কেৰিয়াৰৰ ৩৩ সংখ্যক কনচাৰ্টত অংশগ্ৰহণ কৰিবলৈ গৈছিল যদিও মঞ্চত উঠাৰ আগতে বাথৰুমত উদ্ধাৰ হয় জনপ্ৰিয় কোৰিয়ান গায়িকা লি চাং ইউনৰ নিথৰ দেহ! ততাতয়াকৈ চিকিৎসালয়লৈ নিয়া হয় যদিও চিকিৎসকে তেওঁক মৃত ঘোষণা কৰে।
লি চাং ইউনে গিমচেয়ন পৌৰসভাৰ কোৱাৰত অনুষ্ঠান পৰিৱেশন কৰাৰ কথা আছিল। তেওঁ আহি মঞ্চ কঁপাব, তাৰ বাবে দৰ্শক তথা শ্ৰোতাই অপেক্ষা কৰি আছিল। কিন্তু তাৰ কেইমিনিটমান আগলৈকে গায়িকাগৰাকীক মঞ্চৰ পিছফালে দেখা পোৱা নগ’ল। তেতিয়াই তেওঁৰ দলৰ সদস্য আৰু কনচাৰ্টৰ আয়োজকসকলে লি চাং ইউনক বিচাৰিবলৈ আৰম্ভ কৰে।
বাথৰুমত বিচাৰি যাওতে লি চাং ইউনৰ মৃতদেহ মজিয়াত পৰি থকা অৱস্থাত উদ্ধাৰ হয়। তাৰ পৰাই কণ্ঠশিল্পীগৰাকীক উদ্ধাৰ কৰি চিকিৎসালয়লৈ লৈ যায় আৰু কৰ্তব্যৰত চিকিৎসকে তেওঁক মৃত ঘোষণা কৰে।
ইয়াৰ পিছতে কণ্ঠশিল্পী লি ছাং ইউনৰ মৃত্যুৰ খবৰ আৰক্ষীয়ে সদৰী কৰে। গায়িকাগৰাকীৰ মৃত্যু কেনেকৈ হ’ল সেয়া এতিয়াও জানিব পৰা হোৱা নাই যদিও আৰক্ষীয়ে ইতিমধ্যে এই ৰহস্য উলিয়াবলৈ তদন্ত আৰম্ভ কৰিছে।
