰ ৰাণী ভিক্টোৰিয়াক হস্তান্তৰ কৰা হৈছিল। তেতিয়াৰ পৰাই এই কহিনুৰ হীৰাই ব্ৰিটেইনৰ শাসকসকলৰ মূৰত শোভা পাই আহিছে।
বৰ্তমান এই হীৰা টুকুৰা প্লেটিনামৰ মুকুটত ৰখা হৈছে। ৰাণী দ্বিতীয় এলিজাবেথৰ পিতৃ ষষ্ঠ জৰ্জৰ অভিষেকৰ সময়ত ১৯৩৭ চনত এই মুকুটটো সৃষ্টি কৰা হৈছিল। সেইটো পৰিধান কৰিছিল দ্বিতীয় এলিজাবেথৰ মাতৃ প্ৰথম এলিজাবেথে । মুকুটটো টাৱাৰ অফ লণ্ডনত ৰখা হৈছে। চাৰ্লছৰ অভিষেকৰ দিনাই সেইটো কেমিলাৰ মূৰত পিন্ধোৱা হ’ব।
