গোৱালপাৰা জিলাৰ কৃষ্ণাই মাদ্ৰাছা উচ্চতৰ মাধ্যমিক বিদ্যালয়ৰ অধ্যক্ষ মইনুল হকৰ দেওবাৰে শেষ নিশা পৰলোক প্ৰাপ্তি ঘটে।
মৃত্যুৰ সময়ত অধ্যক্ষ মইনুল হকৰ বয়স আছিল ৫৫ বছৰ।
জানিব পৰা মতে, উচ্চ ৰক্তচাপ জনিত ৰোগত গুৰুতৰ ভাৱে আক্ৰান্ত অধ্যক্ষ হকক যোৱা ৯ ডিচেম্বৰৰ নিশা জিএনআৰচিত ভৰ্তি কৰোৱা হৈছিল।
আইচিইউত চিকিৎসাধীন হৈ থকা মইনুল হকক অৱশেষত যোৱা নিশা চিকিৎসকে মৃত ঘোষণা কৰে।
আজি পুৱা তেওঁৰ নশ্বৰ দেহ কৃষ্ণাই পাইকান ২য় খণ্ডৰ আৰিমাৰাস্থ নিজা বাসভৱনলৈ লৈ অহা হয়।
ইয়াৰ পিছত অধ্যক্ষ হকৰ প্ৰতি অন্তিম শ্ৰদ্ধাঞ্জলি জনাবলৈ তেওঁৰ মৃতদেহ লৈ অহা হয় কৃষ্ণাই মাদ্ৰাছা উচ্চতৰ মাধ্যমিক বিদ্যালয় চৌহদলৈ।
উল্লেখ্য যে প্ৰয়াত মইনুল হক এইখন শিক্ষানুষ্ঠানতে শৈক্ষিক জীৱনৰ পাতনি মেলি অৱশেষত এই বিদ্যালয়তখনতে শিক্ষক হিচাপে নিযুক্তি লাভ কৰে।
পৰৱৰ্তী সময়ত তেওঁ অধ্যক্ষ আসনলৈ পদোন্নতি লাভ কৰিবলৈ সক্ষম হৈছিল।
অতি ভদ্ৰ আৰু অমায়িক স্বভাৱৰ মইনুল হকে এটা সময়ত হাব্ৰাঘাট মহাবিদ্যালয়, কৃষ্ণাইৰ ছাত্ৰ একতা সভাৰ সাধাৰণ সম্পাদক হিচাপে নিৰ্বাচিত হোৱাৰ বিপৰীতে কৃষ্ণাই যুৱ ছাত্ৰ কল্যাণ পৰিষদৰো সক্ৰিয় সদস্য আছিল।
মৃত্যুৰ সময়ত অধ্যক্ষ মইনুল হকে পত্নীসহ তিনিপুত্ৰক ইহসংসাৰত এৰি থৈ য়ায়।
তেওঁৰ মৃুত্যুত কৃষ্ণাই অঞ্চলত গভীৰ শোকৰ ছাঁ পৰে। আজি আবেলি ১.৩০ বজাত সহস্ৰাধিক গুণমুগ্ধৰ উপস্থিতিত আৰিমাৰাৰ সমূহীয়া গড়স্থানত মইনুল হকৰ জানাজা সম্পন্ন কৰা হয়।
