ভাৰতৰ উত্তৰ-পূবত বিশেষ প্ৰভাৱ থকা খ্ৰীষ্ট ধৰ্মই এক ভাবুকিৰ সন্মুখীন হৈছে।
উত্তৰ-পূবত বিশেষকৈ মণিপুৰত দক্ষিণ কোৰিয়াৰ এক “কাল্ট” গোটে খ্ৰীষ্টধৰ্মৰ প্ৰতি এই ভাবুকিৰ সৃষ্টি কৰাৰ অভিযোগ উঠিছে।
মণিপুৰত ৪০ শতাংশতকৈ অধিক লোক খ্ৰীষ্টধৰ্মী। কিন্তু, ক্ৰমবৰ্ধমান জনপ্ৰিয়তা আৰ্জিবলৈ সক্ষম হোৱা “শ্বিনচেঅনজি” নামৰ দক্ষিণ কোৰীয় কাল্ট গোটটোৰ পৰা নিজৰ অনুগামীক আঁতৰি থাকিবলৈ মণিপুৰ বেপ্তিষ্ট কনভেনচনে সাৱধানবাণী জাৰি কৰিছে।
“মণিপুৰ বেপ্তিষ্ট কনভেনচনৰ সকলো অনুষ্ঠান আৰু গীৰ্জাৰ জ্ঞাতাৰ্থে জনোৱা হয় যে দক্ষিণ কোৰিয়াৰ পৰা অহা ‘শ্বিনচেঅনজি’ নামৰ বিপজ্জনক, প্ৰথাবিৰোধী কাল্ট গোটটো সন্দৰ্ভত সজাগ আৰু সতৰ্ক হৈ থাকে যেন,” কনভেনচনৰ সাধাৰণ সম্পাদক ৰেভাৰেণ্ড ৱুংনাতইং কংগাৰৰ মন্তব্য।
তেওঁৰ মতে, কোৰীয় ধৰ্মীয় গোটটোৰ নেতা মেন-হী-লীয়ে খ্ৰীষ্ট শাস্ত্ৰৰ গোপন জ্ঞান থকা বুলি দাবী কৰে আৰু লগতে দাবী কৰে যে এই জ্ঞান বাকী আন খ্ৰীষ্ট পাদুৰীসকলৰ নাই।
“শ্বিনচেঅনজিৰ শিক্ষা অনুসৰণ আৰু শ্ৰৱণৰ জৰিয়তেহে ইশ্বৰক জানিব পৰা যায়,” গোটটোৰ দাবী সন্দৰ্ভত ৰেভাৰেণ্ডজনৰ মন্তব্য।
কংগাৰে কয় যে মণিপুৰৰ লগতে সমগ্ৰ উত্তৰ-পূবৰ বহুলোক ইতিমধ্যে কোৰীয় গোটটোৰ “চিকাৰ” হৈছে।
“আমাৰ বাবে এটা প্ৰধান উদ্বিগ্নতা হৈছে তেওঁলোকে আমাৰ গীৰ্জাবিলাকত অনুপ্ৰৱেশ ঘটাইছে আৰু তেওঁলোকৰ বাইবেল অধ্যয়নৰ ভুৱা পদ্ধতিলৈ আমাৰ ডেকাচামক প্ৰলুব্ধ কৰিছে,” তেওঁ কয়।
তেওঁলোকৰ ধৰ্মীয় শিক্ষাক “ভুৱা আৰু প্ৰতাৰণামূলক” বুলিও ৰেভাৰেণ্ডজনে মন্তব্য কৰিছে।
“শ্বিনচেঅনজি” ১৯৮৪ চনত দক্ষিণ কোৰিয়াত সংগঠিত হোৱা এক ধৰ্মপন্থা। পূৰ্বে লণ্ডনতো গীৰ্জাসমূহে ইয়াৰ বিৰুদ্ধে বিবৃতি জাৰি কৰিছিল।
